តាមការកំណត់ពីដំបូងឡើយ អ្នកប្រដាល់ហ្វីលីពីន ម៉ានី ប៉ាគីអៅ ត្រូវជួប Errol Spence តែដោយសារអ្នកប្រដាល់អាមេរិកមានបញ្ហារបួសភ្នែក ត្រូវទាមទារការវះកាត់បន្ទាន់ ក៏នាំឲ្យមានការជំនួសដោយអ្នកប្រដាល់គុយបា Yordenis Ugas នៅកាលបរិច្ឆេទនាថ្ងៃអាទិត្យទី ២១ សីហាដដែលវិញ។
មុនឈានដល់ការប្រកួត ស្តេចប្រដាល់នៅតំបន់អាស៊ី ប៉ាគីអៅ ក៏បានបង្ហាញការយល់ឃើញនូវរឿងរ៉ាវជាច្រើនពាក់ព័ន្ធនឹងអាជីពរបស់ខ្លួន ក៏ដូចជាការប្រកួតសារនេះ។ បុរសវ័យ ៤២ ឆ្នាំប្រាប់ ES News ដូច្នោះថា៖ “ខ្ញុំបានហ្វឹកហាត់និងលុតដំខ្លួនឯងបានយ៉ាងល្អ ដើម្បីប្រាកដថាត្រៀមខ្លួនរួចរាល់សម្រាប់ការប្រកួតសារនេះ ហើយយើងមិនអាចមើលស្រាលគូប្រជែងបាននោះទេ ព្រោះគេក៏ចេះដាល់ចូលដូចគ្នា ដូច្នេះត្រូវប្រាកដ ១០០ ភាគរយពីស្ថានភាពរាងកាយ ផ្លូវចិត្តនិងស្មារតីរបស់យើង”។
ចំណែកឯ Ugas ក៏និយាយដែរថា៖ “ខ្ញុំច្បាស់ ១០០ ភាគរយ ប៉ាគីអៅមិនអាចវ៉ៃខ្ញុំដល់សន្លប់នោះទេ ព្រោះខ្ញុំបានខិតខំនិងរៀបចំខ្លួនរួចរាល់អស់ហើយ ណាមួយបទពិសោធន៍ ៦ ឆ្នាំមកនេះ ខ្ញុំបានឆ្លងកាត់មកដល់ចំណុចដ៏ខ្ពស់មួយ ដែលជឿថា ម៉ានី ប៉ាគីអៅនឹងមិនអាចផ្តួលខ្ញុំបានឡើយ”។
បញ្ជាក់បន្តិច Ugas ជាអ្នកប្រដាល់មានវ័យ ៣៥ ឆ្នាំ ដែលប្រវត្តិប្រកួត ៣០ លើក ឈ្នះ ២៦ ចាញ់ ៤ និងធ្លាប់ផ្តួលគូប្រកួតឲ្យសន្លប់ ១២ លើក។ គេធ្លាប់ជាម្ចាស់មេដាយមាសប្រភេទទម្ងន់ Lightweight នៅព្រឹត្តិការណ៍ធំៗ ៣ ផ្សេងគ្នា ដូចជានៅ World Championships, Central American and Caribbean Games និង Pan American Games។ ការប្រកួតការពារខ្សែក្រវាត់ WBA សារនេះ គឺជាលើកដំបូងសម្រាប់ Ugas ក្នុងការជួបអ្នកប្រដាល់មកពីតំបន់អាស៊ី។
បន្តមកដល់ការលើកឡើងមួយផ្សេងទៀតរបស់អ្នកប្រដាល់ហ្វីលីពីន ពាក់ព័ន្ធនឹងគូប្រជែងដែលលោកយល់ថា ពិបាកនឹងតតាំងបំផុតនៅអាជីពលើសង្វៀន តែគ្មានឈ្មោះ Floyd Mayweather ដ្បិតបើអ្នកប្រដាល់អាមេរិកធ្លាប់បានយកឈ្នះមកលើខ្លួនកាលពីឆ្នាំ ២០១៥ ផ្ទុយទៅវិញបែរជាចុចឈ្មោះអ្នកប្រដាល់ម៉ិកស៊ីកូទាំង ៣ រូប។
អ្នកប្រដាល់ជាប់រហស្សនាម Pac-Man និយាយ៖ “នោះគឺ [Marco Antonio] Barrera, [Erik] Morales និង [Juan Manuel] Marquez ដោយខ្ញុំក៏ធ្លាប់សុំ Promotor របស់ខ្ញុំឲ្យរៀបចំការប្រកួតទល់ Marquez មួយសារទៀតដែរ តែវាមិនអាចកើតឡើងទៅបាន ដូច្នេះហើយយើងត្រូវតែដឹងថា ក្នុងវិស័យប្រដាល់អ្នកមិនអាចសង្ឃឹមថាឈ្នះរហូតបានឡើយ”។
បញ្ជាក់ឲ្យដឹងដែរថា អ្នកប្រដាល់កម្ពស់ ១,៦៨ ម៉ែត្ររូបនេះ ធ្លាប់មានប្រវត្តិប្រកួត ៧១ លើក ឈ្នះ ៦២ លើក ស្មើ ២ លើក និងចាញ់ ៧ លើក ហើយធ្លាប់ផ្តួលគូប្រកួតឲ្យសន្លប់ ៣៩ លើក។ យ៉ាងណាទល់អ្នកប្រដាល់ទាំង ៣ រូបខាងលើ ប៉ាគីអៅ ទទួលបានលទ្ធផលល្អច្រើន ជាក់ស្តែងដូចទល់ Marco Antonio គឺឈ្នះទាំង ២ លើក ទល់ Erik Morales ស្មើ ១ ឈ្នះ ១ ហើយទល់ Manuel Marquez ឈ្នះ ១ ស្មើ ១ និងចាញ់ ១។
ចុងក្រោយពាក់ព័ន្ធនឹងការដែលអាចប៉ះគ្នាម្តងទៀត ជាមួយ Floyd Mayweather បើតាមការលើកឡើងពីគ្រូបង្វឹករបស់ Pacquiao គឺលោក Freddie Roach បាននិយាយប្រាប់ Sky Sports ថា៖ “យើងពិតជាចង់មានការប្រកួតទល់ Mayweather ជាថ្មីម្តងទៀត តែសារនេះបើសួរថាជាប្រកួតមិត្តភាព? គឺ យើងមិនចង់បានបែបហ្នឹងទេ ព្រោះអីអ្នកគាំទ្រដឹងច្បាស់ហើយពីសមត្ថភាពពិតប្រាកដរបស់ Pacquiao”។
សាមីខ្លួន Pacquiao ផ្ទាល់ក៏ធ្លាប់និយាយដែរថា ពេលនេះខ្លួននៅបន្តឈរជើង ហើយបើទោះបី Floyd ចូលនិវត្តហើយក៏ដោយ ក៏មិនអីដែរ គេអាចត្រលប់មកវិញបាន ព្រោះអីខ្លួនស្វាគមន៍សម្រាប់ការប្រកួតសងសឹកមួយនោះជានិច្ច៕
ប្រភព៖ បរទេស