ខ្សែការពារ Giorgio Chiellini បានបញ្ជាក់ថានឹងបន្ដកុងត្រាលេងឱ្យក្រុម Juventus ១រដូវកាលទៀត ក្រោយពីរូបគេអស់កុងត្រាកាលពីចប់រដូវកាលកន្លងទៅ។
Chiellini បានចំណាយពេលលេងឱ្យក្រុម Juventus ១៧ឆ្នាំមកហើយ និងកុងត្រារបស់គេផុតកំណត់កាលពីចប់រដូវកាលមុន។ ដោយសារផ្ដោតលើការជួយជម្រើសជាតិអ៊ីតាលី ទើបបានជាកីឡាករវ័យ៣៦ឆ្នាំនេះមិនទាន់គិតរឿងអនាគតថានឹងត្រូវទៅលេងនៅក្លឹបណាទៀត ឬចូលនិវត្តន៍តែម្ដង។ តែក្រោយពីបានលើកពានរង្វាន់ Euro 2020 ហើយ ទើប Chiellini មានអារម្មណ៍ចង់បន្ដលេងនៅ Juventus ១រដូវកាលថ្មីខាងមុខទៀត។
ខ្សែការពាររូបនេះបាននិយាយថា៖ “ខ្ញុំចង់លើកពានរង្វាន់ខ្លះទៀត ព្រោះវាធ្វើឱ្យអ្នកស្រែកឃ្លានក្នុងការធ្វើវាទៀត។ ពាក់អាវ Juventus ជាមួយនិមិត្តសញ្ញាលើទ្រូង នឹងធ្វើឱ្យអ្នកកាន់តែមានកម្លាំងចិត្តបន្ថែមក្នុងការលេង។ ខ្ញុំត្រូវការពេលសម្រាកបន្តិច ហើយនៅថ្ងៃចន្ទខ្ញុំនឹងចាប់ផ្ដើមម្ដងទៀតជាមួយ Juventus ”៕ប្រភព Goal
