ព្រឹត្តិការណ៍កីឡាអូឡាំពិករដូវក្តៅឆ្នាំ ២០២០ ដែលលើកពេលមកធ្វើនៅឆ្នាំ ២០២១ នេះ សម្រាប់ផ្នែកកីឡាបាល់ទាត់បុរស គឺនឹងចាប់ផ្តើមប្រកួតពីថ្ងៃទី ២១ កក្កដា ដល់ ៧ សីហា ដែលមានទីក្រុងទាំង ៥ របស់ប្រទេសជប៉ុនធ្វើជាម្ចាស់ផ្ទះ។
ក៏ជឿថា អ្នកគាំទ្រភាគច្រើននៅមិនទាន់ដឹងនោះឡើយ ថារូបមន្តនៃដំណើរការកីឡាអូឡាំពិកគេរៀបចំបែបណា ហើយក្រុមណាខ្លះដែលអនុញ្ញាតឲ្យចូលរួម មានការដាក់កំហិតអ្វីខ្លះ និងពេលវេលាប្រកួត តើទាមទារឲ្យអ្នកគាំទ្រនៅកម្ពុជាយើងត្រូវដាច់យប់ដូចនៅព្រឹត្តិការណ៍ Euro ឬយ៉ាងណា? តទៅនេះ CTS Sports ធ្វើការបង្ហាញ ៣ ចំណុចសំំខាន់ដូចខាងក្រោម៖
១) ប្រវត្តិដំណើរការផ្នែកបាល់ទាត់ នៅកីឡាអូឡាំពិករដូវក្ដៅ
សម្រាប់បាល់ទាត់ផ្នែកនារី គឺគ្មានការដាក់កំហិតនោះទេ តែសម្រាប់ផ្នែកបុរសគឺតម្រូវឲ្យកីឡាករនៃក្រុមនីមួយៗ ត្រូវមានអាយុក្រោម ២៣ ឆ្នាំ ហើយលើកលែងអ្នកដែលលើសអាយុ ២៣ ឆ្នាំឡើងទៅ តែ ៣ រូបប៉ុណ្ណោះក្នុងមួយក្រុម។ ដូច្នេះមានន័យថា កីឡាករនៅជម្រើសជាតិនីមួយៗដែលអាចចូលរួមបានជាទូទៅត្រូវកើតនៅថ្ងៃទី ១ មករា ឆ្នាំ ១៩៩៧ ឬក្រោយនោះ។
ច្បាប់នៃការកំណត់អាយុកីឡាករ គឺឈរលើគោលដៅធំ ២ ទី ១) គឺមិនចង់ឲ្យកីឡាអូឡាំពិកក្លាយជាស្រមោលនៃព្រឹត្តិការណ៍ World Cup ពោលចង់បែងចែកឲ្យខុសស្រឡះពីគ្នា និងទី ២) គឺដើម្បីផ្តល់ឱកាសសម្រាប់កីឡាករវ័យក្មេង ក្នុងការបង្ហាញសមត្ថភាពរបស់ពួកគេទៅក្នុងព្រឹត្តិការណ៍លំដាប់អន្តរជាតិ។
បញ្ជាក់ថា កីឡាបាល់ទាត់នៅអូឡាំពិករដូវក្តៅ គឺបានបង្កើតឡើងតាំងពីឆ្នាំ ១៩០០ ហើយធ្វើរៀងរាល់ ៤ ឆ្នាំម្តង ដូចជា World Cup អ៊ីចឹងដែរ។ ប៉ុន្តែទើបតែមកដល់ឆ្នាំ ១៩៩២ នេះទេ មានការដាក់កំហិតនៅអាយុកីឡាករដែលត្រូវចូលរួម។
២) រូបមន្តដំណើរការប្រកួត
សរុបទាំងអស់មាន ១៥ ក្រុមដែលជម្រុះចេញពីសហព័ន្ធនៃទ្វីបទាំង ៦ ក្នុងសកលលោក ហើយបូក ១ ក្រុមដែលជាម្ចាស់ផ្ទះ ដូច្នេះស្មើនឹង ១៦ ក្រុម។ សារនេះជប៉ុន ជាក្រុមដែលទទួលបានសិទ្ធពិសេសចូលរួម នាមជាម្ចាស់ផ្ទះ ហើយក្រុមឯទៀតមានដូចជា:
៤ កៅអីសម្រាប់ទ្វីបអឺរ៉ុប រួមមានបារាំង, អាល្លឺម៉ង់, រ៉ូម៉ានី និងអេស្ប៉ាញ
១ កៅអីសម្រាប់ទ្វីបអូសេអានី មាននូវែលហ្សេឡង់
៣ កៅអីសម្រាប់ទ្វីបអាហ្រ្វិក មានអេហ្សីប អាហ្វ្រិកខាងត្បូង និងកូឌីវ័រ
៣ កៅអីសម្រាប់ទ្វីបអាស៊ី មានអូស្ត្រាលី អារ៉ាប៊ីសាអ៊ូឌីត និងកូរ៉េខាងត្បូង
២ កៅអីសម្រាប់ទ្វីបអាមេរិកខាងត្បូង មានអាហ្សង់ទីននិងប្រេស៊ីល
២ កៅអីសម្រាប់ទ្វីបអាមេរិកខាងជើង,កណ្តាលនិងការីបៀន មានម៉ិកស៊ីកូ និងហុងឌុយរ៉ាស់
ក្រុមទាំងអស់នឹងបែងចែកទៅជា ៤ ពូលពីពូល A ដល់ពូល D ហើយក្នុង ១ ពូលជម្រុះយកពី ២ ក្រុម ដោយឆ្លងកាត់ការប្រកួតទល់ក្រុមនីមួយៗស្មើនឹង ៣ ប្រកួត (បញ្ជាក់៖ ប្រកួតតែ ១ ជើងដូចនៅ Euro)។ ដូច្នេះនឹងមាន ៨ ក្រុមឡើងទៅវគ្គ Knockout Stage ហើយលេងដូចនៅ Euro ១ ជើងយកឈ្នះចាញ់ បើស្មើ ៩០ នាទីគឺថែមម៉ោង ១៥ នាទីពីរដង ឬឈានដល់ការស៊ុតប៉េណាល់ទី។ ប៉ុន្តែនៅកីឡាអូឡាំពិករដូវក្តៅ គឺមានការប្រកួតយកក្រុមឈ្នះមេដាយមាស មេដាយប្រាក់ និងមេដាយសម្រិត ដូច្នេះមានន័យថា ក៏នឹងមានការប្រកួតមួយផ្សេងទៀតដើម្បីយកក្រុមលេខ ៣។
៣) សម្រង់កាលបរិច្ឆេទប្រកួតសំខាន់ៗ
តាមពិតទៅសរុបនៅវគ្គចែកពូលគឺមាន ២៤ ប្រកួត តែយើងសូមចម្រាញ់យកកាលបរិច្ឆេទ ១០ ប្រកួតមកបង្ហាញ ខណៈដែលពេលវេលាប្រកួតនៅព្រឹត្តិការណ៍កីឡាអូឡាំពិករដូវក្តៅ គឺធ្វើឡើងនៅចន្លោះម៉ោង ២:៣០ នាទីរសៀល ដល់ម៉ោង ៦:៣០ នាទីល្ងាច។ ការប្រកួតក៏នឹងមានផ្សាយផ្ទាល់លើទំព័រ CTS Sports។
អេហ្សីប ប៉ះ អេស្ប៉ាញ វេលាម៉ោង ២:៣០ នាទីរសៀល ថ្ងៃទី ២២ កក្កដា
អាហ្សង់ទីន ប៉ះ អូស្រ្តាលី វេលាម៉ោង ៥:៣០ នាទីល្ងាច ថ្ងៃទី ២២ កក្កដា
ប្រេស៊ីល ប៉ះ អាល្លឺម៉ង់ វេលាម៉ោង ៦:៣០ នាទីល្ងាច ថ្ងៃទី ២២ កក្កដា
បារាំង ប៉ះ អាហ្រ្វិកខាងត្បូង វេលាម៉ោង ៣:០០ នាទីល្ងាច ថ្ងៃទី ២៥ កក្កដា
អេស្ប៉ាញ ប៉ះ អូស្រ្តាលី វេលាម៉ោង ៥:៣០ នាទីល្ងាច ថ្ងៃទី ២៥ កក្កដា
ជប៉ុន ប៉ះ មិកស៊ីកូ វេលាម៉ោង ៦:០០ នាទីល្ងាច ថ្ងៃទី ២៥ កក្កដា
អារ៉ាប៊ីសាអូឌីត ប៉ះ អាល្លឺម៉ង់ វេលាម៉ោង ៦:៣០ នាទីល្ងាច ថ្ងៃទី ២៥ កក្កដា
អារ៉ាប៊ីសាអូឌីត ប៉ះ ប្រេស៊ីល វេលាម៉ោង ៣:០០ នាទីរសៀល ថ្ងៃទី ២៨ កក្កដា
អេស្ប៉ាញ ប៉ះ អាហ្សង់ទីន វេលាម៉ោង ៦:០០ នាទីល្ងាច ថ្ងៃទី ២៨ កក្កដា
បារាំង ប៉ះ ជប៉ុន វេលាម៉ោង ៦:៣០ នាទីល្ងាច ថ្ងៃទី ២៨ កក្កដា
ហាមដាច់ខាតក្នុងការយកអត្ថបទពី CTS Sports ទៅចែកចាយបន្ត ឬផលិតជាវីដេអូ!