Chelsea ​ពន្យល់ ​ពី​ហេតុផល​ដែល​ពួកគេ ​មិន​អាច​យក Mbappe ​បាន​កាល​ឆ្នាំ​២០១២

ក្រុម Chelsea ​សឹង​តែ​អាច​ចុះ​កុងត្រា​យក​ខ្សែ​ប្រយុទ្ធ Kylian Mbappe ​បាន​ទៅ​ហើយ​កាល​ពី​ឆ្នាំ​២០១២​កន្លង​ទៅ ប៉ុន្តែ​បែរ​ជា​ភ្លាត់​វិញ ក្រោយ​ពី​ម្ដាយ​របស់​កីឡាករ​រូប​នេះ មិន​នាំ​កូន​ទៅ​ធ្វើ​តេស្ដ​លើក​ទី​២។

Daniel Boga ​ជា​អតីត​អ្នក​រើស​ថ្នាល​យុវជន​របស់​ក្រុម Chelsea ​។ លោក​បាន​រំលឹក​អតីត​កាល​ថា Kylian Mbappe ​បាន​មក​ធ្វើ​តេស្ដ​នៅ​ក្រុម​របស់​លោក​ម្ដង​មក​ហើយ ប៉ុន្តែ​មិន​ទាន់​ជាប់។ គ្រា​នោះ ​លោក​បាន​ហៅ​រូបគេ​មក​ធ្វើ​តេស្ដ​ជា​លើក​ទី​២ ​ប៉ុន្តែ​ម្ដាយ​របស់​ខ្សែ​ប្រយុទ្ធ​បារាំង​រូប​នេះ ​បាន​បដិសេធ​មិន​ព្រម​នាំ​កូន​មក​ជា​លើក​ទី​២​ឡើយ។ ដោយសារ​តែ​ដូច្នេះ​ហើយ ទើប​បាន​ជា​មិន​អាច​មាន​ការ​ចុះ​កុងត្រា​បាន​នៅ​គ្រា​នោះ។

លោក Boga ​បាន​និយាយ​ទៀត​ថា ​ពេល​ហៅ​មក​ធ្វើ​តេស្ដ​ជា​លើក​ទី​២​នោះ ​ម្ដាយ​របស់ Mbappe ​បាន​ប្រាប់​មក​លោក​វិញ​ថា៖ “ក្លឹប​គួរ​តែ​ចុះ​កុងត្រា​យក​ពេល​នេះ ​មិន​មែន​លើក​ទី​២​ទេ ហើយ​ពួកគេ​នឹង​បាត់​បង់​ឱកាស ​ឬ​ប្រសិន​បើ​ចង់​បាន​កូន​ខ្ញុំ​ទៀត ​ត្រូវ​រង់ចាំ​៥​ឆ្នាំ​ទៀត ​និង​តម្លៃ​ខ្លួន​វិញ​អាច​ដល់​៥០​លាន​អឺរ៉ូ”។ បុរស​រូប​នេះ ​បន្ថែម​ទៀត​ថា គ្រា​នោះ មូលហេតុ​ដែល​ក្លឹប Chelsea ​មិន​ព្រម​យក ព្រោះ​ពួកគេ​មើល​ឃើញ​ថា Mbappe ​មក​ធ្វើ​តេស្ដ​លើក​ដំបូង មិន​បាន​ខំ​ហាត់​ឡើយ។

ដោយ​ឡែក ​បើ​និយាយ​ពី​បច្ចុប្បន្ន​នេះ​វិញ កីឡាករ​វ័យ​១៩​ឆ្នាំ​ខាង​លើ​កំពុង​ល្បី​ឈ្មោះ​ខ្លាំង​មែនទែន ​ខណៈ​ដែល​តម្លៃ​ខ្លួន​វិញ ​ក្លឹប PSG ​ទិញ​ពី Monaco ​មក ​ជិត​២០០​លាន​អឺរ៉ូ​ឯ​ណោះ។ អ្វី​ដែល​ពិសេស​ទៀត​នោះ រូបគេ​ទើប​តែ​ជួយ​បារាំង​លើ​កពាន World Cup 2018 ​និង​ឈ្នះ​ពាន​កីឡាករ​ក្មេង​ជាង​គេ​ល្អ​បំផុត​នៅ​ពាន​រង្វាន់​នេះ​ផង​ដែរ៕ប្រភពDailyMail

ភ្ជាប់ទំនាក់ទំនងជាមួយ CTS SPORT