ក្រោយដំណឹងផ្លូវការនៃការប្រកាសរវាងភាគីទាំងសងខាង Juve-Man Utd សម្រាប់ការផ្ទេរ Cristiano Ronaldo យើងក៏ស្រាប់តែផ្ទុះចេញនៅចចាមអារ៉ាមថ្មីមួយទៀត ពាក់ព័ន្ធនឹងការអាចចែកផ្លូវរបស់ Edinson Cavani ក្រោយលឺថាក្លឹប Barcelona ចាប់អារម្មណ៍នៅថ្ងៃចុងក្រោយមុនបិទទីផ្សារដោះដូរ។
ម៉ោងក្រៅស្រុក គឺកាលបរិច្ឆេទបិទទីផ្សារដោះដូររដូវក្តៅ នឹងត្រូវបិទទ្វារក្រោយម៉ោង ១១ យប់ថ្ងៃទី ៣១ សីហា ដែលអាចហៀរចូលថ្ងៃទី ១ កញ្ញាសម្រាប់ម៉ោងនៅកម្ពុជា។ យ៉ាងណាសម្រាប់អ្នកមានបុណ្យបានមើលឃើញពេលវេលាដែលសេសសល់នេះ ចង់ចរចាយកម្ចាស់អាវលេខ ៧ របស់ United នោះគឺខ្សែប្រយុទ្ធអ៊ុយរុយហ្គាយ Cavani។
សុពលភាពកុងត្រារបស់ខ្សែប្រយុទ្ធវ័យ ៣៤ ឆ្នាំត្រូវផុតនៅចុងខែមិថុនា ឆ្នាំក្រោយ តែគេមិនច្បាស់នោះទេថាសាមីខ្លួននឹងសម្រេចចិត្តបែបណា ព្រោះគេខ្លួនឯងក៏ដឹងច្បាស់ដែរថាការពាក់អាវលេខ ៧ សារនេះ នឹងទទួលរងសម្ពាធ ព្រោះអីម្ចាស់គេផ្ទាល់បានត្រលប់មកវិញហើយ ណាមួយតំណែងលើទីលានរបស់គេក៏ប្រហែលជានឹងខ្សត់ជាងមុនផងដែរ។
យើងមិនច្បាស់ថា Cavani នឹងសម្រេចចិត្តបែបណាឡើយ តែបើ Barcelona ចង់បានពេលនេះ ក៏ត្រូវចាយលុយល្បាក់ ១០ លានអឺរ៉ូអីដែរ ទើប United ព្រមពិចារណាលើការលក់គេចេញ។ រំឭកស្ថិតិបន្តិច Cavani បង្ហាញខ្លួន ៤០ ប្រកួត រកបាន ១៧ គ្រាប់និងAssist ៦ លើករាប់បានជាស្ថិតិល្អគួរសមសម្រាប់ក្រុមអង់គ្លេស៕
ប្រភព៖ Football-Espana