នាមជាវីរបុរសមួយរូបនៅក្លឹប Barcelona សម្រាប់ Lionel Messi ក្រៅពីដើរតួជាកីឡាករឆ្នើមនៅក្នុងក្រុម ទៀតសោតលោកក៏មានឥទ្ធិពលក្នុងការផ្តល់យោបល់ទៅកាន់ថ្នាក់លើផងដែរ ថាគួរយកកីឡាកររូបណា ដកចេញកីឡាកររូបណា ដើម្បីឲ្យការលេងរបស់ក្រុមទាំងមូលមានភាពល្អប្រសើរ។
បើតាមរបាយការណ៍ធ្លាប់ចុះផ្សាយជាបន្តបន្ទាប់ច្រើនឆ្នាំមកនេះ CTS Sports សូមធ្វើការសរុបឈ្មោះកីឡាករ ៥ រូប ដែលធ្លាប់មានដំណឹងថា M10 បានទទូចឲ្យក្លឹប Barcelona ចរចានាំយកមក Camp Nou ហើយគិតមកទល់ពេលនេះ មាន ១ រូបដែលបានសម្រេចដូចការចង់បានរបស់កីឡាករអាហ្សង់ទីន៖
៥) Lautaro Martinez
ក្រោយការចាកចេញរបស់ Luis Suarez ដែលជាដៃគូកាន់ឆ្នាំ សម្រាប់ Messi ក៏បានគិតដូចគ្នា ពីផែនការណ៍ថ្មីដែលក្លឹបគួរតែធ្វើ សម្រាប់រកអ្នកជំនួស ហើយ Messi បានចុចឈ្មោះ Lautaro Martinez ជាជម្រើសទីមួយ។
កាលនោះអតីតប្រធានក្លឹប Racings លោក Adrian Fernandez ធ្លាប់បានទម្លាយថា៖ “Messi បានតេទៅ Lautaro ហើយចង់ឲ្យគេមករួមក្លឹបជាមួយ ឲ្យបានលឿនបំផុត ដោយការចរចាកៀកនឹងសម្រេចទៅហើយកាលនោះ ណាមួយ Lautaro គេនឹងក្លាយជាអ្នកជំនួស Suarez ដ៏សក្ដិសមបំផុត”។ យ៉ាងណាគ្រប់យ៉ាងត្រូវបានរាំងស្ទះ ក្រោយពីក្លឹប Inter Milan ដាក់តម្លៃខ្សែប្រយុទ្ធវ័យក្មេងរូបនេះខ្ពស់ពេក ហើយសព្វថ្ងៃគេនៅបន្តឈរជើងជាមួយក្លឹបអ៊ីតាលីដដែល។
៤) Neymar
ជាការពិត Messi តែងតែរក្សាទំនាក់ទំនងល្អជាមួយ Neymar ដូចដែលខ្លួនមានជាមួយ Suarez អ៊ីចឹងដែរ ហើយរឿងភាគ៖ “ជីវិត Neymar” ដូចប្រិយមិត្តបានដឹងហើយ ក៏ទើបតែបញ្ចប់កាលពីពេលកន្លងទៅ ក្រោយគេចុះហត្ថលេខាបន្តកុងត្រាថ្មីនៅ PSG។
កាលនោះ Barcelona តាមអូសទាញចង់បានកីឡាករប្រេស៊ីលឲ្យត្រលប់មក Camp Nou ម្តងហើយម្តងទៀត ជាពិសេសផ្ទុះខ្លាំងក្រោយពេល Messi និយាយនៅឆ្នាំ ២០២០ ថា៖ “ខ្ញុំលើកឡើងច្រើនដងហើយ Neymar តែងតែជាកីឡាករល្អបំផុតមួយរូប ហើយខ្ញុំពិតជាសប្បាយចិត្តប្រសិនគេត្រលប់មកក្លឹប Barcelona វិញ”។
៣) Angel di Maria
Di Maria ជាមិត្តរួមជម្រើសជាតិរបស់ Messi ហើយក៏ទើបតែសម្រេចបាននៅពានរង្វាន់ Copa America 2021 កាលពីពេលកន្លងទៅ។ យ៉ាងណាត្រលប់ទៅអតីតកាល កាល Di Maria គេចេញពី Real Madrid ថ្មីថ្មោង ពេលនោះ Messi មានដំណឹងថា រំអុកឲ្យ Barcelona តាមចរចានាំយកខ្សែប្រយុទ្ធស្លាបខាងលើ តែចុងក្រោយត្រូវបាន Man Utd ជះលុយធំយកគេទៅ Old Trafford មុនផ្ទេរទៅ PSG និងបន្តឈរជើងទល់សព្វថ្ងៃ។
សូម្បីតែពេលចុងក្រោយនេះ អ្នកមានបុណ្យក៏ចង់បាន Di Maria ដែរ ដោយសាមីខ្លួនប្រាប់ចំៗថា៖ “ខ្ញុំពិតជារីករាយនឹងការនៅទីក្រុងប៉ារីស តែខាង Barca ពួកគេក៏បានព្យាយាមចង់បានខ្ញុំ ហើយក្លឹបទាំងសងខាងបានពិភាក្សាគ្នា តែ PSG មិនចង់លក់ខ្ញុំចេញនោះទេ”។
២) Sergio Aguero
តាមថា Messi បានរំអុកឲ្យ Barcelona ងាកទៅមើល Aguero តាំងតែពីលក់ Suarez នៅឆ្នាំទៅ ២០២០ តែគ្រប់យ៉ាងទើបសម្រេចបាននៅរដូវក្តៅនេះ ក្រោយកីឡាកររបស់ Man City ផុតកុងត្រា ហើយសម្រេចផ្ទេរមក Camp Nou នៅលក្ខខណ្ឌឥតតម្លៃខ្លួន។
ប្រសិនណា M10 ព្រមបន្តកុងត្រាថ្មី ឈរជើងនៅ Barcelona តទៅទៀត នោះវានឹងកាន់តែល្អមើល ព្រោះ Messi នឹងបានដៃគូថ្មី ជាមិត្តកាន់ឆ្នាំនៅជម្រើសជាតិ ហើយក៏មានបទពិសោធន៍លេងរួមគ្នាច្រើនសារហើយដែរ។
១) Joshua Kimmich
ក្លឹបដែលធ្លាប់បំបាក់ Barcelona នៅលទ្ធផល ៨-២ គឺ Bayern Munich ក៏ជាគោលដៅដែល Messi ធ្លាប់ចង់បានកីឡាករពីទីនោះផងដែរ។
នោះគឺខ្សែបម្រើ Joshua Kimmich ដែលស្ថិតក្នុងផែនការណ៍ដែល M10 ចង់ឲ្យក្លឹបនាំយក នៅចំណោមកីឡាករ ២ រូបផ្សេងទៀតមាន Neymar និង Milan Skriniar។ យ៉ាងណាអ្នកទាំងបី សុទ្ធតែមិនអាចសម្រេចការផ្ទេរមក Camp Nou ហើយស្ថានភាពរបស់ Messi ផ្ទាល់ពេលនេះ ក៏មិនទាន់ច្បាស់លាស់ទៀតថា នឹងបន្តនៅក្លឹបកាន់ឆ្នាំរបស់ខ្លួនទៀតឬយ៉ាងណា ស្របពេលដែលកាលបរិច្ឆេទបើករដូវកាលថ្មីនៅ La Liga សល់តែជាង ១ សប្ដាហ៍ទៀតប៉ុណ្ណោះ៕
ប្រភព៖ Sportskeeda