កីឡាការិនី ចិន Wang Luping ត្រូវឡើងសង្វៀនពិភពលោក ONE Championship លើកដំបូងនាថ្ងៃសុក្រ ទី៣០ ខែកក្កដានេះដោយជួបនឹងកីឡាការិនីវ័យទើប១៧ឆ្នាំ Victoria “The Prodigy” Lee នៅព្រឹត្តិការណ៍ប្រកួត ONE: BATTLEGROUND ដែលផ្សាយផ្ទាល់ចេញពីប្រទេសសិង្ហបុរី។
Wang បាននិយាយជុំវិញការប្រកួតនេះថា ៖«ពិភពលោកទាំងមូលជឿថា ខ្ញុំនឹងចាញ់ Victoria។ ដោយសារនាងកំពុងល្បី និងទទួលបានការចាប់អារម្មណ៍ខ្លាំង ដូច្នេះខ្ញុំបានចាត់ទុកការប្រកួតនេះសំខាន់សម្រាប់ខ្ញុំ»។
Lee ជាប្អូនស្រីរបស់ជើងឯកពិភពលោកកីឡាការិនី Angela Lee និងជើងឯកពិភពលោកកីឡាករ Christian Lee ទើបតែចុះកុងត្រាចូល ONE កាលពីខែកញ្ញា។
Wang និយាយថា ៖«ដៃគូរបស់ខ្ញុំជាតារាកំពុងល្បី។ គាត់ធំធាត់ក្នុងត្រកូលកីឡាដែលជោគជ័យក្នុងអាជីពគុនចម្រុះ។ បច្ចេកទេស និងយុទ្ធសាស្ត្ររបស់នាងល្អ។ នាងល្បីដែលធ្វើឲ្យពិភពលោកហៅនាងថា ‘The Prodigy’។ តែខ្ញុំចង់ឲ្យអ្នករាល់គ្នាឃើញថា ការប្រឹងប្រែងតែងតែសំខាន់ជាងទេពកោសល្យ»។
ការខិតខំប្រឹងប្រែងហ្វឹកហាត់អស់រយៈពេលជាច្រើនឆ្នាំបានជំរុញឲ្យ Wang មានជំនឿចិត្តលើខ្លួនឯង។ កីឡាការិនីចិននេះចាប់ផ្តើមកីឡាដំបូងគឺសាន់ដានៅអនុវិទ្យាល័យ ហើយបន្ទាប់មកបានអភិវឌ្ឍចូលគុនចម្រុះ។ នាងនិយាយថា ៖«ខ្ញុំគិតថា ខ្ញុំអាចនឹងឈ្នះការប្រកួតនេះ ពីព្រោះជំនាញវ៉ៃឈររបស់ខ្ញុំគឺល្អគ្រប់គ្រាន់ហើយ។ ប៉ុន្តែខ្ញុំក៏មានមេរៀនមួយដែរ។ ខ្ញុំបានបរាជ័យប្រកួតលើកទី១។ ខ្ញុំបានចាញ់ដៃគូដែលប្រើក្បាច់ឃ្លេរឹតដៃខ្ញុំ។ ខ្ញុំយល់ថា កីឡាគុនចម្រុះពិតជាស្មុគស្មាញណាស់ ដូច្នេះខ្ញុំក៏បានអភិវឌ្ឍក្បាច់ក្រោមច្រើនដែរ។ ការប្រកួតដោយប្រើជំនាញក្រោមគឺសំខាន់ដូចការវ៉ៃជំនាញឈរដែរ»។
Wang ជាកីឡាការិនីម្នាក់ដែលមានបទពិសោធច្រើនជាង Lee ទាំងជំនាញក្រោម និងក្បាច់វ៉ៃឈរ ថ្វីបើនាងទើបលេចមុខនៅសង្វៀន ONE។ ពាក់ព័ន្ធនឹងដៃគូ នាងបាននិយាយថា ៖«Victoria Lee មានជំនាញច្បាស់ពីក្បាច់ក្រោម ដូច្នេះរំពឹងថា នឹងប្រើជំនាញឈររបស់ខ្ញុំដើម្បីផ្តួលនាង។ បើខ្ញុំមានឱកាស ក៏នឹងប្រើជំនាញក្រោមដើម្បីឃ្លេដែរ»។
យុវតី Lee ជាឯកជឺជីតស៊ូពិភពលោកកម្រិតយុវជន Pankration ពីរដង ជាជើងឯក IMMAF ពិភពលោកយុវជនឆ្នាំ២០១៩ និងជាជើងឯកចំបាប់រដ្ឋហាវ៉ៃឆ្នាំ២០២០។ ប៉ុន្តែសម្រាប់ការប្រកួតគុនចម្រុះអាជីពលើឆាកប្រដាល់ពិភពលោកទើបបានម្តងប៉ុណ្ណោះគឺកាលពីខែកុម្ភៈ ឆ្នាំនេះដោយបានផ្តួលកីឡាការិនីថៃបទពិសោធច្រើន Sunisa Srisen តាមរយៈក្បាច់ឃ្លេកឲ្យចុះចាញ់ក្នុងទឹកទី២។
Wang បាននិយាយថា ៖«ខ្ញុំគិតថា Victoria មិនរស់នៅតាមឈ្មោះហៅក្រៅរបស់នាងទេ ពីព្រោះទើបតែប្រកួតបានម្តងប៉ុណ្ណោះ។ តាមគំនិតខ្ញុំ ជ័យជម្នះតែម្តគត់មិនអាចបញ្ជាក់បានពីអ្វីឲ្យច្បាស់លាស់នោះទេ»។
វាច្បាស់ណាស់ថា Wang មានកម្លាំងជំរុញទឹកចិត្តពីការបរាជ័យលើកដំបូងដើម្បីបោះជំហានទៅរកជ័យជម្នះក្នុងការប្រកួតនាថ្ងៃសៅរ៍នេះ។ ប្រសិនបើនាងទទួលបានជោគជ័យនោះ មានន័យថា នាងបានក្លាយជារនាំងរារាំងដល់ដំណើរឆ្ពោះទៅរកក្លាយជាជើងឯកពិភពលោករបស់ Victoria នាពេលអនាគត។
Wang បាននិយាយថា ៖«គោលបំណងវែងរបស់ខ្ញុំគឺរកជ័យជម្នះដើម្បីបោះជំហានទៅប្រកួតនឹង Angela Lee»។
