ត្រលប់ទៅកំឡុងពេល ៥ ឆ្នាំចុងក្រោយដែល Sir Alex Ferguson នៅដឹកនាំ ក៏ជឿថាអ្នកគាំទ្រ Man Utd ប្រហែលជាស្គាល់ច្បាស់នៅបងប្អូនបង្កើត ២ រូប ដែលឈរជើងនៅ Old Trafford មានខ្សែការពារ Rafael da Silva និង Fabio da Silva។ យ៉ាងណាអ្នកទាំងពីរ ក៏បានចាកចេញពីក្លឹបជាបន្តបន្ទាប់ ក្រោយពេលគ្រូតាប្រកាសចូលនិវត្តនៅឆ្នាំ ២០១៣។
បញ្ជាក់ថា Sir Alex បានប្រកាសចូលនិវត្តនៅចុងខែមិថុនា ឆ្នាំ ២០១៣ ហើយក្លឹបប្រកាសចាត់តាំង David Moyes ឲ្យដឹកនាំបន្ត បានរយៈពេលជិត ១ ឆ្នាំមុនប្តូរមកជាគ្រូជំនួសបណ្ដោះអាសន្នលោក Ryan Giggs ហើយបន្តដល់អ្នកចាត់ការពេញសិទ្ធ Louis van Gaal នៅរដូវក្តៅឆ្នាំ ២០១៤ ដល់ ២០១៦។
ចុះជាមួយខ្សែការពារ Rafael da Silva តើមានមូលហេតុអ្វីទៅ នៅពីក្រោយការចាកចេញរបស់គេ ហើយមានពាក់ព័ន្ធបែបណាខ្លះនឹងការមកដល់របស់អ្នកចាត់ការលោក Louis van Gaal? បើតាមការទម្លាយពីសាមីខ្លួនផ្ទាល់ ដែលបច្ចុប្បន្នជាកីឡាករឈរជើងឲ្យក្លឹប Basaksehir នៅឯទួរគី និយាយថា ហេតុផលចម្បងគឺដោយសារ Van Gaal ស្អប់កីឡាករមានសញ្ជាតិប្រេស៊ីល ដូច្នេះហើយឲ្យតែលោកជួប គឺដឹងតែលក់ចេញហើយ បើទោះបីពួកគេលេងល្អក៏មិនទុកនោះដែរ។
កីឡាករប្រេស៊ីល ដែលបានចាយពេល ៧ ឆ្នាំនៅក្លឹបបិសាចក្រហម ចូលមកដល់ឆ្នាំ ២០១៥ គេក៏ត្រូវបានលោក Van Gaal បញ្ជាក់ច្បាស់ថាលែងស្ថិតក្នុងផែនការណ៍ ហើយសម្រេចផ្ទេរចេញឲ្យទៅក្លឹប Lyon ខណៈបងប្អូនបង្កើតរបស់គេគឺ Fabio ត្រូវបានផ្ទេរចេញនៅឆ្នាំ ២០១៤ កំឡុងពេលឡើងកាន់តំណែងថ្មីថ្មោងរបស់ Van Gaal ដូចគ្នា។
ប្រាប់សារព័ត៌មាន The Athletic កីឡាករ Rafael និយាយ៖ “ខ្ញុំមិនទទួលបានការពន្យល់ច្បាស់លាស់ពីគាត់នោះទេ ដោយត្រឹមពេល Van Gaal មកដល់ គាត់និយាយតែមួយម៉ាត់ គឺ អូខេ អ្នកដល់ពេលចេញហើយ”។
លោកបន្តថា៖ “Van Gaal គាត់ធ្វើតែតាមចិត្តរបស់គាត់ ថាចង់ឲ្យកីឡាករណានៅ ឬចាកចេញ ហើយធ្វើការផ្លាស់ប្តូរភ្លាមៗ ដោយមិនបានពន្យល់ក្បោះក្បាយមកកាន់យើងឡើយ តែខ្ញុំក៏ធ្លាប់លឺគេនិយាយតគ្នា ហើយប្រាប់មកខ្ញុំតាំងពីមុនគាត់មកដឹកនាំថា Van Gaal ស្អប់កីឡាករប្រេស៊ីលខ្លាំងណាស់”។
“ខ្ញុំមិនដឹងថាពិតឬអត់ទេ តែតាមលឺគឺផ្តើមមានរឿងបែបហ្នឹង តាំងពីពេលដែលលោកនៅដឹកនាំ Barcelona ហើយមានជម្លោះជាមួយ Rivaldo ដោយកាលនោះគាត់ដាក់ Rivaldo ឲ្យអង្គុយបម្រុង ហើយ Rivaldo ក៏ចាប់ផ្តើមនិយាយអាក្រក់ពីគាត់ ព្យាយាមចង់ឲ្យក្លឹបដកគាត់ចេញ ទើបតាំងពីហ្នឹងមកគាត់ប្រកាន់ខ្ជាប់ទម្លាប់មួយគិតថា គាត់ស្អប់កីឡាករប្រេស៊ីល ព្រោះឲ្យតែកីឡាករប្រេស៊ីលសុទ្ធតែពូកែចាក់រុកឲ្យគ្រូអស់តំណែង”។
បង្វែរទៅរឿង Rivaldo និង van Gaal កាលនៅ Barcelona បន្តិច គឺអ្នកទាំងពីរធ្វើការរួមគ្នាជាសិស្សនិងគ្រូ ចន្លោះឆ្នាំ ១៩៩៧ ដល់ ២០០០ ហើយពេលនោះលោក Van Gaal ចង់ឲ្យ Rivaldo លេងតំណែងស្លាបខាងឆ្វេង តែគេមិនព្រម ដោយទាមទារចង់លេងប្រយុទ្ធកណ្តាល ទើបអ្នកចាត់ការហូឡង់ដកគេពីឈុត ១១ នាក់ដំបូងឲ្យត្រឹមតែអង្គុយបម្រុង។ យ៉ាងណារឿងរ៉ាវនេះ ចុងក្រោយក៏បញ្ចប់ដោយការចាកចេញដូចគ្នា ពោលពេល Van Gaal អស់តំណែងនៅឆ្នាំ ២០០០ ហើយត្រលប់មកដឹកនាំជាថ្មីបានមួយឆ្នាំនៅឆ្នាំ ២០០២-០៣ ក៏ Rivaldo សម្រេចបញ្ចប់កុងត្រាមុនកាលកំណត់រួចផ្ទេរទៅ AC Milan។
គួរបញ្ជាក់ថា Van Gaal ត្រូវបានក្លឹប Man Utd ដកតំណែងនៅឆ្នាំ ២០១៦ ក្រោយដឹកនាំបាន ២ ឆ្នាំ។ ស្ថិតិដឹកនាំរបស់លោកមិនជាល្អប៉ុន្មាននោះទេ ដោយ ១០៣ ប្រកួត ឈ្នះ ៥៤ ស្មើ ២៤ និងចាញ់ ២៥ លើក។ កំឡុងពេលនោះ លោកបានជួយបិសាចក្រហមលើកពានតែមួយគត់គឺ FA Cup រដូវកាល ២០១៥/១៦។
ចុងក្រោយពាក់ព័ន្ធនឹងអាជីពរបស់បងប្អូនបង្កើត Rafael និង Fabio សព្វថ្ងៃ ពួកគេមិនទាន់ចូលនិវត្តនោះទេ ដោយសម្រាប់ Rafael ក្រោយចេញពី United គេបានចាយពេលនៅក្លឹប Lyon អស់ ៥ ឆ្នាំ ហើយទើបតែផ្ទេរមកក្លឹប Basaksehir នៅទួរគីកាលពីឆ្នាំ ២០២០។ រីឯ Fabio ពេលចែកផ្លូវពី United គេបានផ្ទេរទៅ Cardiff ហើយបន្តទៅក្លឹប Middlesbrough និង FC Nantes មកទល់សព្វថ្ងៃ៕
ប្រភព៖ ManchesterEveningNews