Raheem Sterling និង Marcus Rashford ដែលធ្លាប់តែមានហាងឆេងថ្លៃខ្លួនលើសពី ១០០ លានអឺរ៉ូ ទីបំផុតបានធ្លាក់ចុះវិញហើយនៅរយៈពេលចុងក្រោយ។ បើតាមទិន្នន័យថ្មី ចុះផ្សាយដោយ TransferMarkt បានធ្វើការអាប់ដែតនៅហាងឆេងថ្លៃខ្លួនកីឡាករខ្ពស់បំផុតទាំង ១០ ប្រចាំក្របខ័ណ្ឌ Premier League ហើយយើងសង្កេតឃើញមានកូនបិសាច ដល់ទៅ ៣ រូប។
សូមបញ្ជាក់ថា ហាងឆេងថ្លៃខ្លួនកីឡាករ គឺខុសពីតម្លៃផ្ទេរចេញសម្រេច ហើយវាមានការឡើងចុះ ផ្អែកទៅតាមការវាយតម្លៃលើគុណភាពនៃការបង្ហាញលើទីលាន កត្តាអាយុ កត្តាសុពលភាពកុងត្រាដែលនៅសេសសល់ និងស្ថានភាពទីផ្សារបច្ចុប្បន្ន។ តោះយើងទៅមើលឈ្មោះអ្នកទាំង ១០ ដូចតទៅ៖
១០) Phil Foden កីឡាករក្លឹប Man City តម្លៃ ៨០ លានអឺរ៉ូ
=៧) Sadio Mane កីឡាករក្លឹប Liverpool តម្លៃ ៨៥ លានអឺរ៉ូ
=៧) Son Heung-min កីឡាករក្លឹប Tottenham Hotspur តម្លៃ ៨៥ លានអឺរ៉ូ
=៧) Marcus Rashford កីឡាករក្លឹប Man Utd តម្លៃ ៨៥ លានអឺរ៉ូ
=៥) Bruno Fernandes កីឡាករក្លឹប Man Utd តម្លៃ ៩០ លានអឺរ៉ូ
=៥) Raheem Sterling កីឡាករក្លឹប Man City តម្លៃ ៩០ លានអឺរ៉ូ
=២) Kevin de Bruyne កីឡាករក្លឹប Man City តម្លៃ ១០០ លានអឺរ៉ូ
=២) Mohamed Salah កីឡាករក្លឹប Liverpool តម្លៃ ១០០ លានអឺរ៉ូ
=២) Jadon Sancho កីឡាករក្លឹប Man Utd តម្លៃ ១០០ លានអឺរ៉ូ
១) Harry Kane កីឡាករក្លឹប Tottenham Hotspur តម្លៃ ១២០ លានអឺរ៉ូ
បញ្ជាក់ថា ក្នុងចំណោមអ្នកទាំង ១០ យើងក៏មានរឿងរ៉ាវគួរឲ្យចាប់អារម្មណ៍ ២ ពាក់ព័ន្ធនឹង Son ក៏ដូចជា Kane ដែលជាកីឡាកររួមទ្រនំ នៅក្លឹបមាន់ខ្នាយមាស។
នោះគឺម្ចាស់អាវលេខ ៧ សញ្ជាតិកូរ៉េខាងត្បូង ក៏ទើបតែបានចុះហត្ថលេខាលើកុងត្រាថ្មីដល់ឆ្នាំ ២០២៥ ដែលនេះជាដំណឹងភ្ញាក់ផ្អើលមួយ ព្រោះមតិភាគច្រើនគិតថា Son គួរតែដល់ពេលវេលាចាកចេញពី Spurs ហើយ ព្រោះអីនៅទីនោះគឺគ្មានឱកាសអាចជោគជ័យការឈ្នះពានរង្វាន់ធំណាមួយឡើយ ជាក់ស្តែងដូចរដូវកាលថ្មី ២០២១/២២ ពួកគេក៏គ្មានកៅអីទៅចូលរួមនៅព្រឹត្តិការណ៍ Europa League ថែមទៀត ពោលបានត្រឹមពានលំដាប់ទី ៣ Europa Conference League។
រីឯ Harry Kane មានភាគរយច្រើន អាចនឹងចាកចេញ ជាជាងការបន្តនៅ ព្រោះសាមីខ្លួនទំនងជាគិតថា ដល់ពេលហើយក្នុងការផ្លាស់ប្តូរ ទាន់ពេលគុណភាពលេងរបស់ខ្លួនស្ថិតនៅកម្រិតដ៏ខ្ពស់ស្រាប់ផង។ គោលដៅអាទិភាពរបស់កីឡាករអង់គ្លេស គឺការចង់ឈ្នះពានរង្វាន់ មិនថាតែពានក្នុងស្រុក និងពានប្រចាំតំបន់អឺរ៉ុប។
ជាក់ស្តែងការចាយពេលនៅ Spurs ជាង ១០ ឆ្នាំមកនេះ ខ្សែប្រយុទ្ធកណ្តាល Kane ពូកែខាងបញ្ចប់ទីដែរ ដោយរកបានច្រើនជាង ២០០ គ្រាប់ តែកុំថាឡើយត្រឹមពាន FA Cup ឬ League Cup ក៏គេមិនទាន់បានស្គាល់រសជាតិសូម្បីម្តង។
ភាគរយច្រើនកីឡាករវ័យ ២៧ ឆ្នាំ អាចជាផ្ទេរទៅក្លឹប Manchester City ព្រោះលឺដំណឹងថាភាគីក្លឹបមេឃខៀវ និងកីឡាករ បានចរចាត្រូវរ៉ូវអស់ហើយរឿងថ្លៃពលកម្ម ដោយហ៊ានផ្តល់ឲ្យ ៤០០ ០០០ ផោន/សប្តាហ៍ ល្មមរុញ Kane ឲ្យឈរឈ្មោះជាកីឡាករស៊ីថ្លៃបំផុតប្រចាំលីគកំពូលអង់គ្លេស។ យ៉ាងណាបច្ចប្បន្ន នៅទាក់ទើររឿងចរចាតម្លៃផ្ទេរជាមួយក្លឹប Spurs ព្រោះពួកគេទាមទារដល់ទៅ ១៥០ លានផោន ស្របពេលដែល City ចង់ផ្តល់ឲ្យត្រឹម ១០០ លានស្តើងតែប៉ុណ្ណោះ។
គួរបញ្ជាក់ថា រដូវកាលថ្មី ២០២១/២២ នៅ Premier League នឹងបើកដំណើរការនៅថ្ងៃទី ១៣ សីហា ឆ្នាំ ២០២១ ហើយបញ្ចប់ទៅវិញ នៅថ្ងៃទី ២២ ឧសភា ឆ្នាំ ២០២២។ ជំនួបបើកឆាកជុំទី ១ មានគូពិសេសៗដូចជា Man Utd ប៉ះ Leeds, Leicester City ប៉ះ Wolves និង Tottenham ប៉ះ Man City ហើយសុទ្ធតែការប្រកួតលេងពីក្បាលល្ងាចទៅ មិនទាមទារឲ្យគ្នាយើងដាច់យប់ដូចព្រឹត្តិការណ៍របស់ UEFA នោះឡើយ។ ការប្រកួតធំៗនៅ Premier League ប្រិយមិត្តអាចទស្សនាបានយ៉ាងរហ័ស នៅលើទំព័រ CTS Sports៕
ប្រភព៖ TransferMarkt