ត្រលប់ទៅឆ្នាំ ២០០២ នៃព្រឹត្តិការណ៍ FIFA World Cup កាលនោះគឺប្រទេសជប៉ុន និងកូរ៉េខាងត្បូង បានទទួលសិទ្ធធ្វើជាម្ចាស់ផ្ទះ ដែលវាក៏ចាប់ផ្តើមធ្វើឲ្យពិភពលោកមានការចាប់អារម្មណ៍ និងទទួលស្គាល់ការអភិវឌ្ឍផ្នែកវិស័យកីឡាបាល់ទាត់នៅបណ្ដាប្រទេសក្នុងតំបន់អាស៊ី។
រយៈពេលជាង ២ ទសវត្សចុងក្រោយ យើងឃើញថាក៏មានកីឡាករល្អៗជាច្រើន ដែលមានដើមកំណត់នៅប្រទេសក្នុងតំបន់អាស៊ី បានវិវត្តខ្លួនទៅចូលរួមនៅក្លឹបកំពូលក្នុងតំបន់អឺរ៉ុប។ ភាគច្រើនដូចជាកីឡាកររបស់ប្រទេសជប៉ុន កូរ៉េខាងត្បូង អារ៉ាប៊ីសាអ៊ូឌីត អ៊ីរ៉ង់ និងអូស្ត្រាលីជាដើម។
ដើម្បីចូលរួមគាំទ្រវិស័យបាល់ទាត់នៅតំបន់អាស៊ី យើងសូមច្បិចលើកមកបង្ហាញនូវជ្រុងមួយពាក់ព័ន្ធនឹងកីឡាករអាស៊ី ៥ រូបដែលធ្លាប់មានតម្លៃផ្ទេរខ្ពស់បំផុតក្នុងប្រវត្តិសាស្ត្រ។ បញ្ជាក់៖ នេះជាតម្លៃដែលបានផ្ទេរចេញជាផ្លូវការ ខុសគ្នាពីហាងឆេងថ្លៃខ្លួនលើទីផ្សារដោះដូរ។
៥) កីឡាករជប៉ុន Shinji Kagawa
ក្រោយបង្ហាញទម្រង់លេងយ៉ាងល្អឲ្យក្លឹប Cerezo Osaka នៅឯប្រទេសជប៉ុន Kagawa ក៏ត្រូវបានក្លឹបនៅតំបន់អឺរ៉ុបមើលឃើញ ហើយដល់ឆ្នាំ ២០១០ ក្លឹប Borussia Dortmund ជាអ្នកជោគជ័យដំបូងគេលើការចរចានាំយកខ្សែបម្រើប្រយុទ្ធ ជាមួយលក្ខខណ្ឌផ្ទេរឥតតម្លៃខ្លួន។
លុះមកដល់ឆ្នាំ ២០១២ ក៏ជាពេលដែល Kagawa កាន់តែឡើងជើងខ្លាំង ហើយក៏ត្រូវបានក្លឹប Manchester United ចរចាទិញយកគេមក Old Traffordនៅតម្លៃ ១៦ លានអឺរ៉ូ។ គ្រប់យ៉ាងមិនដូចការរំពឹងទុក រយៈពេល ២ ឆ្នាំនៅបិសាចក្រហម Kagawa រកបានតែ ៦ គ្រាប់និង Assist ១០ លើកប៉ុណ្ណោះ។
៤) កីឡាករអ៊ីរ៉ង់ Alireza Jahanbakhsh
ខ្សែប្រយុទ្ធស្លាបសញ្ជាតិអ៊ីរ៉ង់ បានវិវត្តខ្លួនចេញពីក្លឹបនៅប្រទេសកំណើត មកកាន់ក្លឹប AZ Alkmaar នៅឆ្នាំ ២០១៥ ជាមួយតម្លៃផ្ទេរ ១,៨០ លានអឺរ៉ូ។ ក្រោយឆ្លងកាត់ការអភិវឌ្ឍបន្ថែមរយៈពេល ៣ ឆ្នាំ Alireza ក៏ត្រូវបានក្លឹបនៅអង់គ្លេស Brighton មើលឃើញពីសមត្ថភាព ហើយហ៊ានចំណាយដល់ ១៩ លានអឺរ៉ូលើនាំយករូបគេចេញពីទឹកដីហូឡង់។
ជោគវាសនារបស់គេនៅ Brighton កាន់តែដុនដាបជាង Kagawa ជាមួយ Man Utd ទៅទៀត ដោយបុរសវ័យ ២៧ ឆ្នាំ រកបានតែ ៤ គ្រាប់ និង Assist ២ លើកគត់នៅការបង្ហាញខ្លួន ៦១ ប្រកួត។ កន្លងទៅនៅថ្ងៃទី ១៧ កក្កដា Brighton ក៏សម្រេចលក់គេចេញទៅវិញ ឲ្យក្លឹប Feyenoord របស់ហូឡង់ ជាមួយតម្លៃត្រឹមតែ ១,១០ លានអឺរ៉ូ។
៣) កីឡាករជប៉ុន Hidetoshi Nakata
ប្រហែលជាមិនសូវមានអ្នកស្គាល់កីឡាករចូលនិវត្តម្នាក់នេះទេ ប៉ុន្តែត្រលប់ទៅដើមទសវត្សឆ្នាំ ២០០០ ពេលនោះគេបានរង្គើពិភពបាល់ទាត់ជាខ្លាំង។
ក្រោយមកលេងឲ្យក្លឹបនៅអ៊ីតាលីដំបូង គឺជាមួយ Perugia គេជាខ្សែបម្រើដែលជំនាញក្នុងការបង្កើតឱកាស ហើយត្រឹមតែពេលជាង ១ ឆ្នាំក្លឹប AS Roma ហ៊ានចរចានាំយកនៅតម្លៃជាង ២១ លានអឺរ៉ូ។ តម្លៃនេះមិនទាន់ឡើងអស់នោះទេ ដោយរំលងជាងមួយឆ្នាំកន្លះ ក្លឹប AC Parma នៅអ៊ីតាលីដដែល ហ៊ានឲ្យ Roma ចំណេញពីលើនោះជិត ៧ លានអឺរ៉ូថែមទៀត ពោលគឺបានចាយ ២៨,៤០ លានអឺរ៉ូ លើការនាំយក Nakata។
២) កីឡាករកូរ៉េខាងត្បូង Son Heung-min
នៅឆ្នាំ ២០១៥ ខ្សែប្រយុទ្ធស្លាបរបស់ក្លឹប Bayer Leverkusen បានបំបែកកំណត់ត្រាកីឡាករអាស៊ីមានតម្លៃផ្ទេរខ្ពស់បំផុត ដោយថ្លៃដល់ទៅ ៣០ លានអឺរ៉ូ ក្រោយ Spurs ចរចាត្រូវរ៉ូវនាំយកមកទឹកដីអង់គ្លេស។
ក្នុងចំណោមអ្នកទាំង ៥ យើងអាចនិយាយថា Son ជាកីឡាករជោគជ័យបំផុត ដោយនៅការបង្ហាញខ្លួន ២៨០ ប្រកួត គេរកបាន ១០៧ គ្រាប់និង Assist ៦៤ លើក។ បើក្លឹប Spurs ព្រមលក់គេចេញពេលនេះ តម្លៃខ្លួនរបស់កីឡាករពាក់អាវលេខ ៧ អាចឡើងដល់ ៨៥ លានអឺរ៉ូឯណោះ។
១) កីឡាករជប៉ុន Shoya Nakajima
គ្រប់គ្នាហាក់មានការភ្ញាក់ផ្អើលខ្លាំង នៅពេលដែលក្លឹបក្នុងប្រទេសកាតា Al-Duhail SC ហ៊ានចាយដល់ ៣៥ លានអឺរ៉ូ លើការនាំយក Nakajima ចេញពីក្លឹប Portimonense កាលពីឆ្នាំ ២០១៩។
នេះជាតម្លៃបំបែកកំណត់ត្រាខ្ពស់ជាងគេបង្អស់ហើយ តែបើនិយាយពីសមិទ្ធផលដែលក្លឹបកាតាទទួលបាន គឺមិនសមនឹងតម្លៃទាល់តែសោះ។ ចាយពេលបានត្រឹម ១៣ ប្រកួត រកបាន ២ គ្រាប់ Nakajima ក៏ត្រូវបានផ្ទេរចេញមកឲ្យ Porto វិញនៅតម្លៃខាត ១ ទ្វេជា ២ ហើយបន្តឈរជើងមកទល់បច្ចុប្បន្ន៕
ប្រភព៖ TransferMarkt