កីឡាការិនីថៃវ័យក្មេង Supergirl Jaroonsak បានបង្ហើបឲ្យដឹងថា នាងចង់ជួបកីឡាការិនីអាមេរិកដែលពូកែកណ្តាប់ដៃ Jackie Buntan នៅលើសង្វៀន ONE ជាមួយនឹងគោលបំណងសំខាន់ពីរ។
អ្នកប្រដាល់ថៃអាយុទើប១៧ឆ្នាំ Jaroonsak ចង់សងសឹកឲ្យបងស្រីរបស់នាង Wondergirl ដែលបានចាញ់ក្រោមដៃរបស់កីឡាការិនីអាមេរិកយ៉ាងអស់ចិត្តបំផុត បន្ទាប់ពីតស៊ូគ្នា៣ទឹកស្ទើរតែសន្លប់ម្តងៗ និងត្រូវបានអាជ្ញាកណ្តាលរាប់៨ម្តង។ ជាមួយគ្នានេះ នាងចង់ផ្តល់មេរៀនឲ្យ Jackie Buntan ស្គាល់បរាជ័យលើកដំបូងនៅលើឆាកប្រដាល់ ONE។
សម្រាប់ការប្រកួតនៅសង្វៀន ONE កីឡាការិនី Supergirl បានប្រើពេលត្រឹមតែ៦០វិនាទីប៉ុណ្ណោះដើម្បីផ្តួលដៃគូ Milagros Lopez នៅចំពោះមុខអ្នកគាំទ្ររបស់ខ្លួនក្នុងទីក្រុងបាំងកក កាលពីខែកញ្ញា ឆ្នាំ២០២០។ បន្ទាប់ពីនោះមក នាងបានអភិវឌ្ឍខ្លួនយ៉ាងល្អដើម្បីឈានដល់កម្រិតមួយមិនអាចប៉ាន់ស្មានបាន ដូច្នេះហើយបានជានាងបង្ហើបឲ្យដឹងថា ចង់ជួបដៃគូខ្លាំងៗ។
នាងបាននិយាយថា ៖«ខ្ញុំរាល់ថ្ងៃនេះ សម្លឹងឆ្ពោះទៅការប្រកួតជាមួយ Jackie ដែលបានឈ្នះបងស្រីរបស់ខ្ញុំ»។ ដូច្នេះកម្លាំងជំរុញទឹកចិត្តរបស់នាងគឺចង់សងសឹកឲ្យបងស្រី។
កីឡាការិនីអាមេរិក Buntan កំពុងទទួលបានការចាប់អារម្មណ៍យ៉ាងខ្លាំងពីអ្នកគាំទ្រទូទាំងពិភពលោក ជាពិសេសអ្នកប្រដាល់ស្រីតែម្តងដែលចង់ជួបនាងនៅលើសង្វៀន បន្ទាប់ពីបានយកឈ្នះ Wondergirl និង Ekaterina Vandaryeva។
Jaroonsak បាននិយាយថា ៖«ខ្ញុំចង់ឲ្យខ្លួនឯងបានប្រកួតជាមួយដៃគូកម្រិតខ្ពស់។ ពុកខ្ញុំប្រាប់ថា ប្រសិនបើបានប្រកួតជាមួយដៃគូខ្លាំងៗ នោះយើងអាចកាន់តែល្អប្រសើរ»៕