ចាប់ពីរដូវកាល ២០២១/២២ ខាងមុខតទៅ អ្នកគាំទ្រក្លឹបបិសាចក្រហម Man Utd នឹងទទួលបានទស្សនីយភាពថ្មីនៅតំបន់ប្រយុទ្ធស្លាប នោះគឺវត្តមានរបស់ Jadon Sancho ដែលជាអតីតម្ចាស់អាវលេខ ៧ របស់ក្លឹប Borussia Dortmund។
ក៏ជឿថាអ្នកគាំទ្រជាច្រើន បាននឹងកំពុងចាប់អារម្មណ៍មកលើយុវជនសញ្ជាតិអង់គ្លេសរូបនេះ ហើយក៏ចង់ដឹងនូវរឿងរ៉ាវរសើបពីគេផងដែរ។ ផ្ញើជូនអ្នកគាំទ្រ United ជាពិសេស ទំព័រ CTS Sports សូមជីកកកាយលើកមកបង្ហាញនូវការពិតនិងអាថ៌កំបាំងទាំង ៧ យ៉ាងរបស់ Sancho ដូចខាងក្រោម៖
៧) iDol កាលពីនៅក្មេង
មិនមែនជា Ronaldo ឬ Messi តែ idol ក្នុងដួងចិត្តរបស់ Sancho គឺជាអតីតវីរបុរសប្រេស៊ីល Ronaldinho។ ធ្លាប់ផ្តល់បទសម្ភាសន៍ជាមួយទស្សនាវដ្ដី FourFourTwo កីឡាករវ័យ ២១ ឆ្នាំប្រាប់ថា៖ “កាលពីនៅតូច ខ្ញុំតែងតែទស្សនាវីដេអូនៃបច្ចេកទេសត្រិះបាល់របស់ Ronaldinho ហើយការលេងរបស់គាត់ ជួយឲ្យខ្ញុំកាន់តែមានអារម្មណ៍ល្អជាមួយបាល់ទាត់”។
៦) គេឃ្លាតឆ្ងាយពីផ្ទះតាំងពីអាយុ ១២ ឆ្នាំ
Sancho ទទួលបានឱកាសមកហ្វឹកហាត់បាល់ទាត់នៅឯថ្នាលយុវជន Harefield Academy របស់ក្លឹប Watford មុនត្រូវបានក្លឹប Man City មើលឃើញ នឹងចរចានាំយកគេមកចូលរួមនៅអាយុ ១៤ ឆ្នាំ។ ទន្ទឹមពេលនោះក្លឹប Chelsea និង Arsenal ក៏ចាប់អារម្មណ៍ Sancho ផងដែរ តែចរចាមិនបានសម្រេច។
យ៉ាងណាការចាយពេលនៅ City គេពុំបានមកចូលរួមនៅឈុតធំពេញលេញនោះទេ ពោលត្រឹមលេងឲ្យឈុត U18 មុនត្រូវបាន Dortmund យកមកដុសខាត់បន្ត ហើយក្លាយជាកីឡាករលេចធ្លោដូចពេលបច្ចុប្បន្ន។
៥) ក្លឹបដែលគេស្រលាញ់កាលនៅតូច
ដ្បិតពេលនេះគេផ្ទេរមកក្លឹប Man Utd តែបង្វែរទៅអតីតកាល គ្មានអ្វីត្រូវលាក់បាំងនោះទេ គឺ Sancho ជាអ្នកគាំទ្ររបស់ក្លឹប Chelsea ឯណោះ។ Sancho ធ្លាប់និយាយថា៖ “បើនិយាយពីកីឡាករអង់គ្លេសល្អបំផុត ខ្ញុំថា Frank Lampard ហើយពេលខ្ញុំធំធាត់ឡើងគឺខ្ញុំជាអ្នកគាំទ្រក្លឹប Chelsea ដោយវាជារឿងដែលមិនអាចកុហកបាន”។
៤) មានឪពុកជាអ្នកបង្វឹកដំបូងគេបង្អស់
Sancho ទទួលបានការគាំទ្រយ៉ាងពេញទំហឹង និងជួយជ្រោមជ្រែងពីឪពុក លើវិស័យបាល់ទាត់នេះតាំងតែពីចំណុចចាប់ផ្តើមដំបូង។ លោក Sean Sancho ដែលជាឪពុក ធ្លាប់ជាអតីតអ្នកបម្រើការផ្នែកសន្តិសុខ ដើម្បីរកលុយចិញ្ចឹមក្រពះគ្រួសារទាំងមូល ហើយលោកក៏ឆ្លៀតពេលបម្រើការក្រៅម៉ោងជាអ្នកបង្វឹកផ្នែកបាល់ទាត់ដល់ក្មេងក្នុងភូមិ រួមទាំងកូនប្រុសរបស់លោកផ្ទាល់។
៣) អត្ថន័យនៃស្នាមសាក់
នៅពីក្រោយស្នាមសាក់លើកំភួនដៃរបស់ Sancho មានបង្កប់រឿងដ៏សោកសៅ នោះគឺជាការឧទ្ទិសដល់វិញ្ញាណក្ខន្ធនៃប្អូនប្រុសបង្កើតរបស់គេ ដែលបានស្លាប់ ពេល Sancho មានអាយុ ៥ ឆ្នាំ។ នៅលើផ្នែកដៃនោះ គេបានសរសេរជាកំណាព្យរៀបរាប់ពីការចងចាំមួយចំនួន ហើយមានសត្វព្រាបមួយនៅពីលើអក្សរទាំងនោះ។
២) ស្ថិតិលើទីលានដ៏មិនគួរឲ្យជឿ
Sancho បានក្លាយជាខ្សែប្រយុទ្ធដែលជំនាញទាំងការបញ្ចប់ទី និងការកាត់បាល់ Assist។ ចាយពេលឲ្យ Dortmund នៅឈុតធំ គេបង្ហាញខ្លួន ១៣៧ ប្រកួត រកបាន ៥០ គ្រាប់និង Assist ៦៤ លើក។ Sancho បានគ្រោងកំណត់ត្រាជាកីឡាករអង់គ្លេស ដែលរកបាន ១៥ គ្រាប់និង Assist ១៥ លើកនៅរដូវកាលទោល ខកខានកើតមានអស់រយៈពេល ២៥ ឆ្នាំ។ មួយផ្សេងទៀតគេក៏ធ្លាប់ក្លាយជាកីឡាករវ័យក្មេងបំផុតនៅប្រវត្តិសាស្ត្រ Bundesliga ដែលអាចរកបាន ៣០ គ្រាប់។
១) ប្រាក់ពលកម្មនិងទ្រព្យសម្បត្តិ
មានរបាយការណ៍បង្ហាញថា កីឡាករវ័យ ២១ ឆ្នាំអាចទទួលបានប្រាក់ពលកម្ម ៣៥០ ០០០ ផោន/សប្តាហ៍ ជាកីឡាករស៊ីថ្លៃបំផុតលំដាប់ទី ២ បន្ទាប់ពី David de Gea។ ក្រៅពីថ្លៃពលកម្មកប់ពពក Sancho ក៏មានកិច្ចព្រមព្រៀងជាមួយក្រុមហ៊ុនជាម្ចាស់ឧបត្ថម្ភធំៗផ្សេងទៀតដូចជា Nike, Pepsi និង EA Sports ផងដែរ។ បើតាមការប៉ាន់ប្រមាណ ក្មេងកើតឆ្នាំ ២០០០ រូបនេះ អាចជាមានទ្រព្យសម្បត្តិសរុប ប្រមាណ ១៧ លានដុល្លារ៕
ប្រភព៖ GiveMeSports