ការប្រកួតនៅលីគកំពូលអឺរ៉ុបបានខកខានអស់រយៈពេលជាង ២ ខែមកហើយ បន្ទាប់ពីរដូវកាលចាស់ ២០២០/២១ បានឈានដល់ទីបញ្ចប់ ហើយកីឡាករខ្លះក៏មានភារកិច្ចទៅជួយជម្រើសជាតិ និងខ្លះសម្រាកនៅវិស្សមកាលរយៈពេលខ្លី។
យ៉ាងណារដូវកាលថ្មី ២០២១/២២ បានត្រលប់មកវិញហើយ នៅខែសីហា ពោលចាប់ផ្តើមពីចុងសប្តាហ៍នេះតទៅ។ យើងបង្ហាញឲ្យអ្នកបានដឹង ពីកាលបរិច្ឆេទបើករដូវកាលនៃលីគកំពូលទាំង ៥៖
ក្របខ័ណ្ឌ Ligue 1 របស់បារាំង បើកនៅថ្ងៃទី ៦ សីហា ហើយបិទទៅវិញនៅថ្ងៃទី ២១ ឧសភា ឆ្នាំ ២០២២
ក្របខ័ណ្ឌ Bundesliga របស់អាល្លឺម៉ង់ បើកនៅថ្ងៃទី ១៣ សីហា ហើយបិទទៅវិញនៅថ្ងៃទី ១៤ ឧសភា ឆ្នាំ ២០២២
ក្របខ័ណ្ឌ Premier League របស់អង់គ្លេស, La Liga របស់អេស្ប៉ាញ បើកនៅថ្ងៃទី ១៣ សីហា ហើយបិទទៅវិញនៅថ្ងៃទី ២២ ឧសភា ឆ្នាំ ២០២២
ក្របខ័ណ្ឌ Serie A របស់អ៊ីតាលី បើកនៅថ្ងៃទី ២០ សីហា ហើយបិទទៅវិញនៅថ្ងៃ ទី ២២ ឧសភា ឆ្នាំ ២០២២
ការប្រកួតដែលមានផ្សាយផ្ទាល់លើទំព័រ CTS Sports នឹងមានការក្លែមសម្ដីពីអ្នកអធិប្បាយពូកែវោរហាស័ព្ទ Admin ជីវ័ន្ត, Admin រ៉ាយុទ្ធ, Admin បូរិន និង Admin ពូនឿន។ យើងសម្រង់កាលបរិច្ឆេទជំនួបពិសេស ១០ គូដូចតទៅ៖
Troyes ប៉ះ PSG វេលាម៉ោង ០២:០០ នាទីទាបភ្លឺ ថ្ងៃទី ៨ សីហា
Man Utd ប៉ះ Leeds វេលាម៉ោង ០៦:៣០ នាទីល្ងាច ថ្ងៃទី ១៤ សីហា
Chelsea ប៉ះ Crystal Palace វេលាម៉ោង ៩:០០ នាទីយប់ ថ្ងៃទី ១៤ សីហា
Dortmund ប៉ះ Frankfurt វេលាម៉ោង ១១:៣០ នាទីយប់ ថ្ងៃទី ១៤ សីហា
Monchengladbach ប៉ះ Bayern Munich វេលាម៉ោង ១:៣០ នាទីទាបភ្លឺ ថ្ងៃទី ១៤ សីហា
Alaves ប៉ះ Real Madrid វេលាម៉ោង ០៣:០០ នាទីទាបភ្លឺ ថ្ងៃទី ១៥ សីហា
Celta Vigo ប៉ះ Atletico Madrid វេលាម៉ោង ១០:៣០ នាទីយប់ ថ្ងៃទី ១៥ សីហា
Tottenham ប៉ះ Man City វេលាម៉ោង ១០:៣០ នាទីយប់ ថ្ងៃទី ១៥ សីហា
Barcelona ប៉ះ Real Sociedad វេលាម៉ោង ០១:០០ នាទីទាបភ្លឺ ថ្ងៃទី ១៦ សីហា
Inter Milan ប៉ះ Genoa វេលាម៉ោង ១១:៣០ នាទីយប់ថ្ងៃទី ២១ សីហា
Udinese ប៉ះ Juventus វេលាម៉ោង ១១:៣០ នាទីយប់ ថ្ងៃទី ២២ សីហា
រឿងរ៉ាវគួរឲ្យចាប់អារម្មណ៍ និងជាអ្វីដែលអ្នកគាំទ្រទន្ទឹងរង់ចាំចង់ឃើញបំផុតនោះ គឺមានដូចជា៖
នៅលីគកំពូលបារាំង Ligue 1 ដែលក្លឹប PSG យកបានចំណូលថ្មីសុទ្ធតែខ្លឹម ដូចជា Achraf Hakimi, Sergio Ramos និង Georginio Wijnaldum ថាពួកគេអាចបង្កើតផ្លែផ្កាជោគជ័យកម្រិតណាសម្រាប់ក្លឹប ស្របពេលដែលមួយរយៈចុងក្រោយក្លឹបសេដ្ឋីបារាំងហាក់រាងធ្លាក់ជើង នាំឲ្យរបូតទាំងពាន Ligue 1 និង Trophee des Champions ឲ្យទៅក្លឹប Lille។
ដោយឡែកនៅលីគកំពូលអង់គ្លេស Premier League យើងចាប់អារម្មណ៍បំផុតគឺក្លឹប Man Utd ដែលពួកគេយកបាន Jadon Sancho នៅតំបន់ប្រយុទ្ធស្លាប និង Raphael Varane នៅតំបន់ការពារកណ្តាល អ៊ីចឹងចាំមើលថា ការលេងនៅជុំដំបូងទល់ Leeds United នឹងមានការប្រែប្រួលបែបណាខ្លះ។
រីឯនៅ Bundesliga ក្លឹប Bayern Munich គ្រប់គ្នាកំពុងចង់ដឹងជាខ្លាំង ថាគ្រូវ័យក្មេង Julian Nagelsmann អាចបន្តដឹកនាំឲ្យក្លឹបការពារជើងឯកមួយនេះ ទទួលបានជោគជ័យដូចមុន ឬមានការខុសប្លែកបែបណា ធៀបនឹងអ្នកចាត់ការចាស់លោក Hansi Flick។
ទៅមើល Serie A នៅឯអ៊ីតាលី Inter Milan បានបាត់បង់បុគ្គលសំខាន់គឺលោក Antonio Conte ស្របពេលដែល Juventus យកបានគ្រូចាស់លោក Massimiliano Allegri ដែលពូកែខាងរៀបប្រព័ន្ធវាយសម្រុក ដូច្នេះគ្រប់យ៉ាងជឿថានឹងមិនដូចរដូវកាលចាស់ឡើយ។
ចុងក្រោយគឺ La Liga ក្លឹប ២ ដែលគេចាប់អារម្មណ៍បំផុតគឺ Real Madrid និង Barcelona ដែលខាងអធិរាជស បានបាត់បង់តារាឆ្នើម Ramos និង Varane ដែលនេះ នឹងនាំប្រព័ន្ធលេងរបស់ក្រុមទាំងមូលត្រូវគាស់ឡើងរៀបចំថ្មីទាំងស្រុង រីឯអ្នកមានបុណ្យ យកបាន Sergio Aguero, Memphis Depay និង Eric Garcia ដែលបន្ថែមគុណភាពថ្មីទាំងដល់តំបន់ប្រយុទ្ធ និងការពារ តែបែរជាត្រូវរបូតកីឡាករកាន់ឆ្នាំ Lionel Messi ដូច្នេះពួកគេនឹងអាចស្តារមុខមាត់ឡើងវិញបានឬយ៉ាងណា៕