ប្រធានក្លឹប Getafe លោក Angel Torres បានព្រមានក្លឹប Barcelona និងក្របខ័ណ្ឌ La Liga ទាំងមូល ថានឹងកាន់តែលំបាកនៅផ្នែកសេដ្ឋកិច្ច ប្រសិនជា Lionel Messi ចាកចេញនៅរដូវក្តៅនេះ ព្រោះទាំងដែលកំពុងជួបបញ្ហាដោយសារជំងឺរាតត្បាត COVID-19 ហើយ ប្រសិនបាត់បង់តារាឆ្នើមកំពូលរូបនេះចេញពីក្របខ័ណ្ឌទៀត នោះបណ្តាក្លឹបនឹងកាន់តែលំបាកលើសដើម។
កុងត្រារបស់ M10 បានផុតតាំងពីថ្ងៃ ៣០ មិថុនា ឆ្នាំ ២០២១ ហើយពេលនេះគេហោះមកដល់ទីក្រុង Barcelona វិញហើយ តែមិនទាន់បញ្ជាក់ច្បាស់ទេ ថាព្រមបន្តកុងត្រាថ្មី ឬមកក្នុងគោលបំណងបែបណា។
យ៉ាងណាតាមការយល់ឃើញរបស់ប្រធានក្លឹប Getafe ជាក្លឹបមួយនៅ La Liga និយាយ៖ “ខ្ញុំបានជជែកជាមួយ Laporta និង Tebas [ប្រធាន La Liga] ថាមិនអាចអនុញ្ញាតឲ្យ Messi ចាកចេញនៅឆ្នាំនេះទេ ព្រោះវានឹងក្លាយជាកំហុសដ៏ធំ ហើយជាការសោកស្តាយបំផុតមួយ ព្រោះកីឡាករល្អបំផុតក្នុងលោកគួរតែចូលនិវត្តនៅអេស្ប៉ាញ ណាមួយឆ្លើយតបនឹងបញ្ហាសេដ្ឋកិច្ចដែលយើងកំពុងជួបប្រទះផង”។
លោកបន្ត៖ “ខ្ញុំគិតថា La Liga គួរតែនឹងមានការបត់បែនឡើងវិញ ក្រោយពីបាត់បង់ចំណូលជាង ១ ពាន់លានអឺរ៉ូដោយសារជំងឺកូវីដ តែយ៉ាងណាខ្ញុំនឹងធ្វើគ្រប់យ៉ាងដោយចង់ឲ្យ Messi បន្តនៅ ហើយដូចជា Ronaldo ក៏មិនគួរនឹងចាកចេញដែរ តែសម្រាប់ខ្ញុំ Messi ជាកីឡាករល្អបំផុតក្នុងលោក គេត្រូវតែស្ថិតក្នុងលីកដែលល្អបំផុតក្នុងលោកដូចគ្នា នោះគឺ La Liga”៕
ប្រភព៖ Sportskeeda