ក្រុមកញ្ជ្រោងខៀវ Leicester City នឹងត្រូវបើកកីឡដ្ឋាន King Power ស្វាគមន៍ក្រុមមេឃខៀវ Man City នៅប្រកួតជុំទី ៤ ក្របខ័ណ្ឌ Premier League សប្ដាហ៍នេះ ដែលនឹងមានផ្សាយផ្ទាល់លើទំព័រ CTS Sports នៅវេលាម៉ោង ០៩:០០ នាទីយប់ ថ្ងៃសៅរ៍ ទី ១១ កញ្ញា។
យ៉ាងណាសម្រាប់ City ក៏កំពុងប្រឈមបញ្ហាចម្បងផងដែរ ពាក់ព័ន្ធនឹងការប្រើប្រាស់កីឡាករ ក្រោយពី FIFA ដាក់ពិន័យកីឡាករប្រេស៊ីល ៨ រូបនៅ Premier League ហើយមានសមាជិករបស់មេឃខៀវចំនួន ២ រូបគឺ Ederson និង Gabriel Jesus។
ដូច្នេះមានន័យថា លោក Pep Guardiola នឹងមិនអាចប្រើប្រាស់អ្នកចាំទីដៃទី ១ ក្នុងការប្រកួតទល់ Leicester ពេលខាងមុខនេះបានទេ តែស៊យអីចង់ប្រើដៃទី ២ ក៏មិនបានទៀត ព្រោះ Zack Steffen ឯណោះគេតេស្តឃើញវិជ្ជមានកូវីដ ហើយកំពុងសម្រាកព្យាបាល។
អ៊ីចឹងមានតែបង្ខំចិត្តប្រើប្រាស់អ្នកចាំទីដៃទី ៣ កីឡាករ Scott Carson ដែលមានវ័យ ៣៦ ឆ្នាំ និងខកខានលេងនៅក្របខ័ណ្ឌ Premier League រយៈពេល ១០ ឆ្នាំមកហើយ ខណៈកន្លងមកបានលេងឲ្យ City ត្រឹមពានតូច EFL Cup តែប៉ុណ្ណោះ៕
ប្រភព៖ TheSun