កាលពីនៅលេងឲ្យក្លឹប Juventus តារាឆ្នើម Cristiano Ronaldo បានទទួលថ្លៃពលកម្មប្រមាណ ១,២ លានដុល្លារ/សប្តាហ៍ ដែលទំហំនេះ ឈ្មោះរបស់លោកអាចឈរនៅលេខរៀងទី ២ បន្ទាប់ពី Lionel Messi ដែលជាតារាឆ្នើមរបស់ក្លឹប PSG។ ប៉ុន្តែតាមរយៈទិន្នន័យថ្មី ជាមួយការផ្ទេរមកក្លឹប Man Utd គ្រប់យ៉ាងក៏មានការប្រែប្រួល ហើយ Ronaldo បានខ្ទាតពីលេខ ២ មកដល់លេខ ៧ ក្នុងតារាង Top 10។ ទំព័រ CTS Sports ធ្វើការបង្ហាញឈ្មោះកីឡាករបាល់ទាត់ស៊ីថ្លៃខ្ពស់បំផុតទាំង ១០ ដូចខាងក្រោម៖
១០) Robert Lewandowski
នេះជាកីឡាករនៅ Bundesliga តែមួយរូបគត់ ដែលមានឈ្មោះក្នុងបញ្ជីមួយនេះ។ ម្ចាស់ពាន FIFA The Best សម័យកាលឆ្នាំ ២០២០ ទទួលបានថ្លៃពលកម្ម ៤៨៣ ០០០ ដុល្លារ/សប្តាហ៍ ពីក្លឹប Bayern Munich ជាប់ឈ្មោះជាតារាបាល់ទាត់ស៊ីថ្លៃដាច់គេនៅក្របខ័ណ្ឌកំពូលអាល្លឺម៉ង់។
៩) David de Gea
កន្លងមកធ្លាប់ជាកីឡាករស៊ីថ្លៃបំផុតនៅក្លឹប Man Utd និងក្របខ័ណ្ឌ Premier League តែក្រោយការបន្តកុងត្រាថ្មីរបស់ Kevin de Bruyne សម្រាប់អ្នកចាំទីសញ្ជាតិអេស្ប៉ាញក៏បានធ្លាក់មកឈរនៅចំណាត់ថ្នាក់បន្ទាប់។ ក្នុងមួយសប្តាហ៍ De Gea រកបាន ៥១៧ ០០០ ដុល្លារពីក្លឹបបិសាចក្រហម។
៨) Kevin de Bruyne
ជាមួយកុងត្រាថ្មី នៅក្លឹបម្ចាស់ដី Etihad ក៏បានរុញឈ្មោះកីឡាករបែលហ្សិក ឲ្យក្លាយខ្លួនជាកីឡាករស៊ីថ្លៃបំផុតនៅ Premier League ដែលក្នុងមួយសប្តាហ៍ ទទួលបាន ៥៣១ ០០០ ដុល្លារ។ នេះវាជាការតបស្នង ឆ្លើយតបនឹងការខិតខំប្រឹងប្រែងរបស់ De Bruyne ដោយគេបានជួយក្លឹបឈ្នះពានរង្វាន់ Premier League ដល់ទៅ ៣ លើកក្នុងចន្លោះពេលឈរជើង ៦ ឆ្នាំ។
៧) Cristiano Ronaldo
ការផ្ទេរមកក្លឹបថ្មី Ronaldo បានធ្លាក់ចុះថ្លៃពលកម្ម ១ ទ្វេជា ២ ដោយជាមួយកុងត្រារយៈពេល ២ ឆ្នាំនៅ Man Utd តារាឆ្នើមសញ្ជាតិព័រទុយហ្គាល់ អាចទទួលបានប្រាក់តែ ៥៣១ ០០០ ដុល្លារស្មើនឹងកម្រិត De Bruyne តែប៉ុណ្ណោះ។ ប៉ុន្តែបើសួរថា តើកីឡាករវ័យចំណាស់រូបណា ដែលស៊ីថ្លៃបំផុត? ចម្លើយគឺ បុរសវ័យ ៣៦ ឆ្នាំរូបនេះហើយ។
៦) Kylian Mbappe
បញ្ច្រាសមកវិញពី Ronaldo សម្រាប់ Mbappe គឺជាកីឡាករវ័យក្មេងបំផុត ដែលទទួលបានប្រាក់ពលកម្មខ្ពស់ដាច់គេ ដោយមួយសប្តាហ៍ កីឡាករបារាំងបើកលុយពីក្លឹប PSG ៥៦៦ ០០០ ដុល្លារ។ ប៉ុន្តែបើធៀបនឹងរៀមច្បងឯទៀតនៅក្លឹបមានមូលដ្ឋានក្នុងទីក្រុងប៉ារីស គឺ Mbappe ឈរនៅលេខរៀងទី ៣។
៥) Gareth Bale
សេសសល់សុពលភាពកុងត្រា ១ ឆ្នាំចុងក្រោយ សម្រាប់ Bale ក្នុងនាមជាកីឡាករស៊ីថ្លៃបំផុតនៅក្លឹប Real Madrid។ បុរសសញ្ជាតិវែល ទទួលបានប្រាក់ ៦៩០ ០០០ ដុល្លារ/សប្តាហ៍ ប៉ុន្តែអនាគតនៅពេលបន្ទាប់របស់គេមិនទាន់ច្បាស់ថាបែបណាឡើយ ក្រោមការដឹកនាំជាថ្មីរបស់លោក Carlo Ancelotti។
៤) Antoine Griezmann
ព្រឹកថ្ងៃពុធនេះ កីឡាករបារាំងបានធ្វើឲ្យអ្នកគាំទ្រភ្ញាក់ផ្អើលជាខ្លាំង តាមរយៈការផ្ទេរនៅលក្ខខណ្ឌខ្ចីជើងទៅកាន់ក្លឹប Atletico Madrid។ នេះមានន័យថា At នឹងត្រូវជួយចេញថ្លៃពលកម្មពាក់កណ្តាលជាមួយនឹង Barcelona លើការចាយ ១ សប្ដាហ៍ដល់ទៅ ៧៩៣ ០០០ ដុល្លារ។
៣) Luis Suarez
ដុំថ្មដែល Barcelona បោះបង់ បានមកប្រែក្លាយជាគ្រាប់ពេជ្រដ៏មានតម្លៃនៅក្លឹប Atletico Madrid។ Suarez បានក្លាយជាចំណែកសំខាន់ជួយក្រុមដឹកនាំដោយលោក Diego Simeone លើកពាន La Liga កាលពីរដូវកាលមុន។ ជាមួយគុណភាពនៅកម្រិតកំពូលរបស់កីឡាករអ៊ុយរុយហ្គាយ នាំឲ្យគេអាចទទួលបានថ្លៃពលកម្ម ៧៩៣ ០០០ ដុល្លារ។
២) Neymar
នេះជាកីឡាករទី ២ ទាំងក្នុងបញ្ជី Top 10 និងនៅក្លឹប PSG ហើយ Neymar បានរំកិលមកជំនួសតំណែងរបស់ Ronaldo នាមកីឡាករស៊ីថ្លៃដាច់គេក្នុងលោក។ ខ្សែប្រយុទ្ធសញ្ជាតិប្រេស៊ីល ទទួលបានថ្លៃពលកម្មកប់ពពកដល់ទៅ ៨៣៦ ០០០ ដុល្លារលើកុងត្រាថ្មីដែលត្រូវផុតនៅឆ្នាំ ២០២៥។
១) Lionel Messi
បើបន្តនៅ Barcelona តាមថា Messi ទទួលបានប្រាក់ពលកម្មតែជាង ៣០០ ០០០ ដុល្លារប៉ុណ្ណោះ ព្រោះអីត្រូវកាត់ ៥០ ភាគរយ។ តែយ៉ាងណាការផ្ទេរមក PSG ដោយគ្មានការគិតទុកជាមុនសារនេះ សម្រាប់តារាឆ្នើមអាហ្សង់ទីនអាចកើបលុយចូលហោប៉ៅដល់ទៅ ១ ៣២៥ ០០០ ដុល្លារឯណោះរៀងរាល់សប្ដាហ៍។ នេះនៅមិនទាន់បូកប្រាក់ឧបត្ថម្ភនិងកិច្ចកុងត្រាផ្សេងៗទៀតផង៕
ហាមដាច់ខាតយកអត្ថបទពី CTS Sports ទៅចែកចាយបន្ត ឬផលិតចេញជាវីដេអូណាមួយ!