និយាយពីសត្វចិញ្ចឹមមនុស្សយើងម្នាក់ៗមានចំណូលចិត្តខុសប្លែកពីគ្នា គ្រាន់ថាជាទូទៅគេនិយមចិញ្ចឹមសត្វឆ្កែ និងឆ្មាជាដើម។ ដោយឡែកងាកមកក្នុងវិស័យកីឡាបាល់ទាត់ ក៏មានកីឡាករខ្លះចិញ្ចឹមឆ្កែឆ្មាដូចគេឯង ហើយខ្លះទៀតប្លែកខុសពីគេ បែរជាទៅចិញ្ចឹមជ្រូក និងសត្វលាជាដើមទៅវិញ។
ខាងក្រោមយើងបង្ហាញឲ្យស្គាល់នូវសត្វចិញ្ចឹមរបស់កីឡាករបាល់ទាត់ល្បីទាំង ៥ រូប៖
៥) Lionel Messi
កីឡាករអាហ្សង់ទីនគួរតែមានឈ្មោះក្នុងបញ្ជីមួយនេះដែរ ព្រោះពូជឆ្កែបារាំង Dogue de Bordeaux បានរស់នៅជាមួយលោកច្រើនឆ្នាំមកហើយ។ បើតាមដឹងឆ្កែដែលមានឈ្មោះ “Sensor Hulk” មួយនេះ បានមកក្លាយជាសមាជិកក្នុងផ្ទះរបស់ Messi តាំងពីឆ្នាំ ២០១៦។
សត្វឆ្កែដ៏គួរឲ្យស្រលាញ់មួយក្បាលនេះ មានទម្ងន់ប្រហែល ៥៤-៦៥ គីឡូក្រាម ហើយកម្ពស់ក្បែរ ៦០-៦៧ សង់ទីម៉ែត្រ។
៤) Mohamed Salah
ចំណូលចិត្តរបស់ Salah ខុសពី Messi, Marcelo និង Ozil ដែលស្រលាញ់សត្វឆ្កែ ពោលសម្រាប់កីឡាករអេហ្សីបបែរជាស្រលាញ់សត្វឆ្មា។ Salah ជាមនុស្សម្នាក់ដែលប្រឆាំងដាច់ខាតនៅការជួញដូរសត្វឆ្កែនិងឆ្មា ដោយលោកធ្លាប់បាននិយាយកាលពីឆ្នាំ ២០១៨ ថា ទង្វើបែបហ្នឹងមិនគួរកើតមានតទៅឡើយក្នុងពិភពលោកយើងនេះ។
កីឡាកររបស់ Liverpool មានសត្វឆ្មាពីរក្បាល ដែលទាំងសម្បុរនិងរូបរាងគឺដូចជាឆ្មាភ្លោះ ហើយវាមានគ្រាប់ភ្នែកពណ៌ខៀវ ដោយសត្វចិញ្ចឹមទាំងពីរក្បាលនេះរស់នៅជាមួយ Salah រយៈពេលជាង ៣ ឆ្នាំមកហើយ។
៣) Kai Havertz
តាមពិតទៅ Havertz ក៏ជាមនុស្សដែលស្រលាញ់សត្វឆ្កែដូចគេឯទៀតដែរ តែក្រៅពីនោះចំណូលចិត្តមួយទៀតរបស់លោកគឺជាមួយសត្វលា។ កីឡាករសញ្ជាតិអាល្លឺម៉ង់បានអំណោយនៅថ្ងៃខួបកំណើតអាយុ ៩ ឆ្នាំម្តង និង១៧ ឆ្នាំម្តង ពីឪពុកម្តាយរបស់គេ គឺជាសត្វលា ហើយសរុបមកទល់ពេលនេះមានចំនួន ៤ ក្បាលហើយ។ Havertz ធ្លាប់និយាយថា៖ “ខ្ញុំស្រលាញ់សត្វលាខ្លាំងណាស់ ហើយតាំងពីនៅតូច ខ្ញុំធ្លាប់ប្រាប់ឪពុកម្ដាយខ្ញុំថាចង់មានកសិដ្ឋានចិញ្ចឹមសត្វលាមួយ”។
២) Thomas Muller
Muller មានសត្វចិញ្ចឹម ដែលជាសត្វសេះ ឈ្មោះថា Dave ហើយលោកនិងភរិយាហាក់ស្រលាញ់សត្វសេះនោះខ្លាំងណាស់។ ភរិយារបស់កីឡាករក្លឹប Bayern Munich អ្នកស្រី Lisa Muller ធ្លាប់បាននិយាយថា៖ “Thomas គាត់ស្រលាញ់សត្វសេះខ្លាំងណាស់ ដោយគាត់ដឹងពីសេះច្រើនជាងបាល់ទាត់ទៅទៀត ហើយពេលនៅជាមួយខ្ញុំ យើងតែងតែនិយាយពីរឿងរ៉ាវសត្វសេះដែលយើងចិញ្ចឹម ច្រើនជាងនិយាយអំពីបាល់ទាត់”។
វាហាក់ដូចជានិស្ស័យតាមពិតទៅទាំង ប្តីនិងប្រពន្ធសុទ្ធតែស្រលាញ់សត្វសេះដូចគ្នា ហើយខាងភរិយាអ្នកស្រី Lisa ក៏ថែមទាំងមានបំណងចង់ចូលរួមកីឡាប្រណាំងសេះនៅកីឡាអូឡាំពិកទៀតផង ប្រសិនជាមានឱកាស។
១) Mario Balotelli
អតីតខ្សែប្រយុទ្ធលេងកាច Mario Baloteelli ជឿថាប្រហែលមានអ្នកស្គាល់ច្រើន ហើយបើនិយាយដល់សត្វចិញ្ចឹមរបស់លោក ក៏ចម្លែកខុសពីគេដែរ នោះគឺជាសត្វជ្រូក។ កីឡាករអ៊ីតាលីដាក់ឈ្មោះឲ្យជ្រូកមួយក្បាលនេះថា “Super”។
កាលពីឆ្នាំ ២០១៤ ពេលលោកត្រូវផ្ទេរមកកាន់ក្លឹប Liverpool ពេលនោះក៏មានរឿងរកាំរកូសបន្តិចដែរ ដែលនាំឲ្យមានការយឺតយ៉ាវក្នុងការធ្វើដំណើរ ក៏ដោយសារតែរដ្ឋាភិបាលអង់គ្លេសទាមទារឲ្យបញ្ជាក់ឯកសារមួយចំនួន ដើម្បីនាំយកជ្រូកមួយក្បាលនោះមកជាមួយ តែចុងក្រោយ Balotelli នៅតែអាចនាំយកវាមកបាន។ យ៉ាងណាមកទល់បច្ចុប្បន្ន យើងមិនច្បាស់នោះទេថា បុរសវ័យ ៣០ ឆ្នាំនៅបន្តចិញ្ចឹម Super Pig មួយនោះទៀតឬអត់៕
ប្រភព៖ AF