ថា​មិន​ត្រូវ​មើល​មិន​ឃើញ! កីឡាករ​កំពូល ៥ រូប អាច​នឹង​ផ្លាស់ប្ដូរ​ទ្រនំ​នៅ​រដូវ​ក្ដៅ​នេះ

ក្រោយ​ចប់​ការ​ប្រកួត​ Euro 2020 តាម​ការ​ព្យាករណ៍​របស់​អ្នក​ជំនាញ​គេ​ជឿ​ថា នឹង​ដល់​ពេលវេលា​ដែល​កីឡាករ​ត្រូវ​គិតគូរ​អំពី​អនាគត​របស់​ពួក​គេ​ហើយ ថា​គួរ​បន្ត​នៅ​ជាមួយ​ក្លឹប​អាណាព្យាបាល​បច្ចុប្បន្ន ឬ​ចាកចេញ​ផ្លាស់​ទៅ​ទ្រនំ​ថ្មី។ ចម្លើយ​នៃ​ការ​សម្រេច​ចិត្ត​របស់​ពួក​គេ នឹង​ត្រូវ​បង្ហាញ​ចេញ​មក​មុន​ថ្ងៃ​ទី ៣១ ​សីហា ពោល​គឺ​មុន​ឈាន​ចូល​រដូវ​កាល​ថ្មី ២០២១/២២។

​ឆ្លង​ផុត​ជាង ២ សប្តាហ៍​នៃ​ទីផ្សារ​ដោះដូរ​រដូវ​ក្តៅ យើង​បាន​ឃើញ​ជា​បណ្តើរៗ​ហើយ​អំពី​ការ​ផ្ទេរ​ទៅ​ចូលរួម​នៅ​ក្លឹប​ថ្មី តួ​យ៉ាង​ដូច​ជា Achraf Hakimi ផ្ទេរ​ទៅ PSG, David Alaba ផ្ទេរ​ទៅ Real Madrid និង Memphis Depay ផ្ទេរ​ទៅ Barcelona ជា​ដើម។ យ៉ាង​ណា​គេ​ជឿ​ថា នៅ​កំឡុង​ពេល​ខាង​មុខ​ភាគរយ​នៃ​ការ​ផ្ទេរ​ចេញ​របស់​កីឡាករ​កំពូល ៥ រូប​ឯ​ទៀត​ក៏​នឹង​នៅ​តែ​អាច​កើត​ឡើង ក្នុង​នោះ​មាន​ដូច​ជា៖

៥) Antoine Griezmann

ដោយសារ​វិបត្តិ​ហិរញ្ញវត្ថុ​នៅ​ក្លឹប Barcelona មិន​ទាន់​អាច​ដោះស្រាយ​បាន ដូច្នេះ​ហើយ​ការ​លក់​ចេញ​កីឡាករ​បារាំង អាច​ជា​អ្វី​ដែល​ក្លឹប​នឹង​សម្រេច​ចិត្ត​ធ្វើ​នៅ​ពេល​ដ៏​ខ្លី​ខាង​មុខ។ មួយ​ផ្សេង​ទៀត អ្នក​មាន​បុណ្យ​ក៏​ប្រញាប់​យក​លុយ​ទៅ​ប៉ះប៉ូវ​លើ​ការ​ចរចា​កុងត្រា​ថ្មី​របស់ Messi ដូច្នេះ​ហើយ​បើ​ជោគជ័យ​លើ​ការ​លក់ Griezmann ក៏​ទំនង​ជា​ប្រមូល​បាន​ក្បែរ ៦០ លាន​អឺរ៉ូ។

តាម​របាយការណ៍​ចុង​ក្រោយ​ពី Footmercato ចុះ​ផ្សាយ​ថា Griezmann អាច​ជា​ស្ថិត​ក្នុង​ផែនការណ៍ B របស់​ក្លឹប Man City ពោល​ប្រសិន​ណា​ពួក​គេ​ចរចា​យក Harry Kane ចេញ​ពី Spurs មិន​បាន​សម្រេច។

៤) Paul Pogba

បើ​ទោះ​បី​ជា​គុណភាព​របស់ Pogba នៅ​តែ​មាន ប៉ុន្តែ​សុពលភាព​កុងត្រា​នៅ Man Utd គឺ​កៀក​នឹង​ឈាន​ចូល​មក​ដល់​ឆ្នាំ​ចុង​ក្រោយ​ហើយ។ ដូច្នេះ​ក្លឹប​បិសាច​ក្រហម​ត្រូវ​ប្រាកដ​ថា​នឹង​អាច​ទាញ​ប្រយោជន៍​បាន​ខ្លះ ពី​ការ​ផ្ទេរ​ចេញ Pogba ជា​ជាង​ទុក​គេ​ចោល​ដល់​អស់​តម្លៃ​ខ្លួន​នៅ​ចុង​ខែ​មិថុនា ឆ្នាំ ២០២២។

មាន​របាយការណ៍​ចុះ​ផ្សាយ​ថា United កំពុង​ចរចា​ជាមួយ Juventus លើ​ការ​ផ្ទេរ​ចេញ Pogba តែ​ជាមួយ​គ្នា​នេះ​ខាង​ក្លឹប​បារាំង PSG ក៏​សម្លឹង​ឃើញ​សមត្ថភាព​របស់​កីឡាករ​វ័យ ២៨ ឆ្នាំ​ផង​ដែរ។ បញ្ជាក់​ថា​ខ្សែ​បម្រើ​ឆ្នើម Pogba ចាយ​ពេល ២០៦ ប្រកួត នៅ Old Trafford រក​បាន ៣៨ គ្រាប់​និង Assist ៤២ លើក។

៣) Erling Haaland

តាម​ពិត​ទៅ Dortmund ហាក់​មិន​ចង់​បាត់បង់ Haaland ម្នាក់​ទៀត​ឡើយ ក្រោយ​ពី​ទើប​តែ​របូត Jadon Sancho ឲ្យ​ទៅ Man Utd។ យ៉ាង​ណា​វា​ស៊ីសង​លើ​ការ​ចរចា បើ​តម្លៃ​ខាង​ភាគី​ក្លឹប​ចង់​បាន គេ​ហ៊ាន​ឲ្យ​ខ្ពស់​កប់​ពពក​ហើយ ដូច្នេះ​បើ​ក្លឹប​អាណាព្យាបាល​ហា​មាត់​បដិសេធ ក៏​វា​ពិបាក។

មាន​របាយការណ៍​មក​ថា សេដ្ឋី​រុស្ស៊ី​លោក Roman Abramovich ដែល​ជា​ប្រធាន​ក្លឹប Chelsea ហាក់​មិន​បោះបង់​ឆន្ទៈ​ចង់​បាន​កីឡាករ​ន័រវែស​ទាល់​តែ​សោះ ដោយ​លឺ​ថា​ទោះ​ត្រូវ​ចំណាយ​ ១៥០ លាន​ផោន ក៏​ខ្លួន​ព្រម ហើយ​ស៊ូ​លក់​ចេញ​កីឡាករ ៣ រូប​ពី​ក្លឹប​មាន​ដូច​ជា Hakim Ziyech, Callum Hudsoin-Odoi និង Tammy Abraham។

២) Harry Kane

Kane ហាក់​អស់​ការ​អត់ធ្មត់​នឹង​បន្ត​នៅ Spurs ត​ទៅ​ទៀត​ហើយ ព្រោះ​អាយុ​លោក​ក៏​កាន់​តែ​ជ្រេ ណា​មួយ​គុណភាព​លេង កំពុង​ឡើង​កូដ​ផង អ៊ីចឹង​ការ​ជ្រើសរើស​ផ្លូវ​បែក​គឺ​ជា​រឿង​ដែល​គួរ​តែ​ធ្វើ។

គោលដៅ​របស់​កីឡាករ​អង់គ្លេស គឺ​ចង់​ស្គាល់​រសជាតិ​ឈ្នះ​ពាន​រង្វាន់ ដូច្នេះ​ហើយ​គេ​ជឿ​ថា ការ​ផ្ទេរ​ទៅ Manchester City នៅ​រដូវ​ក្តៅ​នេះ មាន​ភាគរយ​ខ្ពស់​អាច​នឹង​កើត​ឡើង ហើយ​តាម​ចចាមអារ៉ាម​ខាង City ហ៊ាន​ឲ្យ ១០០ លាន​ផោន តែ​ខាង Spurs ទារ​ដល់ ១៧៥ លាន​ផោន។ យើង​នឹង​រង់ចាំ​មើល ព្រោះ​ការ​ចរចា កំពុង​បន្ត​ដំណើរការ ហើយ​ថេរវេលា​បើក​ទីផ្សារ​ដោះដូរ​ក៏​សល់​ជាង​មួយ​ខែ​ទៀត​ឯ​ណោះ។

១) Cristiano Ronaldo

អនាគត​របស់ Ronaldo ប្រហាក់ប្រហែល​នឹង Pogba ដែរ ព្រោះ​ស្ថិត​នៅ​មាត់​ជ្រោះ​ផ្លូវ​បែក ដែល​សុពលភាព​កុងត្រា​ត្រូវ​ផុត​នៅ​ឆ្នាំ​ក្រោយ ២០២២ ដូច​គ្នា។

ដោយសារ​រដូវ​កាល​មុន Juventus ធ្វើ​មិន​បាន​ល្អ បែប​នេះ​ពិត​ជា​ពិបាក​នឹង​អូស​ទាញ​ចិត្ត​ឲ្យ Ronaldo បន្ត​នៅ​ខ្លាំង​ណាស់ ហើយ​លោក​មាន​ជម្រើស ២ ក្នុង​ដៃ ១) គឺ​ផ្ទេរ​ទៅ PSG ២) គឺ​ត្រលប់​ទៅ​ក្លឹប​ម្ចាស់ដី Old Trafford។ ប្រសិន​ផ្ទេរ​ទៅ United នោះ​ក៏​មាន​ភាគរយ​ច្រើន​ដែល Juventus ស្នើ​សុំ​យក Pogba ត្រលប់​មក​វិញ​ ជា​ការ​ដោះដូរ ប៉ុន្តែ​តម្លៃ​អ្នក​ទាំង​ពីរ​តាម​ដឹង​គឺ​អាច​ខុស​គ្នា ១ ទ្វេ​ជា ៣៕

ប្រភព៖ Sportskeeda

ភ្ជាប់ទំនាក់ទំនងជាមួយ CTS SPORT