បែងចែកឲ្យដាច់រវាងតម្លៃប្រព័ន្ធកីឡាកររួមនៃក្លឹប និងតម្លៃទ្រព្យនៃក្លឹប ដោយមុនស៊ីជម្រៅទៅក្នុងអត្ថបទនេះ CTS Sports សូមលម្អិតនៅអត្ថន័យ នៃពាក្យទាំង ២ ខាងលើសិន។
សម្រាប់តម្លៃប្រព័ន្ធកីឡាកររួម គឺសំដៅទៅការបូកបញ្ចូលនៃហាងឆេងថ្លៃខ្លួនកីឡាករក្នុងក្រុមទាំងអស់ មិនថាកីឡាករក្នុងឈុត ១១ នាក់ដំបូង ឬកីឡាករបម្រុង ពោលឲ្យតែជាប់ក្នុងបញ្ជីឈ្មោះកីឡាកររបស់ក្លឹប ហើយសរុបចេញជាតម្លៃរួមមួយ។ ចំណែកឯតម្លៃទ្រព្យនៃក្លឹប ឬតម្លៃយីហោ គឺសំដៅដល់ការបូកបញ្ចូលគ្នានៅកត្តាជាច្រើន មានតាំងពីសមិទ្ធផលជោគជ័យលើទីលាន ជោគជ័យលើការធ្វើទីផ្សារ ក៏ដូចជាចំណុចគួបផ្សំជាច្រើនទៀត។
ដោយឡែកនៅក្នុងអត្ថបទនេះ CTS Sports សូមធ្វើការអាប់ដែតបង្ហាញនៅទិន្នន័យចុងក្រោយ ពាក់ព័ន្ធនឹងក្លឹបបាល់ទាត់ ៥ ដែលមានតម្លៃប្រព័ន្ធកីឡាកររួមថ្លៃបំផុត៖
៥) Liverpool
នៅរយៈពេល ៣ ឆ្នាំចុងក្រោយ អាចរាប់បានថា Liverpool ជោគជ័យគួរសម ដោយពួកគេធ្លាប់ឈ្នះទាំងពាន Premier League និង Champions League។ យ៉ាងណាពួកគេក៏ខ្សត់ការនាំចូលកីឡាករ ហើយនៅរដូវក្តៅកន្លងទៅនេះ ក្លឹបផ្សេងគេចាយរយលាន តែសម្រាប់ហង្សចាយតែ ៤០ លានអឺរ៉ូប៉ុណ្ណោះ លើការនាំយកខ្សែការពារថ្មី Ibrahima Konate។
បច្ចុប្បន្នកីឡាករថ្លៃៗរបស់ Liverpool មានដូចជា Mohamed Salah តម្លៃ ១០០ លានអឺរ៉ូ, Sadio Mane តម្លៃ ៨៥ លានអឺរ៉ូ និង Trent Alexander-Arnold តម្លៃ ៧៥ លានអឺរ៉ូ។ ចំពោះប្រព័ន្ធកីឡាករជារួម នៃក្រុមដឹកនាំដោយលោក Jurgen Klopp គឺមានតម្លៃ ៨៨០ លានអឺរ៉ូ។
៤) Chelsea
នៅ ២ រដូវកាលចុងក្រោយ តោខៀវបានចាយក្រាស់ក្រែលលើការនាំយកកីឡាករកំពូលៗមកចូលរួម ដែលបូកទៅមិនក្រោម ៣០០ លានអឺរ៉ូនោះឡើយ។ ហេតុនេះក៏បានរុញឲ្យ Chelsea ឡើងមកឈរលេខ ៤ ជាក្រុមមានប្រព័ន្ធកីឡាករ ថ្លៃដល់ទៅ ៨៨២ លានអឺរ៉ូ។
ចំណោមកីឡាករមានតម្លៃកប់ពពករបស់តោខៀវ តួយ៉ាងគឺ Romelu Lukaku ថ្លៃ ១០០ លានអឺរ៉ូ, Mason Mount ថ្លៃ ៧៥ លានអឺរ៉ូ និង Kai Havertz ថ្លៃ ៧០ លានអឺរ៉ូជាដើម។
៣) Man Utd
កាលពីប៉ុន្មានខែមុន បិសាចក្រហមឈរនៅលេខរៀងទី ២ ក្នុងបញ្ជីមួយនេះ តែឥឡូវបែរជាធ្លាក់មកឈរនៅលេខ ៣។ ប្រព័ន្ធកីឡាកររបស់ក្លឹប Man Utd មានតម្លៃ ៩៣៧ លានអឺរ៉ូ ដោយនេះបូកទាំងការមកដល់របស់ Cristiano Ronaldo។
តាមពិតទៅ វត្តមាន CR7 មិនបានបន្ថែមឥទ្ធិពលខ្លាំងនោះទេ ដល់តម្លៃជារួម ព្រោះអីកត្តាអាយុរបស់លោកក៏កាន់តែចំណាស់ នាំឲ្យហាងឆេងថ្លៃខ្លួនធ្លាក់មកសល់ត្រឹម ៤៥ លានប៉ុណ្ណោះ។ ផ្ទុយទៅវិញបណ្តុំកីឡាករថ្លៃៗរបស់ក្លឹបសព្វថ្ងៃមានដូចជា Jadon Sancho ថ្លៃ ១០០ លានអឺរ៉ូ, Bruno Fernandes ថ្លៃ ៩០ លានអឺរ៉ូ និង Marcus Rashford ថ្លៃ ៨៥ លានអឺរ៉ូ។
២) Paris Saint-Germain
នេះគឺជាក្លឹបដែលជំនួសតំណែងទី ២ របស់ Man Utd បន្ទាប់ពីក្លឹបសេដ្ឋីបារាំង នាំយកបានកីឡាករកំពូលជាច្រើននៅរដូវក្តៅ ឆ្នាំ ២០២១។
ប្រព័ន្ធកីឡាកររបស់ក្លឹប PSG មានតម្លៃ ៩៩៧ លានអឺរ៉ូ ហើយកីឡាករមានតម្លៃថ្លៃបំផុតក្នុងក្លឹប មានដូចជា Kylian Mbappe ថ្លៃ ១៦០ លានអឺរ៉ូ, Neymar ថ្លៃ ១០០ លានអឺរ៉ូ និង Lionel Messi ថ្លៃ ៨០ លានអឺរ៉ូ។ នេះមានន័យថា បើ PSG លក់ Mbappe ឲ្យទៅ Real បានសម្រេច ម្ល៉េះពួកគេត្រូវនៅទាបជាង Liverpool ទៅទៀត។
១) Man City
ក្រោមការដឹកនាំរបស់លោក Pep Guardiola ក្រុមមេឃខៀវបានប្រែខ្លួន ក្លាយជាក្រុមដ៏គួរឲ្យញញើតមួយនៅតំបន់អឺរ៉ុប ជាពិសេសនៅលីគកំពូល Premier League ៤ ឆ្នាំចុងក្រោយ ពួកគេឈ្នះដល់ទៅ ៣ លើកឯណោះ។
Man City មានតម្លៃប្រព័ន្ធកីឡាកររួម ដល់ទៅ ១,០៤ ពាន់លានអឺរ៉ូ ក៏ដោយសារជាមធ្យមក្លឹបមានកីឡាករថ្លៃមិនក្រោម ៤០ លានអឺរ៉ូនោះទេ។ ចំពោះកីឡាករថ្លៃបំផុតមានដូចជា Kevin de Bruyne ថ្លៃ ១០០ លានអឺរ៉ូ, Raheem Sterling ថ្លៃ ៩០ លានអឺរ៉ូ និង Phil Foden ថ្លៃ ៨០ លានអឺរ៉ូ៕
ប្រភព៖ TransferMarkt