ក្នុងវិស័យកីឡាបាល់ទាត់រយៈពេលជាង ១ ទសវត្សចុងក្រោយនេះ សំណួរដែលយើងរមែងលឺច្រើនជាងគេគឺសួរថា “តើរវាង Cristiano Ronaldo និង Lionel Messi មួយណាល្អជាង”។ សំណួរចាក់ដោតនេះ ក៏បានចោទសួរទៅកាន់កីឡាកររួមអាជីពជាច្រើនផងដែរ ហើយ Mason Greenwood ជាអ្នកឆ្លើយចុងក្រោយកាលពីពេលថ្មីៗ។
យុវជនវ័យ ១៩ ឆ្នាំរបស់ក្លឹប Manchester United ដ្បិតបើជាកីឡាកររួមជើងនៅ Old Trafford ដូចគ្នានឹង Cristiano Ronaldo តែគេបែរជាជ្រើសយក Lionel Messi ហើយឆ្លើយដោយគ្មានការស្ទាក់ស្ទើរ។ ខ្សែប្រយុទ្ធស្លាបពាក់អាវលេខ ១១ បាននិយាយប្រាប់ MUTV ដូច្នោះថា៖ “សម្រាប់ខ្ញុំ តែងតែជ្រើសយក Messi ជាកីឡាករល្អបំផុត ព្រោះគាត់ប្រៀបដូចជាមនុស្សដែលមកពីភពមួយផ្សេងទៀតអ៊ីចឹង”។
Greenwood បន្ត៖ “Ronaldo តាមពិតទៅគឺអស្ចារ្យខ្លាំងណាស់ ទាំងកាយសម្បទាដែលសក្ដិសមជាអត្តពលិកដ៏ល្អមួយ ប៉ុន្តែបើយើងមើលទៅ Messi នូវអ្វីដែលគាត់សម្រេចបានជាមួយមាឌរបស់គាត់បែបហ្នឹង និងជោគជ័យសម្រាប់ក្លឹប Barcelona ក៏ដូចជាការឈ្នះពានរង្វាន់នៅជម្រើសជាតិអាហ្សង់ទីន គឺអាចនិយាយបាន ថាគាត់ស្ថិតនៅកម្រិតខ្ពស់មួយទៀតហើយ”។
ជ័យជម្នះឲ្យជម្រើសជាតិដែល Greenwood លើកឡើង គឺចង់សំដៅទៅពានរង្វាន់ Copa America ដែលវីរបុរសពាក់អាវលេខ ១០ ទើបតែសម្រេចបានជាលើកដំបូងនៅក្នុងអាជីព និងជាពានដំបូង ដែលអាហ្សង់ទីនខកខានយកបានតាំងពីឆ្នាំ ១៩៩៣។
ចំណុចនេះវាក៏ធ្វើឲ្យ Messi ហាក់រំកិលមកស្មើកម្រិត Ronaldo វិញដែរ ព្រោះកាលពីប៉ុន្មានឆ្នាំមុនមនុស្សជាច្រើន និយាយថា CR7 មានប្រៀប ក៏ដោយសារអាចជួយជម្រើសជាតិឈ្នះពានប្រចាំទ្វីប តួយ៉ាងគឺ Euro 2016 ឥឡូវ M10 ក៏បានលើក Copa America 2021 ជាមួយអាហ្សង់ទីន ដែលនាំឲ្យការវែកញែកនៅការលេងជម្រើសជាតិហាក់មានភាពស្មើគ្នា។ យ៉ាងណាសំណួរនេះ បើសួរមកកាន់ CTS Sports ក៏យើងមិនអាចឆ្លើយបានដែរ គ្រាន់ថាចម្លើយដ៏ល្អបំផុត គឺពួកគេល្អរៀងគ្នា ដោយ Messi ជាកីឡាករបាល់ទាត់ដែលមានទេពកោសល្យល្អដាច់គេពីធម្មជាតិ ហើយ Ronaldo ជាកីឡាករដែលមានការលុតដំខ្លួនខ្ពស់បំផុត សក្ដិសមជាគំរូដែលយុវជនជំនាន់ក្រោយៗគួរអនុវត្តតាម។
បន្តទៅការប្រៀបធៀបនេះដែរ CTS Sports ក៏សូមលើកឈ្មោះកីឡាករល្បីៗ ៦ រូប ដែលធ្លាប់បង្ហាញការយល់ឃើញ ហើយជ្រើសរើសវាង Ronaldo និង Messi៖
៦) Harry Kane
ធ្លាប់និយាយថា៖ “Cristiano Ronaldo គឺជាគំរូរបស់ខ្ញុំ គាត់បានស្ថិតនៅកម្រិតដ៏ខ្ពស់រយៈពេលយូរណាស់មកហើយ ខ្ញុំក៏ចង់ឈានដល់ចំណុចហ្នឹងដែរ”។ ចម្លើយ៖ គឺយក Ronaldo។
៥) Marcus Rashford
ធ្លាប់និយាយថា៖ “ដ្បិតខ្ញុំជាអ្នកគាំទ្រមួយរូបរបស់ Ronaldo តែខ្ញុំគិតថា Messi គឺជាកីឡាករល្អបំផុតគ្រប់ពេលវេលា”។ ចម្លើយគឺយក៖ Messi។
៤) Erling Haaland
ធ្លាប់និយាយថា៖ “ខ្ញុំពិតជាចង់ជួប Ronaldo ហើយប្រាប់គាត់ថា ខ្ញុំក្លាយជាកីឡាករបាល់ទាត់ដូចពេលនេះក៏ដោយសារតែគាត់ ព្រោះគាត់ជាគំរូរបស់ខ្ញុំ”។ ចម្លើយ៖ គឺយក Ronaldo។
៣) Kylian Mbappe
ធ្លាប់និយាយ៖ថា “Ronaldo គាត់ជា idol របស់ខ្ញុំតាំងតែពីខ្ញុំនៅតូច ហើយគាត់ក៏ជា idol របស់កីឡាករវ័យក្មេងជាច្រើនទៀតដែរ”។ ចម្លើយ៖ គឺយក Ronalod។
២) Christian Pulisic
ធ្លាប់និយាយថា៖ “វាពិតជាពិបាកការដែលឆ្លើយថា នរណាល្អជាងនរណា តែខ្ញុំសូមជ្រើសយក Messi ព្រោះពេលខ្ញុំធំធាត់ឡើង គាត់តែងតែជាកីឡាករដែលខ្ញុំចូលចិត្តបំផុត”។ ចម្លើយ៖ គឺយក Messi។
១) Neymar
ធ្លាប់និយាយថា៖ “ខ្ញុំបានលេងជាមួយ Messi ជាកីឡាករដែលល្អបំផុតគ្រប់ពេលវេលា ហើយគាត់ជា idol របស់ខ្ញុំក្នុងវិស័យបាល់ទាត់”។ ចម្លើយ៖ គឺយក MEssi៕