លោក Gareth Southgate ជឿជាក់ថាក្រុមជម្រើសជាតិអង់គ្លេស នឹងអាចបង្កើតប្រវត្តិសាស្ត្រថ្មីមិនខាន ដោយឡើងដល់វគ្គផ្ដាច់ព្រ័ត្រពានរង្វាន់ Euro 2020 ដោយយកឈ្នះដាណឺម៉ាកនៅយប់នេះ។
អង់គ្លេសត្រូវការឈ្នះតែមួយប្រកួតទៀតទេ ដើម្បីឈានដល់វគ្គផ្ដាច់ព្រ័ត្រពានរង្វាន់ធំជាលើកដំបូងតាំងពីឆ្នាំ១៩៦៦មក។ ដូច្នេះហើយ នៅយប់នេះពួកគេនឹងប្រឹងប្រែងឱ្យបានខ្លាំងបំផុត ដើម្បីសម្រេចគោលដៅបង្កើតជាប្រវត្តិសាស្ត្រឱ្យក្រុមអង់គ្លេសឱ្យបាន។ ខណៈដែលការប្រកួតនេះទៀតសោត នឹងលេងនៅកីឡដ្ឋាន Wembley របស់អង់គ្លេសផ្ទាល់ ជាមួយអ្នកគាំទ្រ៦ម៉ឺននាក់។
លោក Gareth Southgate គ្រូបង្វឹកក្រុមអង់គ្លេសបាននិយាយថា៖ “យើងមិនមានប្រវត្តិសាស្ត្របាល់ទាត់ល្អដូចដែលយើងចង់បាននោះទេកន្លងមក។ ក្រុមកីឡាករយើងនៅពេលនេះ កំពុងតែបង្កើតវាថ្មីហើយ។ ខ្ញុំជឿថាពួកគេនឹងអាចធ្វើវាបាននៅយប់នេះ”។
សូមបញ្ជាក់ថាលើកចុងក្រោយដែលអង់គ្លេសឡើងដល់វគ្គផ្ដាច់ព្រ័ត្រពានរង្វាន់ធំនោះ គឺនៅពេលពួកគេឈ្នះពានរង្វាន់ Word Cup កាលពី៥៥ឆ្នាំមុនឯណោះ។ ដោយឡែកនៅពានរង្វាន់អឺរ៉ុបវិញ មិនដែលឡើងដល់វគ្គផ្ដាច់ព្រ័ត្រឡើយ ដោយខ្លាំងបំផុតត្រឹមវគ្គពាក់កណ្ដាលផ្ដាច់ព្រ័ត្រនេះឯង៕ប្រភព Bbc
