លោក Nusret Gokce ឬមានឈ្មោះហៅក្រៅថា Salt Bae ត្រូវបានគេស្គាល់ថា ជាចុងភៅនិងជាម្ចាស់ភោជនីយដ្ឋានលក់សាច់ Steak ដល់ល្បីឈ្មោះនៅឯប្រទេសទួរគី។ ចំណុចដ៏គួរឲ្យចាប់អារម្មណ៍របស់បុរសវ័យ ៣៧ ឆ្នាំ គឺលោកមានកាយសម្បទាមើលទៅយ៉ាងសង្ហារ ហើយក្រោយពេលលើកសាច់ Steak មកដល់តុភ្ញៀវ លោករមែងប្រើស្តាយ៍យកដៃរោយអំបិល ដែលវាបានក្លាយជាទំនោរដ៏ពេញនិយមមួយពាសពេញសកលលោក។
លោក Gokceបានចាប់ផ្ដើមបើកដំណើរការភោជនីយដ្ឋានទី ១ របស់ខ្លួននៅឯទីក្រុង Istanbul ប្រទេសទួរគី តាំងពីឆ្នាំ ២០១០ មកម្ល៉េះ តែទើបមកដល់ដើមឆ្នាំ ២០១៧ នេះទេ កេរឈ្មោះរបស់លោកហាក់ចាប់ឡើងកូដខ្លាំង តាមរយៈវីដេអូដែលចែកចាយបន្តបន្ទាប់លើបណ្តាញសង្គម ពាក់ព័ន្ធនឹងស្ទាយនៃការកាត់សាច់ និងការរោយអំបិលដែលមើលទៅគួរឲ្យអស់សំណើច។ វីដេអូនោះទទួលបានការទស្សនាច្រើនជាង ១០ លានដង ហើយមកទល់ពេលនេះគណនី Instagram របស់ Salt Bae មានការចុច Follow ជាង ៣៦ លានដងឯណោះ។
ទំនោរនេះក៏បានអូសទាញមេដឹកនាំពិភពលោកធំៗ និងបុគ្គលល្បីៗជាច្រើននៅគ្រប់វិស័យ ឲ្យចាយពេលនិងថវិកាមកហាងរបស់លោកដើម្បីភ្លក់រសជាតិអាហារ និងចង់ឃើញស្ទាយរោយអំបិល ដ៏គួរឲ្យអស់សំណើចមួយនេះ។ ផ្សារភ្ជាប់ទៅក្នុងវិស័យកីឡាបាល់ទាត់ យើងក៏បានឃើញតារាឆ្នើមកំពូលជាច្រើនរូបផងដែរ ដែលធ្លាប់រំលេចវត្តមាននៅទីនោះ មិនថាតែហាងដែលមានទីតាំងនៅឌូបៃ, ទួរគី, សហរដ្ឋអាមេរិកនិងអង់គ្លេសជាដើម។
ខាងក្រោមយើងបង្ហាញរូបភាពនិងវីដេអូកីឡាករបាល់ទាត់ល្បីៗ ដែលធ្លាប់មានវត្តមាននៅភោជនីយដ្ឋានរបស់ Salt Bae មុនធ្វើការទម្លាយពីតម្លៃនៃអាហារមួយចំនួននៅទីនោះ៖
បើតាមការថតរូបភាពវិក្កយបត្រមួយសន្លឹកនៅហាង Nurs-Et របស់ Salt Bae ផ្ទាល់ ដែលអតិជន ៦ នាក់បានទៅទទួលទាន គឺពួកគេចំណាយអស់ជាង ៦ ពាន់ដុល្លារក្នុងមួយពេល។ ដោយនេះរាប់ទាំងតម្លៃស្រាក្រហម និងតម្លៃ Steak ក៏ដូចជាអាហារសម្រន់មួយចំនួន។ យើងសង្ខេបតម្លៃអាហារធំៗដូចខាងក្រោម៖
- កាហ្វេ Espresso មួយកែវតម្លៃ ៥,៩៥ ដុល្លារ
- ទឹកក្រូច Sprite តម្លៃ ១០ ដុល្លារ
- ប្រភេទសាច់ Steak ធម្មតា តម្លៃទូទៅចន្លោះពី ១០០ ទៅ ៣០០ ដុល្លារ
- សាច់ Steak ដែលមានរុំអាលុយមីញ៉ូមដូចជាមាស ១ ឈុតតម្លៃ ១ ០០០ ដុល្លារ
- ស្រា (ដូចបង្ហាញក្នុងរូប) តម្លៃ ១ ៥០០ ដុល្លារ/ដប
ដូច្នេះជាមធ្យមយើងអាចសន្មត់បានថា កីឡាករបាល់ទាត់ដែលទៅចង់ជួប Salt Bae ក៏ចាយយ៉ាងតូចចន្លោះពី ១ ពាន់ ទៅ ២ ពាន់ដុល្លារ ឬច្រើនជាងនោះសម្រាប់អាហារមួយពេល។ ប៉ុន្តែសម្រាប់ពួកគេអាចមិនជាបញ្ហាអ្វីទេ ព្រោះកាកលុយត្រឹមប៉ុណ្ណឹងៗ ដកដង្ហើមចោលតែប៉ុន្មាននាទីក៏ល្មមកាត់កងគ្នារួច។ ចុះសម្រាប់គ្នាយើងវិញ យល់ឃើញបែបណាដែរ? តើមានបំណងចង់ទៅភ្លក់ Steak នៅទីនោះឬអត់?