អ្នកចាំទីដៃស្អិតរបស់ក្លឹបមេឃខៀវ Man City គឺកីឡាករ Ederson Moares បានព្រមព្រៀងលើការចុះហត្ថលេខាបន្តកុងត្រាថ្មី ដែលមានសុពលភាពរយៈពេល ៥ ឆ្នាំ ពោលគឺនឹងត្រូវផុតនៅចុងខែមិថុនា ឆ្នាំ ២០២៦។
បូកទាំងកុងត្រាចាស់ថ្មី ក៏សមល្មមនឹងអនុញ្ញាតឲ្យ Ederson យ៉ាងហោចណាស់ចាយពេល ៩ ឆ្នាំនៅទឹកដី Etihad បើគិតចាប់ពីការផ្ទេរចូលដំបូង នៅខែមិថុនា ឆ្នាំ ២០១៧។ នេះក៏រុញឲ្យគេក្លាយជាកីឡាករទី ៥ ដែលបានចុះហត្ថលេខាថ្មីនៅឆ្នាំ ២០២១ បន្ទាប់ពីកិច្ចព្រមព្រៀងរបស់ Kevin de Bruyne, Fernandinho, John Stones និង Ruben Dias។
ប្រាប់គេហទំព័រផ្លូវការក្លឹប Mancity.com កីឡាករពាក់អាវលេខ ៣១ និយាយថា៖ “នេះជាការសម្រេចចិត្តដ៏ងាយស្រួលសម្រាប់ខ្ញុំ ព្រោះគ្មានកន្លែងណាផ្សេងទៀតដែលខ្ញុំចង់ទៅនោះទេ ហើយក្លាយជាផ្នែកមួយនៃក្លឹបបាល់ទាត់ដ៏ល្អក្នុងលោក និងការប្រជែងពានរៀងរាល់ឆ្នាំ ជាអ្វីដែលកីឡាករចង់បានបំផុត ហើយទាំងអស់នេះជាឱកាសដែលអ្នកអាចទទួលបាននៅ City”។
គួរបញ្ជាក់ថា សុពលភាពកុងត្រាចាស់របស់ Ederson គឺត្រូវផុតនៅចុងខែមិថុនា ឆ្នាំ ២០២៥ នេះបានបន្ថែមលើកុងត្រាចាស់រយៈ ពេល ១ ឆ្នាំ។ ការបង្ហាញខ្លួនសរុប ១៩៥ ប្រកួត កីឡាករប្រេស៊ីលបានជួយទប់បាល់ Clean Sheet ឲ្យក្រុមដឹកនាំដោយលោក Pep Guardiola ដល់ទៅ ៩៤ លើក ហើយក៏បានឈ្នះពានស្រោមដៃមាសចំនួន ២ រដូវកាលផងដែរ៕
ប្រភព៖ Mancity.com