នៅទីផ្សារដោះដូររដូវក្តៅកន្លងទៅ ក្លឹបហង្សក្រហម Liverpool ហាក់មិនសូវឃើញមមាញឹកដូចបណ្តាក្លឹបរួមលីគដទៃនោះទេ ពោលមិនថាតែការនាំយកអ្នកថ្មី ឬវ៉ៃចេញកីឡាករទៅឲ្យក្លឹបដទៃ។
យ៉ាងណាក្រុមម្ចាស់ដី Anfield បែរជាផ្តោតលើកិច្ចការងារបន្តកុងត្រាថ្មីសម្រាប់កីឡាករក្នុងក្រុមទៅវិញ ជាក់ស្តែងនៅប៉ុន្មានខែចុងក្រោយ ក្លឹបបានចរចាត្រូវរ៉ូវអស់ហើយលើការបន្តកុងត្រាថ្មី សម្រាប់តារាឆ្នើមដូចជា Trent Alexander-Arnold, Andy Robertson, Alisson Becker, Fabinho, Virgil van Dijk, Harvey Elliott និង Jordan Henderson ជាដើម។ ដោយឡែកអ្នកបន្ទាប់គឺ អាចជាខ្សែប្រយុទ្ធ Mohamed Salah។
កីឡាករអេហ្សីបបច្ចុប្បន្នជាប់កុងត្រា ជាមួយក្រុមរបស់លោក Jurgen Klopp ដល់ចុងខែមិថុនា ឆ្នាំ ២០២៣ ហើយទទួលបានថ្លៃពលកម្ម ២០០ ០០០ ផោន/សប្តាហ៍។ គេអាចរាប់បានជាកីឡាករស៊ីថ្លៃបំផុតមួយនៅក្លឹប តែបើធៀបទៅក្នុងបញ្ជីកីឡាករប្រចាំក្របខ័ណ្ឌ Premier League គឺគ្មានឈ្មោះខ្សែប្រយុទ្ធ វ័យ ២៩ ឆ្នាំរូបនេះទេ។
ហេតុនេះហើយ Salah ក៏រំអុកក្លឹបចង់បានថ្លៃពលកម្មខ្ពស់ជាងមុន ហើយការទាមទារសារនេះ មិនមែន ១ ទ្វេជា ២ តែគឺលើសហ្នឹងទៅទៀត។ បើតាមសារព័ត៌មាន The Mirror ចុះផ្សាយថា Salah ចង់បានថ្លៃពលកម្ម ៥០០ ០០០ ផោន ឬជាង ៦៩ លានដុល្លារក្នុងមួយសប្តាហ៍ពីក្លឹបហង្សក្រហម។ ទំហំនេះយើងពិតជាពិបាកនឹងជឿ ថាវាអាចកើតឡើងទៅបាន តែក៏ពិបាកសម្រាប់ហង្សដែរ ព្រោះអី Salah ជាកីឡាករដ៏សំខាន់បំផុតមួយនៅក្លឹប។
និយាយពីច្បាប់នៃការចំណាយ គឺ Liverpool នឹងមិនល្មើសនោះទេ បើទោះបីត្រូវចាយ ៥០០ ០០០ ផោន/សប្តាហ៍ឲ្យទៅខ្សែប្រយុទ្ធខាងលើ នោះក៏ដោយសារតែជាមធ្យមក្លឹបចាយតិចតួចណាស់សម្រាប់ថ្លៃពលកម្មកីឡាករដទៃទៀតក្នុងក្រុម ខុសពី Man Utd, Man City និង Chelsea ជាដើម ដែលកំពុងចាយក្រាស់ក្រែលស្រាប់។
ដូច្នេះយើងមិនអាចទស្សន៍ទាយទុកជាមុនបានទេ ថាក្រុមមានមូលដ្ឋានក្នុងទីក្រុង Merseyside នឹងព្រមផ្តល់ទំហំថ្លៃពលកម្មកប់ពពកសម្រាប់កីឡាករអេហ្សីប ឬចរចាជាថ្មីបែបណា។ ទៅមើលសមិទ្ធផលដែលគេសម្រេចបាន ក្រោយផ្ទេរចេញពី AS Roma នៅរដូវក្តៅឆ្នាំ ២០១៧ គឺ Salah រកបាន ១២៧ គ្រាប់និង Assist ៤៩ លើកហើយនៅការបង្ហាញខ្លួនសរុប ២០៦ ប្រកួត។ ជ័យជម្នះ Champions League កាលពីឆ្នាំ ២០១៩ និង Premier League ឆ្នាំ ២០២០ គឺអាចនិយាយបានថា មានចំណែកធំចេញពីកីឡាកររូបនេះ។
ផ្ទុយទៅវិញ បើការចរចាសុំប្រាក់ ៥០០ ០០០ ផោនអាចក្លាយជាចការពិត នោះ Salah នឹងយកឈ្នះកីឡាករស៊ីថ្លៃខ្ពស់បំផុតនៅ Premier League ទាំង ៦ ដូចខាងក្រោម៖
៦) Romelu Lukaku ទទួលបាន ៣២៥ ០០០ ផោនពីក្លឹប Chelsea
៥) Raphael Varane ទទួលបាន ៣៤០ ០០០ ផោនពីក្លឹប Man Utd
៤) Jadon Sancho ទទួលបាន ៣៥០ ០០០ ផោនពីក្លឹប Man Utd
៣) David de Gea ទទួលបាន ៣៧៥ ០០០ ផោនពីក្លឹប Man Utd
២) Kevin de Bruyne ទទួលបាន ៣៨៥ ០០០ ផោនពីក្លឹប Man City
១) Cristiano Ronaldo ទទួលបាន ៣៨៥ ០០០ ផោនពីក្លឹប Man Utd
ហាមយកអត្ថបពី CTS Sports ទៅចុះផ្សាយបន្ត ឬផលិតជាវីដេអូ!