Lionel Messi មានបងប្អូនប្រុសបង្កើត ២ រូប តែគ្មាននរណាជាកីឡាករបាល់ទាត់ម្នាក់ទេ ស្របពេលដែល Cristiano Ronaldo បងប្រុសរបស់គេឈ្មោះ Hugo គឺជាអ្នករកស៊ី ដែលមានភោជនីយដ្ឋានក្នុងដៃនៅឯប្រទេសព័រទុយហ្គាល់។
ជាការពិតវាកម្រនឹងកើតឡើងខ្លាំងណាស់ ការដែលក្នុងសមាជិកគ្រួសារ មានបងប្អូនបង្កើតជាអ្នកចាប់យកអាជីពជាកីឡាករបាល់ទាត់ដូចគ្នា។ យ៉ាងណាក្នុងអត្ថបទនេះ CTS Sports នឹងបង្ហាញកីឡាករជាប់សាច់ឈាមទាំង ៦ គូដែលមានតម្លៃផ្ទេរសរុបខ្ពស់បំផុត៖ (បញ្ជាក់: នេះមិនមែនជាហាងឆេងថ្លៃខ្លួន ឬតម្លៃផ្ទេរចុងក្រោយនោះទេ តែជាតម្លៃផ្ទេរសរុបនៃក្លឹបទាំងអស់ក្នុងអាជីព)
៦) បងប្អូនបង្កើត Pogba
បើនិយាយពីឈ្មោះ Paul Pogba ប្រហែលជាមានគេស្គាល់ច្រើន ព្រោះជាកីឡាករឆ្នើមរបស់ក្លឹប Man Utd។ ប៉ុន្តែជឿថា មានគ្នាយើងតិចណាស់ដែលដឹង ថាបុរសវ័យ ២៨ ឆ្នាំរូបនេះ ក៏មានបងប្រុសបង្កើតម្នាក់ជាកីឡាករបាល់ទាត់។
នោះគឺ Florentin Pogba ដែលមានអាយុបង Paul Pogba ចំនួន ២ ឆ្នាំ។ បច្ចុប្បន្ន គេលេងតំណែងជាខ្សែការពារ ឲ្យក្លឹប Sochaux នៃលីគលំដាប់ទី ២ របស់បារាំង។ តម្លៃខ្លួនអ្នកទាំងពីរ បើបូកបញ្ចូលគ្នាគឺ ១០៥,៥ លានអឺរ៉ូ ដោយ Paul ថ្លៃ ១០៥ លាន ហើយ Florentin ថ្លៃ ៥០ មុឺនអឺរ៉ូ។
៥) បងប្អូនបង្កើត Hernandez
ខ្សែការពារលេងឲ្យក្លឹប Bayern Munich គឺ Lucas Hernandez ក៏មានប្អូនប្រុសបង្កើត ជាកីឡាករបាល់ទាត់ នោះគឺ Theo Hernandez ជាកីឡាករលេងឲ្យក្លឹប AC Milan។
សម្រាប់បុរសវ័យ ២៥ ឆ្នាំនៅ Bayern មានតម្លៃខ្លួន ៨០ លានអឺរ៉ូ រីឯបុរសវ័យ ២៣ ឆ្នាំនៅ Milan តម្លៃ៤៥,៥ លានអឺរ៉ូ នាំឲ្យតម្លៃអ្នកទាំងពីរសរុបបញ្ចូលគ្នា គឺ ១២៥,៥ លានអឺរ៉ូ។
៤) បងប្អូនបង្កើត Mbappe
Mbappe គេមានបងប្អូន ៣ នាក់ រួមមាន Ethan Mbappe អាយុ ១៤ ឆ្នាំ និង Jires Kembo Ekoko អាយុ ៣៣ ឆ្នាំ។ មូលហេតុដែលឈ្មោះពួកគេមិនដូចគ្នា ក៏ដោយសារតែ Ekoko ជាកូននៃប្តីមុនរបស់ម្តាយ Mbappe។
Ekoko ជាខ្សែបម្រើលេងឲ្យក្លឹប Bursaspor នៅឯប្រទេសទួរគី ហើយគេមានតម្លៃខ្លួន ៣,៧ លានអឺរ៉ូ ស្របពេលដែល Mbapee កាល Monaco លក់ឲ្យ PSG គឺ ១៤៥ លានអឺរ៉ូ នាំឲ្យសរុបបញ្ចូលគ្នាស្មើ ១៤៨,៧ លានអឺរ៉ូ។
៣) បងប្អូនបង្កើត Higuain
Gonzalo Higuain ដែលបច្ចុប្បន្នមានវ័យ ៣៣ ឆ្នាំ លេងនៅតំណែងប្រយុទ្ធឲ្យក្លឹប Inter Miami គេធ្លាប់មានតម្លៃផ្ទេរសរុប ១៥៩ លានអឺរ៉ូ។
គេក៏មានបងប្រុសបង្កើតម្នាក់ដែរ មានវ័យ ៣៦ ឆ្នាំ ឈ្មោះ Federico Higuain ដែលគេកំពុងប្រកបអាជីពរួមក្លឹបតែមួយ ជាមួយនឹង Gonzalo តែធ្លាប់មានតម្លៃផ្ទេរសរុបត្រឹម ២,៦ លានអឺរ៉ូ។ បូកតម្លៃអ្នកទាំងពីរចូលគ្នា ស្មើនឹង ១៦១,៦ លានអឺរ៉ូ។
២) បងប្អូនបង្កើត Hazard
នៅជម្រើសជាតិបែលហ្សិក កាល Euro 2020 ប្រហែលជាអ្នកធ្លាប់បានឃើញអ្នកទាំងពីរសហការរួមគ្នាលើទីលានម្តងហើយ ប៉ុន្តែការលេងឲ្យក្លឹប គឺមួយនៅក្របខ័ណ្ឌអេស្ប៉ាញ មួយនៅអាល្លឺម៉ង់។
សម្រាប់ Eden Hazard គេលេងឲ្យក្លឹប Real Madrid ហើយមានតម្លៃ ១៥០ លានអឺរ៉ូ រីឯប្អូនប្រុសបង្កើតរបស់គេ គឺ Thorgan ដែលអាយុប្អូន Eden ២ ឆ្នាំ ជាកីឡាកររបស់ក្លឹប Borussia Dortmund និងសរុបតម្លៃខ្លួនគឺ ៣៥,៥ លានអឺរ៉ូ។ ពួកគេទាំងពីរមានតម្លៃផ្ទេរសរុប ១៨៥,៥ លានអឺរ៉ូ។
១) បងប្អូនបង្កើត Lukaku
Romelu Lukaku ដែលជាម៉ាស៊ីនបញ្ចប់ទីដ៏ល្បីមួយនៅអឺរ៉ុប ក៏មានប្អូនបង្កើតឈ្មោះ Jordan Lukaku តែលេងនៅតំណែងផ្ទុយគ្នា គឺជាខ្សែការពារ។ ស្របពេលដែល Romelu លេងឲ្យក្លឹប Inter Milan ទៅមើលប្អូនរបស់គេ ដែលមានឈ្មោះជាប់យីហោអភិជន Jordan កំពុងលេងឲ្យក្លឹប Lazio រួមលីគនៅ Serie A តែមួយ។ សរុបតម្លៃអ្នកទាំងពីរបញ្ចូលគ្នា គឺ Romelu ថ្លៃ ២១២,៦ លានអឺរ៉ូ ហើយ Jordan ថ្លៃ ៤ លានអឺរ៉ូ ស្មើនឹង ២១៦,៦ លានអឺរ៉ូ ជាប់ឈ្មោះជាបងប្អូនបង្កើតក្នុងវិស័យបាល់ទាត់ដែលមានតម្លៃផ្ទេរសរុបខ្ពស់បំផុត៕
ប្រភព៖ TransferMarkt