ក្រុមកីឡាករ កីឡាការិនីជម្រើសជាតិកម្ពុជាលើប្រភេទកីឡា អត្តពលកម្ម និងហែលទឹក នឹងត្រូវចេញដំណើរចាកចេញពីប្រទេសកម្ពុជា នាវេលាម៉ោង ៩ និង៣៥នាទីព្រឹក ថ្ងៃអង្គារ ទី២០ ខែកក្កដា ឆ្នាំ២០២១ ឆ្ពោះទៅកាន់ទីក្រុង តូក្យូ ប្រទេសជប៉ុន ដែលជាម្ចាស់ផ្ទះរៀបចំព្រឹត្តិការណ៍កីឡាអូឡាំពិក ឆ្នាំ២០២០ (Tokyo Olympic Games 2020) ដែលគ្រោងនឹងដំណើរការពីថ្ងៃទី២៣ ខែកក្កដា ដល់ថ្ងៃទី០៨ ខែសីហា ឆ្នាំ២០២១។
លោក ហ៊ុន បូរី អគ្គលេខាធិការ សហព័ន្ធខ្មែរអត្តពលកម្មស្ម័គ្រចិត្តបានបញ្ជាក់ថា កីឡាករ ប៉ែន សុគង់ ត្រូវលេងលើវិញ្ញាសារត់ល្បឿន១០០ម៉ែត្រ ក្រោមការដឹកនាំពីគ្រូបង្វឹកជម្រើសជាតិ គឺលោក បូរ ពុតរាត្រី ដែលនឹងត្រូវចេញដំណើររួមគ្នាជាមួយប្រភេទកីឡាហែលទឹក ព្រមទាំងថ្នាក់ដឹកនាំប្រតិភូពីគណៈកម្មាធិការជាតិអូឡាំពិកកម្ពុជា (NOCC)។
ចំណែកឯ លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានឱ្យដឹងដែរថា សម្រាប់ការចូលរួមប្រកួតកីឡាអូឡាំពិក នៅប្រទេសជប៉ុន ឆាប់ៗខាងមុខនេះ គឺមានកីឡាករ ហែម ប៉ុច និងកីឡាការិនី ឃឿន ប៊ុនពេជ្រមរកត នឹងត្រូវប្រកួតលើវិញ្ញាសាហែល៥០ម៉ែត្រសេរី (បុរស-នារី) នាថ្ងៃទី៣០ ខែកក្កដា ឆ្នាំ២០២១ ដូៗគ្នា។
ចំពោះគ្រូបង្វឹកហែលទឹកដឹកនាំដោយគ្រូបង្វឹក គឺលោក ហែមថុន ពន្លឺ។ ប្រតិភូដឹកនាំ រួមទាំងគ្រូបង្វឹក កីឡាករ កីឡាការិនីរបស់កម្ពុជានឹងត្រូវចេញដំណើររួមគ្នា នាព្រឹកថ្ងៃទី២០ ខែកក្កដា ឆ្នាំ២០២១ តែម្តង។ លោកអគ្គលេខាធិការបញ្ជាក់ទៀតថា ប្រធានប្រតិភូរបស់កម្ពុជា ក្នុងព្រឹត្តិការណ៍កីឡាអូឡាំពិក លើកនេះគឺ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា។
សម្រាប់បេក្ខភាពអូឡាំពិកហ្គេម ឆ្នាំ២០២០ របស់កម្ពុជា គឺជាការចូលរួមតាមរយៈសិទ្ធិអនុ គ្រោះពីអន្តរជាតិ ប៉ុន្តែប្រសិនបើអត្តពលិកកម្ពុជាអាចធ្វើបានល្អ នៅក្នុងការប្រកួតរៀងរាល់៤ឆ្នាំម្តងនេះក៏អាចឡើងទៅប្រកួតបន្តនៅវគ្គបន្តបន្ទាប់បានដូចគ្នាផងដែរ៕