ជើងខ្លាំងមួយថៃ Prajanchai PK.Saenchai Muaythaigym ចូលសង្វៀន ONE Championship ជាលើកដំបូង ប៉ុន្តែ រូបគេធ្វើព្យុះភ្លៀងយ៉ាងកក្រើកពិភពលោកក្នុងការប្រកួតដណ្ដើមខ្សែក្រវាត់ ONE World Title។
នាយប់ថ្ងៃសុក្រទី ៣០ ខែ កក្កដា យប់មិញនេះ Prajanchai បានផ្ដួលម្ចាស់ខ្សែក្រវាត់ពីរ Sam-A Gaiyanghadao ដោយពិន្ទុជាឯកច្ឆន្ទក្នុងនាមគូឯកនៅសង្វៀន ONE: BATTLEGROUND ដើម្បីក្លាយជាម្ចាស់ខ្សែក្រវាត់មួយថៃ ONE Strawweight ថ្មី។
Prajanchai ដែលជាជើងឯកមួយថៃពិភពលោក ៦ សម័យកាលនោះបានបង្ហាញការប្រកួតយ៉ាងគឃ្លើនតាំងពីចាប់ផ្ដើមស្នូរជួង ដោយកៀរ Sam-A ឲ្យរំកិលខ្លួនទៅក្បែររេញ, ប្រើកណ្ដាប់ដៃខាវឆ្វេងស្ដាំញឹកញាប់, និង ការវ៉ៃដងខ្លួនផងដែរ។
ម្ចាស់ការពារខ្សែក្រវាត់បានត្រឹមប្រើជំហរដើម្បីវាយបកវិញ ប៉ុន្តែ Prajanchai ប្រើដៃលឿនណាស់, ពិបាកគេច, និងខ្លាំងទៀតផង។ ទើបប្រើហ្គង់ទម្ងន់ ៤ អោនលើកដំបូងប៉ុន្តែ គេមានទំនុកចិត្តកាន់តែខ្លាំង។
ទោះ Sam-A មានជំនាញប្រើឆ្វេងរហ័យយ៉ាងណា ក៏កូនសិស្សមកពីក្លិប PK.Saenchai Muaythaigym មិនរួញរានោះទេ។ ពិតណាស់ Prajanchai ប្រើកណ្ដាប់ដៃស្ដាំមហាទម្ងន់ធ្វើឲ្យម្ចាស់ខ្សែក្រវាត់ដួលស្ដូតរាប់ដល់ ៨ ម្ដង បន្ទាប់ពីចាប់ជើងបាន។
នៅទឹកទី២នេះ Sam-A បានដើរសំដៅដើម្បីស្ដារយកពិន្ទុវិញ និងវ៉ៃចូលមុខគូប្រជែងមួយចំនួន ប៉ុន្តែ Prajanchai ឈឺចាប់ខ្លាំងទេ។ កីឡាករវ័យ ៣៧ ឆ្នាំបានព្យាយាមចាប់ជើងមួយ និងទាត់ជើងមួយទៀតឲ្យកីឡាករវ័យក្មេងដួលជាញយដង។
យ៉ាងណាក្ដីសិស្សគុនមកពីក្លិប PK.Saenchai Muaythaigym ក្រោកមកវិញក៏បានប្រើក្បាច់ខាវលឿន និងកណ្ដាប់ដៃត្រង់ផងធ្វើឲ្យ Sam-A លំបាកមិនស្ទើរដែរ។
ម្ចាស់ខ្សែក្រវាត់ បានបន្តចេញអាវុធគ្រប់ស្នៀតទាំងអស់ដើម្បីដណ្ដើមបានពិន្ទុត្រលប់មកវិញ ជាពិសេសក្បាច់ទាត់ជើងឆ្វេងខ្ពស់របស់គេ ប៉ុន្តែ កីឡាករវ័យក្មេងក៏ប្រើកណ្ដាប់ដៃរហ័សទៅវិញ។ នៅចុងទឹកនេះ Sam-A រងកណ្ដាប់ដៃស្ដាំវ៉ៃកាត់ម្ដងទៀត ដែលរុញរូបគេឲ្យទៅក្បែររេញបន្តិច។
ចាប់ផ្ដើមទឹកទី៣ Sam-A បង្ហាញថាគេជាម្ចាស់ខ្សែក្រវាត់ពិភពលោក World Champion។ គេចេញដៃឆ្វេងលឿន ៗ និងទាត់ឆ្វេងលឿនៗ លើ Prajanchai។
មើលទៅ Sam-A ទទួលបានពិន្ទុគ្រាន់បើ។ ប៉ុន្តែ Prajanchai បានប្រើក្បាច់ប្រដាល់កម្រិតខ្ពស់របស់ខ្លួនដើម្បីទប់ទល់ស្ថានការណ៍ គេបានខាវឆ្វេង និង វ៉ៃត្រង់កណ្ដាប់ដៃស្ដាំ ដែលរុញឲ្យតារាជើងចាស់ទៅក្បែររេញជាថ្មី។
ទឹកទី៤កាន់តែក្ដៅស្លឹកត្រចៀកសម្រាប់ Sam-A ពេលគេចាប់ផ្ដើមចង់វាយបំបាក់លើ Prajanchai វិញយ៉ាងមានប្រសិទ្ធភាព។ គេបានទាត់ជើងកូនសិស្សក្លិប PK.Saenchai Muaythaigym បន្ទាប់ពីចាប់ជើងបានម្ខាងទៀត។ Prajanchai ងើបឡើង និងបន្តការប្រកួតយ៉ាងស្វាហាប់វិញ ប៉ុន្តែ បុរសទាំងពីរចូលកៀកដើម្បីប្រើជង្គង់វិញម្ដង ហើយ តារាគូប្រជែងបានធ្វើឲ្យមុខតារាជើងចាស់ចេញឈាមរេញៗដោយសារស្នៀតកែងដ៏ល្អ។
បែបណាក្ដី Sam-A ព្យាយាមចូលចាប់ជើង និងឡើងជង្គង់ជារឿយៗ អមដោយកណ្ដាប់ដៃឆ្វេងផងដែរ។ មិនយូរទេ ពេលចាប់ជើងជាប់ Sam-A អុកជង្គង់ទៅប៉ះអូនតូចគូប្រជែងបន្តិចដោយអចេតនា និងហួលលើក្តាររេញបន្តិច ហើយសម្រាកមួយសន្ទុះមុនបន្តការប្រកួតឡើងវិញ។
ពេលបន្តសកម្មភាពវិញ Sam-A ដើរសំដៅទៅ និង ប្រើជើងទាត់កាត់ជាថ្មី ហើយធ្វើឲ្យ Prajanchai ដួលម្ដងទៀត។ ពេលនោះ តារាមួយថៃវ័យក្មេង មើលទៅហាក់អស់កម្លាំង។
ក្នុងទឹកកាត់សេចក្ដី Sam-A មើលទៅនៅតែខ្លាំងតាមរយៈប្រើស្នៀតកណ្ដាប់ដៃឆ្វេង និងទាត់ឆ្វេង។
ដើម្បីឆ្លើយតប Prajanchai ប្រើកណ្ដាប់ដៃញាប់ស្មេរ និង វ៉ៃកែងយ៉ាងសាហាវចូលមុខ Sam-A ខ្លះៗ។ ប៉ុន្តែ វីរបុរស Sam-A នៅតែអាចទប់ជាប់ និងប្រកួតនៅកណ្ដាលរេញ។
Sam-A ឡើងជង្គង់ និងកណ្ដាប់ដៃឆ្វេងត្រង់ ហើយ បង្ខំឲ្យ Prajanchai ស្នៀតជង្គង់របស់ម្ចាស់ខ្សែក្រវាត់។ បែបណាក្ដី ក្រោយវ៉ៃជង្គង់បានពីរបីដង Sam-A បានកៀរគេទៅក្បែររេញ។ រំពេញនោះ Prajanchai ម៉ាត់កណ្ដាប់ដៃស្ដាំយ៉ាងលឿន ចំមុខតារាជើងចាស់ ហើយ Sam-A ព្យាយាមយកកែងរង។
នៅសល់ប៉ុន្មានវិធីមុនចប់ទឹក កូនសិស្សមកពីក្លិប Evolve បានចាប់ជើង និង ទាត់សងលើ Prajanchai និងម៉ាត់ឆ្វេងហើយទាត់ថែមផងដែរ ដែលបន្សល់ទុកការប្រកួតល្អបំផុតនៅ ONE Championship ប្រចាំឆ្នាំនេះ។
ទោះបីការខំប្រឹងប្រែងយ៉ាងខ្លាំងក្លាពីសំណាក់ Sam-A អ្នកលេងវ័យក្មេង Prajanchai ធ្វើបានល្អគ្រប់គ្រាន់ដើម្បីឈ្នះពិន្ទុជាឯកច្ឆន្ទ ដែលកើនកំណត់ត្រាឈ្នះ ៣៣៨ ដង ចាញ់ ៥១ ដង និង ស្មើ ៣ ដងក្នុងអាជីព។ គេក្លាយជាកីឡាករទី២ដែលគ្រងខ្សែក្រវាត់ ONE Strawweight Muay Thai World Title។