មានចចាមអារ៉ាមថា កៅអីរបស់លោក Jurgen Klopp ហាក់មិននឹងននោះទេ ដោយពេលខាងមុខតំណែងជាអ្នកចាត់ការនៅ Liverpool អាចជាត្រូវជំនួសដោយ អតីតកីឡាករជើងចាស់លោក Steven Gerrard ដែលបច្ចុប្បន្នជាអ្នកចាត់ការមួយរូបស្រាប់នៅក្លឹប Rangers។
Gerrard រដូវកាល ២០២០/២១ កន្លងទៅ បានដឹកនាំឲ្យ Rangers ឈ្នះពានរង្វាន់លីគដែលខកខានរយៈពេលជាច្រើន ហើយបញ្ចប់រដូវកាលជាមួយពិន្ទុច្រើនជាង ១០០ វ៉ាដាច់ក្រុមឯទៀតឆ្ងាយ។ យ៉ាងណាពាក់ព័ន្ធនឹងការផ្ទេរមក Liverpool លោកសូមច្រានចោល ហើយថាមិនបានទាន់គិតដល់រឿងនោះទេ។
អ្នកទាំងពីរសុទ្ធតែសេសសល់សុពលភាពកុងត្រាដល់ឆ្នាំ ២០២៤ ដូចគ្នា តែ Gerrard និយាយថា៖ “ខ្ញុំមិនអាចគ្រប់គ្រងការសង្ស័យរបស់អ្នកកាសែតជុំវិញតំណែងរបស់ខ្ញុំបានទេ តែខ្ញុំសូមមិនទទួលយករឿងនោះ [ចចាមអារ៉ាមការផ្ទេរទៅ Liverpool] ដោយអ្វីដែលខ្ញុំផ្តោតសំខាន់ពេលនេះ គឺការងារដែលកំពុងមាន ហើយខ្ញុំក៏រីករាយជាមួយតំណែងរបស់ខ្ញុំផងដែរ”។
លោកបន្ត៖ “ខ្ញុំពិតជារីករាយជាមួយ Ranger ហើយខ្ញុំនិយាយច្រើនសារហើយនេះជាក្លឹបដ៏ធំមួយ ខ្ញុំបានសម្របខ្លួនរួចទៅហើយ ដោយខ្ញុំពិតជារីករាយនឹងបន្តអភិវឌ្ឍក៏ដូចជាចជំរុញក្រុមទាំងមូលបន្ថែមទៅមុខទៀត”៕
ប្រភព៖ AF