Neymar បានចោទអាជ្ញាកណ្ដាលថាមិនផ្ដល់ការគោរព ឱ្យតម្លៃមកលើខ្លួន ក្នុងការប្រកួតទល់ក្រុមអែលសាវ៉ាឌ័រកាលពីម្សិលមិញនេះ។
ប្រធានក្រុមជម្រើសជាតិប្រេស៊ីល ទទួលបានកាតលឿង១ក្នុងការប្រកួតដែលឈ្នះក្រុមអែលសាវ៉ាឌ័រ ក្នុងលទ្ធផល ៥-០ កន្លងទៅនេះ នាប្រកួតមិត្តភាពអន្តរជាតិ។ ក្រុមឈ្នះច្រើនយ៉ាងនេះមែន ប៉ុន្តែខ្សែប្រយុទ្ធបង្ហាញអារម្មណ៍មិនពេញចិត្តចំពោះអាជ្ញាកណ្ដាលឡើយ ។ រូបគេបានចោទលោក Jair Marrufo ថាជាមនុស្សមិនផ្ដល់ការគោរពដល់កីឡាករ ក្រោយពីចាយកាតលឿងមកលើរូបគេ ពេលដួលនៅប្រអប់គ្រោះថ្នាក់។
ខ្សែប្រយុទ្ធលេងឱ្យក្រុម PSG បានបន្ថែមទៀតថាខ្លួនមិនមែនធ្វើពុតជាដួលឡើយនៅគ្រានោះ ដោយវាពិតជាមានការប៉ះទង្គិចគ្នាមែន។ ការដួលនេះ បើអាជ្ញាកណ្ដាលមិនផ្ដល់កំហុសទៅខាងក្រុមអែលសាវ៉ាឌ័រទេ ក៏មិនត្រូវផ្ដល់កាតលឿងមកលើរូបគេដែរ។ ត្បិតអីការដួលនេះ គឺមានការប៉ះទង្គិចគ្នាមែន ប្រសិនបើគ្រាន់តែអិចឹងបានកាតលឿងដែរនោះ វាហាក់ដូចជាមិនផ្ដល់តម្លៃដល់កីឡាករឡើយ។
Neymar បានបញ្ជាក់ថាការបានកាតលឿងនេះ ធ្វើឱ្យខ្លួនលេងគ្មានកម្លាំងចិត្តសោះ ព្រោះជាប់កាត១រួចស្រេច។ វាបានផ្ដល់ភាពប៉ះពាល់ដល់ក្រុមប្រេស៊ីលទាំងមូល មិនមែនត្រឹមតែរូបគេឡើយ នៅពេលអាជ្ញាកណ្ដាលកាត់សេចក្ដីមិនយុត្តិធម៌បែបនេះ។
រំលឹកទៅវិញថា Neymar ទទួលបានការរិះគន់ច្រើនមែនទែន តាំងពីលេងនៅ World Cup 2018 មក រឿងដែលរូបគេធ្វើពុតជាដួលនេះ៕ប្រភព៖ ESPN