ក្លឹបបិសាចក្រហមបានប្រកាសមុននេះបន្តិច អំពីការឈានដល់កិច្ចព្រមព្រៀងបន្តកុងត្រាថ្មីសម្រាប់អ្នកចាត់ការលោក Ole Gunnar Solskjaer ដល់ឆ្នាំ ២០២៤ ជាមួយនឹងសិទ្ធពិសេសនៃការបន្តរយៈពេល ១ ឆ្នាំបន្ថែម។
ការបន្តនេះ ធ្វើឡើងក្រោយពីក្លឹបមើលឃើញកិច្ចខិតខំប្រឹងប្រែង និងសមិទ្ធផលដែលបុរសសញ្ជាតិន័រវែសសម្រេចបានកន្លងមក ហើយក៏មិនឃើញមានបញ្ហារកាំរកូសជាមួយបណ្តាកីឡាករណានោះដែរ។ វាកើតឡើងក្រោយតែរយៈពេល ១ ថ្ងៃនៃការប្រកាសបង្ហាញខ្លួន Jadon Sancho ហើយត្រៀមនឹងប្រកាស Raphael Varane នៅពេលខាងមុខទៀតក៏ថាបាន។
បញ្ជាក់ថា លោក Solskjaer បានចូលមកដឹកនាំនៅ Old Trafford តាំងពីថ្ងៃទី ២៨ មិនា ឆ្នាំ ២០១៩ ដោយឆ្លងកាត់ ១៥១ ប្រកួត បុរសវ័យ ៤៨ ឆ្នាំ ដឹកនាំក្រុមឈ្នះ ៨៥ ស្មើ ៣២ និងចាញ់ ៣៤ ដោយរកបាន ២៩៥ គ្រាប់និងរបូត ១៥៩ គ្រាប់ ស្ថិតិ PPM គឺ ១,៩០។
តាមរយៈសេចក្តីថ្លែងការណ៍របស់ក្លឹបបានចុះផ្សាយថា៖ “Ole Gunnar Solskjaer បានចុះហត្ថលេខាលើកុងត្រាថ្មីនៅ Manchester United ដោយយើងនឹងឃើញគាត់ឈរជើងយ៉ាងហោចណាស់ដល់ឆ្នាំ ២០២៤ ជាមួយនឹងជម្រើសបន្តមួយឆ្នាំបន្ថែម ដោយ Ole និងក្រុមការងាររបស់គាត់ពិតជាខិតខំខ្លាំងសម្រាប់ជ័យជម្នះរយៈពេលយូរ ហើយលទ្ធផលដែលបង្ហាញចេញមក ២ រដូវកាលមកនេះ គឺយើងឃើញថាមានការកើនឡើង ដោយយើងក៏ទន្ទឹមរង់ចាំមើលការអភិវឌ្ឍបន្ថែមទៀតនៅឆ្នាំបន្ទាប់”៕
ប្រភព៖ BeSoccer