ត្រឹមរយៈពេល ពីរបីខែក្រោយចាញ់ខ្សែក្រវាត់ ONE World Title ទី២របស់ខ្លួន Aung La “The Burmese Python” N Sang ចាប់ផ្ដើមជាថ្មីដើម្បីឆ្ពោះទៅដណ្ដើមខ្សែក្រវាត់ត្រលប់មកវិញ។
គេត្រលប់មកវិញនៅសង្វៀន ONE: BATTLEGROUND ដែលជាការប្រកួតបិទទ្វារ ផ្សាយផ្ទាល់ពីកីឡដ្ឋាន Singapore Indoor Stadium នៅថ្ងៃសុក្រទី ៣០ ខែ កក្កដា ខាងមុខនេះ។
វីរបុរសមីយ៉ាន់ម៉ា នឹងជួប Leandro “Wolf” Ataides ក្នុងការប្រកួតទម្ងន់ middleweight នៃក្បាច់គុនចម្រុះ ហើយនេះជាការប្រកួតដ៏សំខាន់ដើម្បីឆ្ពោះទៅត្រដែតឡើងវិញលើឆាកអន្តរជាតិ។
អតីតម្ចាស់ខ្សែក្រវាត់ ONE World Title ពីរគ្រឿងបានថ្លែងបែបនេះ៖«វាជាការតតាំងជោគជ័យ ឬ បរាជ័យសម្រាប់រូបខ្ញុំ។ ប៉ុន្តែ ខ្ញុំដឹងថា ខ្ញុំចូលមកនេះមានទំនុកចិត្តដោយសារក្រុមគ្រូបង្វឹករបស់ខ្ញុំបានបង្វឹកខ្ញុំយ៉ាងល្អ ហើយ ខ្ញុំមានទំនុកចិត្តថាខ្ញុំឈានដល់កម្រិតកំពូលវិញនៅក្នុងការប្រកួតនេះ»។អស់រយៈពេលជាច្រើនខែកន្លងទៅជាការឈឺចាប់បំផុតសម្រាប់ Aung La N Sang ព្រោះបាត់ប់ខ្សែក្រវាត់ពីរខ្សែបន្តបន្ទាប់។
កាលខែតុលា Reinier “The Dutch Knight” de Ridder បញ្ចប់រូបគេដោយក្បាច់ឃ្លេត្រឹមរយៈពេល ៣នាទីកន្លះ ដើម្បី គ្រងខ្សែក្រវាត់ ONE Middleweight World Championship។ បន្ទាប់មក នាខែមេសា “The Dutch Knight” យកឈ្នះតារាមីយ៉ាន់ម៉ាដោយពិន្ទុទៀតដើម្បីគ្រងខ្សែក្រវាត់ light heavyweight។
ទោះរហូតអស់ខ្សែក្រវាត់ពីរ ប៉ុន្តែ កីឡាករវ័យ ៣៦ ឆ្នាំរូបនេះនៅតែមានភាពវិជ្ជមាន និងបង្កើតឱកាសត្រលប់ទៅរកភាពខ្លាំងរបស់ខ្លួនជាថ្មី។
Aung La N Sang បានបន្តថា ៖«វាជាការខកចិត្តមួយ និងអស់សង្ឃឹមណាស់។ ប៉ុន្តែ អ្នកត្រូវតែវិភាគការប្រកួតឡើងវិញថាតើត្រូវកែលម្អចំណុចណាស និងធ្វើឲ្យប្រសើរចំណុចណា។ ផ្នត់គំនិតរបស់ខ្ញុំ គឺ ធ្វើឲ្យកាន់តែរីកចម្រើន។ ដូច្នេះ ខ្ញុំត្រូវតែធ្វើការត្រង់ចំណុចដែលមិនល្អកន្លងមក។ វាជាការរៀនសូត្រសម្រាប់ខ្ញុំ។ វាមិនអីទេ។ ភាពខកចិត្ត គឺជាមេរៀននៅក្នុងជីវិត»។
Aung La N Sang បានទស្សនាវីដេអូពេលចាញ់រហូតដល់របូតខ្សែក្រវាត់រួចទៅហើយ។ រូបគេខំហ្វឹកហាត់ឡើងវិញនៅក្លិប Sanford MMA នារដ្ឋផ្លរីដា សហរដ្ឋអាមេរិក ដើម្បីស្ដារកិត្តិយសឡើងវិញ។
កីឡាករមីយ៉ាន់ម៉ាគូសបញ្ជាក់ ៖«ខ្ញុំត្រូវតែអភិវឌ្ឍចំណុចអាក្រក់របស់ខ្ញុំ, ត្រូវច្បាស់ក្នុងចិត្តថាវាល្អឡើងវិញ, និងផ្ដោតលើការរៀបចំផែនការរកចំណុចខ្សោយរបស់គូប្រកួត»។
ជំនាញចំបាប់របស់តារាមីយ៉ាន់ម៉ានឹងត្រូវតេស្តសមត្ថភាពដោយ Ataides បន្ទាប់ពីរូបគេចាញ់ដោយថ្វីដៃ De Ridder ក្នុងលទ្ធផលពិន្ទុមិនឯកច្ឆន្ទកាលខែ កុម្ភៈ ឆ្នាំ ២០២០។
គួរដឹងថា “Wolf” គឺជាជើងឯក Brazilian Jiu-Jitsu World Champion ៥សម័យ ប៉ុន្តែ រូបគេក៏មានជំនាញប្រើកណ្ដាប់ដៃផ្ដួលគូប្រកួតផងដែរ។ ជាងពាក់កណ្ដាលនៃជ័យជម្នះ ១១ លើករបស់គេកើតឡើងដោយសារផ្ដួលដៃគូឲ្យសន្លប់។
យ៉ាងណាក្ដី វាមិនធ្វើ “The Burmese Python” ភ័យខ្លាចនោះឡើយ ។ Aung La N Sang ពិពណ៌នា ៖«Ataides មានចំណុចខ្សោយក្នុងក្បាច់ប្រយុទ្ធរបស់គេ។ ខ្ញុំគិតថា គេនឹងធ្វើការផ្នែកចំបាប់ ច្រើន ប៉ុន្តែ ខ្ញុំនឹងល្អប្រសើរជាង»។
ក្នុងការរៀបចំសម្រាប់ជំនួបទម្ងន់ middleweight ជើងខ្លាំង Ataides ធ្វើដំណើរទៅបរទេសដើម្បីហ្វឹកហាត់ជាមួយ De Ridder នៅក្លិប Combat Brothers នៅក្រុង Breda ប្រទេសហូឡង់។
អតីតម្ចាស់ខ្សែក្រវាត់ពីរបញ្ចេញទស្សនៈលើ Ataides បែបនេះ ៖«វាល្អសម្រាប់រូបគេ ។ ប្រហែល [De Ridder] នឹងប្រាប់អ្នកអំពីរឿងសម្ងាត់ដើម្បីផ្ដួលខ្ញុំហើយមើលទៅ។ ប្រហែល គេនឹងបង្ហាត់អ្នកអំពីការទាត់ និងគាបជើងដាក់ខ្ញុំហើយមើលទៅ»។
យ៉ាងណាក្ដី “The Burmese Python” មិនបារម្ភទាល់តែសោះចំពោះអ្វីដែល “The Dutch Knight” បង្ហាត់ដល់ Ataides នៅហូឡង់។ តារាដដែលបានរៀនអំពីកំហុស ហើយរៀបចំផែនការឡើងវិញពេលជួបតារាប្រេស៊ីលនោសិង្ហបុរី។
Aung La N Sang មានជំនឿបែបនេះ ៖«ខ្ញុំជឿថាខ្ញុំធ្វើបានល្អជាងក្នុងការប្រើជំហរ ហើយខ្ញុំអាចបញ្ចប់ចំបាប់និងការចាប់របស់គេបាន។ ខ្ញុំយល់ឃើញថា ការប្រកួតនេះនឹងចាញ់ឈ្នះដោយក្បាច់ឈរ និងការប្រើល្បឿន។ ហើយវាច្បាស់បញ្ចប់ទៅដោយសន្លប់»។
Aung La N Sang ជួបរឿងក្រៀមក្រំជាច្រើនខែហើយ ប៉ុន្តែ គេមានទំនុកចិត្តថាអាចត្រលប់មកល្អវិញ។
នៅថ្ងៃទី ៣០ កក្កដា គឺជាជំហានធំមួយដើម្បីឡើងទៅដណ្ដើមខ្សែក្រវាត់ឡើងវិញ។
Aung La N Sang សង្កត់ធ្ងន់ ៖«ខ្ញុំមិនមានមន្ទិលក្នុងចិត្តទេថា ខ្ញុំនឹងឈានទៅយកខ្សែក្រវាត់ middleweight របស់ខ្ញុំមកវិញ។ ខ្ញុំនឹងព្យាយាមធ្វើវាឲ្យបាន។ ខ្ញុំនឹងយកខ្សែក្រវាត់របស់ខ្ញុំមកវិញ»។