ជារឿយៗ Cristiano Ronaldo តែងតែបានបំផុសទឹកចិត្តយុវជន និងក្មេងៗជំនាន់ក្រោយឲ្យមានការខិតខំប្រឹងប្រែងក្នុងជីវិត ហើយខ្លះទោះមិនបានជោគជ័យក្នុងវិស័យបាល់ទាត់ ប៉ុន្តែសារលើកទឹកចិត្តទាំងឡាយរបស់ CR7 ក៏ជាឥទ្ធិពលសាបព្រោះជីវិតរបស់ពួកគេឲ្យមានក្ដីសង្ឃឹមឡើងវិញផងដែរ។
ត្រលប់ទៅកាលពីឆ្នាំ ២០១៤ មានក្មេងប្រុសអាយុ ១២ ឆ្នាំម្នាក់ ឈ្មោះ Ryota Iwaoka ដែលគេទទួលបានឱកាសពិសេសក្នុងការឆ្លើយឆ្លងសំណួរជាមួយតារាឆ្នើមរបស់ក្លឹប Real Madrid គឺ Cristiano Ronaldo នៅឯកម្មវិធីក្នុងប្រទេសជប៉ុន។
ពេលនោះក្មេងប្រុសជនជាតិជប៉ុន ដែលទើបតែចេះនិយាយភាសាព័រទុយហ្គាល់មួយម៉ាត់ៗ បានព្យាយាមសួរដោយប្រើភាសាកំណើតរបស់ CR7 បែបនេះថា៖ “សួស្តីខ្ញុំឈ្មោះ Ryota ក្តីស្រមៃរបស់ខ្ញុំគឺចង់ក្លាយជាកីឡាករបាល់ទាត់មួយរូប ហើយខ្ញុំចង់មានឱកាសលេងជាមួយអ្នកនៅថ្ងៃណាមួយ ដូច្នេះហើយតើខ្ញុំត្រូវធ្វើបែបណាខ្លះ ដើម្បីអាចឈានទៅដល់គោលដៅ”។
សំណួរដែលសួរទាំងរដាក់រដុបរបស់ Ryota បានធ្វើឲ្យអ្នកអង្គុយទស្សនាក្នុងកម្មវិធីមានការអស់សំណើច តែភ្លាមនោះ Ronaldo ក៏បានឆ្លើយយ៉ាងម៉ឺងម៉ាត់ថា៖ “ហេតុអ្វីអ្នករាល់គ្នាសើច? គេនិយាយភាសាព័រទុយហ្គាល់បានប៉ុណ្ណឹង គឺល្អណាស់ហើយ អ្នករាល់គ្នាគួរតែរីករាយជាមួយការខិតខំប្រឹងប្រែងរបស់គេ”។ ជាមួយគ្នានោះ តារាឆ្នើមរបស់ក្លឹបអធិរាជស បានផ្តាំពាក្យ ៣ ម៉ាត់យ៉ាងខ្លីដែល Ryota ត្រូវធ្វើគឺ៖ “ការជឿជាក់លើខ្លួនឯង ការខិតខំប្រឹងប្រែង និងការក្ដោបក្ដាប់ឱកាសកុំឲ្យរំលងពីដៃ”។
យ៉ាងណាឆ្លងផុតរយៈពេលជិត ៧ ឆ្នាំមកនេះ ក្មេងប្រុសដែលធ្លាប់ត្រូវបានគេសើចចំអក បែរជាអាចដុសខាត់ខ្លួនឯង ក្លាយជាកីឡាករបាល់ទាត់ជោគជ័យទាំងវ័យក្មេងមួយរូបនៅឯប្រទេសជប៉ុន។ ក៏ដោយសារតែពាក្យណែនាំរបស់ Ronaldo គួបផ្សំនឹងការខិតខំប្រឹងប្រែងរបស់គេផ្ទាល់ យុវជនវ័យ ១៨ ឆ្នាំបាននឹងកំពុងដើរតួជាចំណែកដ៏សំខាន់ក្នុងក្រុម Yamanashi Gakuin ហើយទទួលជ័យជម្នះនៅព្រឹត្តិការណ៍ All Japan High School Soccer Tournament ដែលនេះអាចថាជាព្រឹត្តិការណ៍ប្រកួតប្រជែងសម្រាប់កីឡាករក្រោមអាយុ ១៨ ឆ្នាំដ៏ធំបំផុតមួយប្រចាំផ្ទៃប្រទេស។
Ryota ដែលលេងតំណែងបម្រើប្រយុទ្ធ បានបង្ហោះសារលើគណនី Instagram ដូច្នោះថា៖ “ដំបូន្មានរបស់ Cristiano តែងតែស្ថិតក្នុងចិត្តខ្ញុំជានិច្ច ទើបជំរុញឲ្យខ្ញុំអាចឈ្នះពានរង្វាន់សារនេះបាន បើទោះបីខ្ញុំធ្លាប់ឆ្លងកាត់ការលំបាក ជាពិសេសមានបញ្ហារបួសច្រើនកាលពីប៉ុន្មានឆ្នាំមុន ជាមួយគ្នានេះ ខ្ញុំក៏ពិតជារីករាយដែលមានមិត្តភ័ក្ដិទាំងអស់គាំទ្រខ្ញុំ”។
ជាមួយនឹងជោគជ័យដែលគេសម្រេចបាន ក៏ជឿថា Ryota ថាមិនត្រូវទៅថ្ងៃអនាគត អាចនឹងក្លាយជាកីឡាករតំណាងឲ្យជម្រើសជាតិជប៉ុនមួយរូបក៏ថាបាន។ ដូច្នេះនេះជាអ្នកគាំទ្ររបស់ CR7 មួយរូបទៀតហើយ ដែលកំពុងដុសខាត់ខ្លួនឲ្យក្លាយជាគ្រាប់ពេជ្រលើទីលានបាល់ទាត់។
បញ្ជាក់ថា នេះពុំមែនជាក្មេងតែម្នាក់នោះទេដែល Ronaldo បានចូលរួមជួយត្រួសត្រាយជីវិតរបស់គេ ទៀតសោតលោកក៏បានជួយក្មេងឯទៀតជាច្រើន ជាពិសេសគឺកុមារតូចៗដែលមានជំងឺប្រចាំកាយពីកំណើត ហើយមានដុងស្រលាញ់វិស័យកីឡាបាល់ទាត់។ ជាក់ស្តែងដូចកាលពីឆ្នាំ ២០១៩ តារាឆ្នើមសញ្ជាតិព័រទុយហ្គាល់ បានមកជួបក្មេងប្រុសអាយុ ១០ ឆ្នាំម្នាក់ ដែលគេមានដុំសាច់ក្នុងខួរក្បាល ហើយត្រូវទាមទារការព្យាបាលជាប្រចាំ។ Ronaldo ក៏បានចូលរួមចំណែកជាមួយយុទ្ធនាការ Rays of Sunshine ក្នុងការជួយចេញថ្លៃព្យាបាលដល់ក្មេងតូចរូបនោះ និងរ៉ាប់រងរៀបចំដំណើរកម្សាន្តពេញមួយជីវិតសម្រាប់គ្រួសាររបស់គេជាការលើកទឹកចិត្តទៀតផង៕
ប្រភព៖ SportBible