ប្រធានក្របខ័ណ្ឌ La Liga លោក Javier Tebas បាននិយាយថា ការបន្តកុងត្រាថ្មីរបស់ Messi នៅ Barcelona អាចកើងឡើងទៅបាន លុះត្រាណាតែក្លឹបព្រមលក់ចេញកីឡាករមួយចំនួនជាមុនសិន។
អ្នកមានបុណ្យពេលនេះកំពុងជួបបញ្ហាហិរញ្ញវត្ថុ ហើយបញ្ហាធំដែលត្រូវដោះស្រាយគឺការបន្តកុងត្រាថ្មីសម្រាប់កីឡាករអាហ្សង់ទីន ដែលគេកំពុងឈរជើងក្រៅក្លឹបរយៈពេលជិត ១០ ថ្ងៃមកហើយ។ ក្លឹបត្រូវការយ៉ាងហោចណាស់ក៏ជាង ២០០ លានអឺរ៉ូដែរ ដើម្បីចរចាសុពលភាពកុងត្រាថ្មីជាមួយតារាឆ្នើមពាក់អាវលេខ ១០ ក៏ដូចជាត្រៀមសម្រាប់ចំណាយលើថ្លៃពលកម្មកីឡាករថ្មីមួយចំនួន។
យ៉ាងណាបើតាមការយល់ឃើញរបស់លោក Tebas បាននិយាយ៖ “ខ្ញុំមិនច្បាស់ទេថា Messi នឹងបន្តជាមួយ Barca សារជាថ្មី ព្រោះបើក្លឹបមិនលក់នរណាចេញទេ ពេលនេះគឺពួកគេមិនអាចនឹងចុះហត្ថលេខាយក Messi សារជាថ្មីឡើយ”។
បញ្ជាក់ថា Messi បានចំណាយពេលនៅ Barcelona រយៈពេល ១៦ ឆ្នាំមកហើយ ដោយគេបង្ហាញខ្លួន ៧៧៨ ប្រកួត រកបាន ៦៧២ គ្រាប់និង Assist ៣០៥ លើក។ កាលពីថ្ងៃទី ១ កក្កដាកន្លងទៅ វាជាលើកដំបូងដែល M10 ផុតកុងត្រានិងក្លាយជាកីឡាករទំនេរជើងក្នុងអាជីព ដោយកន្លងមក Barcelona មិនដែលឲ្យខ្សែប្រយុទ្ធខាងលើផុតកុងត្រាទាន់ឡើយ ពោលរមែងនឹងមានលទ្ធភាពបន្តឲ្យថ្មី៕
ប្រភព៖ BeSoccer