កីឡាករឥតតម្លៃខ្លួន គឺសំដៅទៅដល់កីឡាករណាដែលអស់សុពលភាពកុងត្រា ឬគ្មានជាប់កុងត្រាជាមួយក្លឹបអាណាព្យាបាលណាមួយ។ ជាទូទៅតម្លៃខ្លួនរបស់ពួកគេក៏នឹងមានការប្រែប្រួលឡើងចុះទៅតាមសុពលភាពកុងត្រារបស់ក្លឹប តែវាខុសគ្នានឹងហាងឆេងថ្លៃខ្លួនដែលក្រុមអ្នកវិភាគបានកំណត់មក។
ហាងឆេងថ្លៃខ្លួន គឺមិនខ្វល់ពីសុពលភាពកុងត្រាសល់ប៉ុន្មានទេ តែនិយាយពីកត្តាអាយុ និងគុណភាពរបស់ពួកគេ ដែលបានបង្ហាញចេញមក។ ប្រសិនក្លឹបណាអាចយកកីឡាកររូបនោះនៅការផ្ទេរឥតតម្លៃខ្លួន ហើយជាកីឡាករល្អផង នោះនឹងមានឱកាសចំណេញច្រើន ព្រោះក្រោយពេលចុះហត្ថលេខាកុងត្រា នោះតម្លៃរបស់ពួកគេក៏នឹងឡើងខ្ពស់ផ្អែកទៅតាមហាងឆេងដែលគេកំណត់នោះឯង។
ជាក់ស្តែងដូចជា Gianluigi Donnarumma ដែលអស់សុពលភាពពីក្លឹប AC Milan គឺគ្មានតម្លៃខ្លួននោះទេ កំឡុងការផ្ទេរមក PSG តែក្រោយចុះហត្ថលេខាកុងត្រារយៈពេល ៥ ឆ្នាំជាមួយក្លឹបសេដ្ឋីបារាំង និយាយពីតម្លៃខ្លួនរបស់គេគឺអាចឡើងដល់ ៦០ លានអឺរ៉ូ បើផ្អែកតាមហាងឆេងទីផ្សារដោះដូរ។
ខាងក្រោមយើងបង្ហាញកីឡាករដែលមានហាងឆេងខ្ពស់បំផុតទាំង ៧ កំឡុងការផ្ទេរឥតតម្លៃខ្លួន៖
Gianluigi Donnarumma ផ្ទេរទៅ PSG មានហាងឆេងតម្លៃ ៦០ លានអឺរ៉ូ
David Alaba ផ្ទេរទៅ Real Madrid មានហាងឆេងតម្លៃ ៥៥ លានអឺរ៉ូ
Robert Lewandowski ផ្ទេរទៅ Bayern Munich មានហាងឆេងតម្លៃ ៥០ លានអឺរ៉ូ
Memphis Depay ផ្ទេរទៅ Barcelona មានហាងឆេងតម្លៃ ៤៥ លានអឺរ៉ូ
Stefan de Vrij ផ្ទេរទៅ Inter Milan មានហាងឆេងតម្លៃ ៤០ លានអឺរ៉ូ
Leon Goretzka ផ្ទេរទៅ Bayern Munich មានហាងឆេងតម្លៃ ៤០ លានអឺរ៉ូ
Aaron Ramsey ផ្ទេរទៅ Juventus មានហាងឆេងតម្លៃ ៤០ លានអឺរ៉ូ
ប្រភព៖ GiveMeSports