ទីផ្សារដោះដូររដូវក្តៅនឹងបិទទ្វារនៅថ្ងៃទី ៣១ សីហា ដែលមានន័យថាបណ្តាក្លឹបទាំងអស់នៅតំបន់អឺរ៉ុប អាចសេសសល់ពេលវេលាចរចាលើគោលដៅកីឡាករដែលពួកគេចង់បាន ត្រឹមតែរយៈពេល ៣ សប្តាហ៍ទៀតប៉ុណ្ណោះ។
យ៉ាងណានៅដើមសប្តាហ៍ថ្មីនេះ CTS Sports ក៏ទទួលបានដំណឹងក្តៅគគុកជាច្រើន ចង់មកចែកជូនបងប្អូនអ្នកគាំទ្រឲ្យបានដឹង អំពីការផ្ទេរធំៗ ៣ ត្រៀមនឹងក្លាយជាការពិត ហើយខ្លះអាចប្រកាសផ្លូវការនៅចន្លោះពេល ៧២ ម៉ោងបន្ទាប់។
៣) ការផ្ទេរ Romelu Lukaku
បន្ទាប់ពីជួយឲ្យ Inter Milan លើកពាន Serie A កាលពីរដូវកាលមុន ខ្សែប្រយុទ្ធបែលហ្សិក Lukaku ហាក់ទទួលបានការចាប់អារម្មណ៍ខ្លាំងពីសំណាក់ក្លឹបធំៗនៅតំបន់អឺរ៉ុប ពាក់ព័ន្ធនឹងសមត្ថភាពនៃការបញ្ចប់ ទី។
ជាពិសេសគឺក្លឹបតោខៀវ Chelsea ដែលបានតាមទិញ Lukaku ច្រើនសប្តាហ៍មកហើយ ដោយគិតមកទល់ពេលនេះ យើងអាចនិយាយថា ៩៩ ភាគរយ វានឹងក្លាយជាការពិត។ លឺថាកីឡាករវ័យ ២៩ ឆ្នាំ បានហោះមកទីក្រុងឡុង ឈានដល់ដំណាក់កាលពិនិត្យសុខភាពហើយ ពោលនឹងទម្លាក់ចុងប៊ិចបង្ហាញខ្លួនជាផ្លូវការ នៅចន្លោះថ្ងៃអង្គារ ឬថ្ងៃពុធខាងមុខនេះ។
បើតាមសារព័ត៌មាន Standard Sport បានចុះផ្សាយ Lukaku នឹងទទួលបានប្រាក់ពលកម្ម ២១២ ០០០ ផោន/សប្តាហ៍ លើសុពលភាពកុងត្រា ៥ ឆ្នាំនៅក្លឹបម្ចាស់ដី Stamford Bridge។ ចំពោះតម្លៃផ្ទេរ ដែល Chelsea បានផ្តល់ឲ្យក្លឹបអាណាព្យាបាល Inter Milan គឺ ៩៧,៥ លានផោន។
២) ការផ្ទេរ Lionel Messi
Messi ក៏បានសារភាពហើយដែរថាការផ្ទេរទៅក្លឹប PSG ពិតជាអាចកើតឡើងទៅបាន ព្រោះអីក្រោយព័ត៌មានផ្លូវការថាខ្លួនចែកផ្លូវពី Barcelona ប្រកាសចេញឡើង ក៏មានក្លឹបជាច្រើនទាក់ទងមកកាន់លោក។
យ៉ាងណាគេជឿថាតារាឆ្នើមវ័យ ៣៤ ឆ្នាំ នឹងជ្រើសរើសការផ្ទេរទៅ PSG ព្រោះវាជាក្លឹបដ៏សក្តិសមបំផុត។ ដ្បិតនៅ Man City មានគ្រូចាស់ Pep Guardiola ដែលអាចចុះសម្រុងគ្នា តែសំខាន់ក្លឹបនៅអង់គ្លេសហាក់គ្មានលទ្ធភាពបន្តបង់ថ្លៃពលកម្មឲ្យ Messi ម្នាក់ទៀតឡើយ ក្រោយពីទើបតែយកបាន Jack Grealish។
ការផ្ទេរសម្រេចទៅ PSG សារនេះ លឺថាក្លឹបសេដ្ឋីបារាំងថែមទាំងមានជួលអគារ Eiffel Tower ដើម្បីបាញ់ភ្លើងនិងបង្ហាញឈ្មោះ Messi ជាការស្វាគមន៍មកកាន់ទីក្រុងប៉ារីសទៀតផង។ តាមចចាមអារ៉ាម ក្លឹបបារាំងហ៊ានឲ្យថ្លៃពលកម្ម Messi ប្រមាណ ៤០ លានអឺរ៉ូ/ឆ្នាំ ដែលទំហំនេះខ្ពស់ជាងថ្លៃពលកម្ម Neymar បានជាង ៣៦ លានអឺរ៉ូប៉ុណ្ណោះ។
១) ការផ្ទេរ Harry Kane
តាមពិតទៅសាមីខ្លួន Harry Kane ផ្ទាល់គេបានព្រមព្រៀងនៅលក្ខខណ្ឌបុគ្គលជាមួយក្លឹប Man City រួចទៅហើយ នៅឡើយតែតម្លៃចរចាដែល City ត្រូវផ្តល់ឲ្យក្លឹបអាណាព្យាបាល Tottenham Hotspur មួយតង់ទៀតប៉ុណ្ណោះ។
វាទាស់ខុសគ្នាត្រង់លុយជាង ៤០ លានផោន ដែលមេធំ Daniel Levy ទារតម្លៃខ្លួន Kane ប្រមាណ ១៦០ លានផោន តែ City ថាព្រមឲ្យត្រឹម ១២០ លានផោន។ យ៉ាងណាចុងក្រោយនេះ បន្ទាប់ពី Kane គេចវេសមិនចង់ទៅហ្វឹកហាត់ ដើម្បីរំអុកឲ្យក្លឹបចង់លក់គេចេញ ក៏នាំឲ្យក្លឹប Spurs អស់ការអត់ធ្មត់ ហើយក៏ព្រមបន្ទាបតម្លៃ Kane មកត្រឹម ១២០ លានផោន បូកនឹងកិច្ចព្រមព្រៀងផ្សេងៗ ២០ លានផោន ដែលវាទាបជាងមុន និងល្មមដែល City អាចលៃលកបាន។
ជាក់ស្តែងវាគួរតែដល់ពេលហើយ ដែលបុរសវ័យ ២៨ ឆ្នាំ គួររើបម្រាស់ផ្លាស់ទៅទ្រនំថ្មី ដើម្បីចាប់យកឱកាសឈ្នះពានរង្វាន់ ដ្បិតអីចាយពេលជាង ១០ ឆ្នាំនៅ Spurs មានឈ្មោះជាម៉ាស៊ីនបញ្ចប់ទីដ៏មុតស្រួច រកបានជាង ២០០ គ្រាប់ដែរ តែមិនទាន់ស្គាល់រសជាតិលើកពានសូម្បីម្តង។ ប៉ុន្មានថ្ងៃមុនក៏មានគេប្រៀបធៀប Kane ទៅនឹងយុវជនរបស់ Leicester City ប៉ុន្មានរូបផងដែរ ដែលថាពួកគេមកលេងត្រឹម ១ ប្រកួតក៏ស្គាល់រសជាតិពាន Community Shield មួយបាត់ទៅហើយ ចម្លែកអីតែ Kane ចាយពេលច្រើនជាង ៣០០ ប្រកួតទៅហើយ បែរជាមិនអាចធ្វើបាន៕
