ត្រឹមរយៈពេលតែ ១២ ម៉ោង ក្លឹប Man Utd លក់អាវដែលបោះឈ្មោះ Cristiano Ronaldo និងលេខ ៧ បានលុយដល់ទៅ ៤៥ លានដុល្លារ ស្របពេលដែលក្លឹបបារាំង Paris Saint-Germain ត្រឹមតែប៉ុន្មានម៉ោងដំបូង លក់អាវ Messi ដាច់បានជាង ២០ លានដុល្លារ។
ពាក់ព័ន្ធនឹងរឿងរ៉ាវនេះ ក៏មានអ្នកគាំទ្រមួយចំនួននៅមានការភ័ន្តច្រឡំ ហើយគិតឃើញថា បើលក់បានលុយច្រើនម្លឹងៗ អ៊ីចឹងលក់អាវតែប៉ុន្មានថ្ងៃ គឺល្មមអាចទូទាត់ថ្លៃពលកម្មឲ្យកីឡាករបានមួយឆ្នាំបាត់ទៅហើយ។ យ៉ាងណា CTS Sports ចង់បកស្រាយនៅក្នុងអត្ថបទនេះ ថាវាជាយល់ឃើញខុសហើយ ដោយទំហំប្រាក់ចំណូលវាល់លានពីការលក់អាវ ពុំបានធ្លាក់ចូលទៅក្នុងកុងរបស់ក្លឹបទាំងស្រុងនោះឡើយ។
តាមពិតទៅក្លឹបបាល់ទាត់ទាំងអស់ មិនថាក្លឹបស្ថិតនៅលីគកំពូលណាមួយនោះទេ ចំណូលដែលពួកគេទទួលបានពីការលក់អាវ គឺមានការចែកភាគរយជាមួយនឹងក្រុមហ៊ុនផ្គត់ផ្គង់ ហើយចំនួនភាគរយនោះគឺស៊ីសងលើការចរចា ក៏ដូចជាលក្ខខណ្ឌនៃតួលេខអាវគ្រប់ Target ដែលបានលក់ចេញ។ និយាយឲ្យសាមញ្ញទៅ ក្លឹបបាល់ទាត់ជាអ្នកដើរទីផ្សារ ហើយក្រុមហ៊ុន Adidas, Nike ឬ Puma ជាដើម ជាអ្នកចេញ Concept រចនានៃអាវ ក៏ដូចជាផ្គត់ផ្គង់អាវទាំងនោះមកកាន់ Store នីមួយៗរបស់ក្លឹប។
ដូច្នេះខាងក្រុមហ៊ុនផ្គត់ផ្គង់គឺបានធ្វើការធ្ងន់ជាង ព្រោះទាំងថ្លៃពលកម្មលើការចាយវាយឲ្យបុគ្គលិកផ្នែកកាត់ដេរ ផ្នែកដឹកជញ្ជូន ក៏ដូចជាវត្ថុធាតុដើម សុទ្ធសឹងជាអ្វីដែលពួកគេត្រូវចំណាយ ហើយខាងភាគីក្លឹបចាំតែអង្គុយធ្វើទីផ្សារ និងលក់ទៅកាន់អតិថិជនប៉ុណ្ណោះ។
ជាមធ្យមក្លឹបបាល់ទាត់ទាំងអស់ អាចស៊ីភាគរយប្រហែល ៦ ទៅ ៧,៥ ភាគរយ ពីការលក់អាវលក់ ឬក្លឹបខ្លះសំណាងទៅ អាចទទួលបានដល់ ១៥ ភាគរយ។ ដូច្នេះមានន័យថា អាវ ១ ដែលមានតម្លៃ ១០០ ដុល្លារ បើពួកគេស៊ីបាន ៧ ភាគរយ នោះមានចំណែកលុយសុទ្ធតែ ៧ ដុល្លារប៉ុណ្ណោះ ដែលក្លឹបទទួលបាន។
ចុះអ្នកឆ្ងល់ទេ មុននឹងឈានដល់ចរចាការចែកភាគរយនេះបាន តើភាគីទាំងសងខាងត្រូវឆ្លងកាត់កិច្ចព្រមព្រៀងអ្វីខ្លះ? ចម្លើយ គឺវាផ្សារភ្ជាប់ទៅក្នុងកិច្ចព្រមព្រៀងដែលក្រុមហ៊ុនដូចជា Nike, Adidas ឬ Puma ឧបត្ថម្ភជារៀងរាល់ឆ្នាំនោះឯង ជាក់ស្ដែងដូចក្លឹប Man Utd កុងត្រារយៈពេល ១០ ឆ្នាំជាមួយ Adidas ពួកគេទទួលបានប្រាក់ ១ ពាន់លានដុល្លារ ដូច្នេះខាង Adidas មានសិទ្ធក្នុងការទទួលអាជ្ញាប័ណ្ណផ្គត់ផ្គង់អាវទៅឲ្យក្លឹបបិសាចក្រហម ទាំងសម្រាប់កីឡាករ ក៏ដូចជាការលក់។
ចំណែកឯ United មានតួនាទី ក្នុងការចូលរួមចំណែកផ្សព្វផ្សាយពីយីហោ Adidas ក៏ដូចជាបង្កើនតួលេខលក់ទៅតាមគោលដៅ ឬ Target ដែលបានកំណត់។ និយាយពីផលចំណេញដល់ក្រុមហ៊ុនផ្គត់ផ្គង់ កន្លងមកនាយកប្រតិបត្តិរបស់ Adidas លោក Herber Hainer បានបង្ហើបថា គោលដៅលក់រយៈពេល ១០ ឆ្នាំជាមួយ Man Utd គឺក្រុមហ៊ុនរំពឹងអាចកើបលុយមកវិញបាន ២ ពាន់លានដុល្លារ ដូច្នេះគឺលើសប្រាក់ឧបត្ថម្ភ ១ ទ្វេជា ២។ នេះជាការលើកឡើងយូរហើយ ពោលមុនការមកដល់របស់ Cristiano Ronaldo ដូច្នេះ Target បានកំណត់ អាចនឹងលើសនោះបន្ថែមទៀតក៏ថាបាន។
ទៅមើលឧទាហរណ៍ជាក់ស្តែងមួយផ្សេងទៀត នៅក្លឹប PSG ឯណោះវិញ ដែលទើបតែយកបានតារាឆ្នើម Lionel Messi គឺពួកគេទទួលបាន ៧ ភាគរយ ពីក្រុមហ៊ុន Nike ហើយកិច្ចព្រមព្រៀងឧបត្ថម្ភក្នុងមួយឆ្នាំ គឺស៊ីថ្លៃជាង ៩០ លានដុល្លារផ្សេងទៀត លើសុពលភាពដល់ឆ្នាំ ២០៣២៕
ហាមយកអត្ថបទពី CTS Sports ទៅចែកចាយបន្ត ឬផលិតចេញជាវីដេអូ!