១ កក្កដា ឆ្នាំ ២០០៥ ជាថ្ងៃដែល Lionel Messi បានចុះហត្ថលេខាក្លាយជាកីឡាករឈុតធំរបស់ក្លឹប Barcelona ហើយមកទល់ថ្ងៃដដែលនៅឆ្នាំ ២០២១ កីឡាករអាហ្សង់ទីនបែរជាលែងមានឈ្មោះជាសមាជិករបស់ Barcelona តទៅទៀត។
អ្នកគាំទ្រមួយចំនួននៅមិនទាន់អាចប្រាប់ខ្លួនឯងឲ្យទទួលស្គាល់បានឡើយថា ពេលនេះ Messi មិនមែនជាកីឡាករ Barcelona នោះទេ ហើយក៏មិនមានន័យថា ១០០ ភាគរយនៅពេលដ៏ខ្លីខាងមុខខ្សែប្រយុទ្ធវ័យ ៣៤ ឆ្នាំនឹងព្រមចុះហត្ថលេខាលើកុងត្រាថ្មីនោះដែរ។ ខាងក្រោមយើងបង្ហាញពីហេតុផលចម្បង ៣ ដែល M10 មិនព្រមបន្តកុងត្រាថ្មី ហើយស៊ូឈរជើងជាកីឡាករឥតតម្លៃខ្លួនលើទីផ្សារដោះដូរ៖
៣) រង់ចាំក្លឹបទូទាត់ប្រាក់ពលកម្មចាស់ឲ្យដាច់ស្រេច
ដ្បិតផុតសុពលភាពកុងត្រានៅ Barcelona ពិតមែន ប៉ុន្តែក្លឹបមិនទាន់ទូទាត់ដាច់ស្រេចនៅប្រាក់ពលកម្មចាស់ឲ្យ Messi នោះឡើយ ដោយតាមរបាយការណ៍ពី Marca បានចុះផ្សាយថា ក្លឹបនៅជំពាក់ប្រាក់លើកិច្ចព្រមព្រៀងផ្សេងៗជាមួយកីឡាករអាហ្សង់ទីនប្រមាណ ៦៣,៥ លានអឺរ៉ូ។
ដូច្នេះហើយ Messi ចង់ដោះស្រាយប្រាក់លើកិច្ចព្រមព្រៀងចាស់ឲ្យរួចរាល់មួយសិន សឹមធ្វើការព្រមព្រៀងលើកុងត្រាថ្មីក៏មិនហួសពេលដែរ។ ជារួមគឺសាមីខ្លួន មិនចង់ឲ្យបញ្ហានេះកាន់តែច្របូកច្របល់ ហើយបន្តទៅជាប់ជំពាក់ដែលត្រូវអូសបន្លាយដល់ពេលខាងមុខ។
២) បញ្ហាការបង់ពន្ធ និងប្រាក់ចំណូលរបស់ខ្លួន
ដូចអ្នកបានដឹងស្រាប់ហើយនៅអេស្ប៉ាញ ជាប្រទេសមួយដែលមានច្បាប់តឹងរ៉ឹងបំផុតលើការបង់ពន្ធសម្រាប់កីឡាករបាល់ទាត់ ដោយកន្លងមកមានកីឡាករកំពូលៗជាច្រើនដែលត្រូវឈឺក្បាល និងខ្លះដ្បិតផ្ទេរទៅលេងឲ្យក្លឹបនៅប្រទេសដទៃហើយ ក៏ត្រូវត្រលប់មកដោះស្រាយវិញលើបញ្ហាពន្ធនៅអេស្ប៉ាញនេះដែរ។
Messi ចង់ឲ្យក្រុមប្រឹក្សាភិបាលរបស់ Barcelona ធ្វើការរៀបចំឲ្យបានច្បាស់លាស់អំពីការទូទាត់ និងលក្ខខណ្ឌផ្សេងៗនៃការបង់ពន្ធទៅកាន់រដ្ឋាភិបាល ដើម្បីធានាបានថាខ្លួននឹងមិនប្រឈមបញ្ហាណាមួយនៅពេលខាងមុខ។
ចំណុចមួយផ្សេងទៀត ដ្បិតបើ Barcelona កំពុងជួបបញ្ហាហិរញ្ញវត្ថុក៏ដោយ តែ M10 ក៏នៅតែចង់ឲ្យក្លឹបអាចធានាបាន អំពីការផ្តល់ប្រាក់ពលកម្មពេញលេញសម្រាប់ខ្លួន ពោលគ្មានការកាត់បន្ថយ ឬពន្យារពេលលើការទូទាត់ដូចមុនទៀតឡើយ លើការចុះហត្ថលេខាកុងត្រាថ្មី។
បញ្ជាក់ថា ក្នុងកិច្ចព្រមព្រៀងកុងត្រាចាស់ដែល M10 បានចុះហត្ថលេខានៅឆ្នាំ ២០១៧ និងត្រូវផុតនៅចុងខែមិថុនា ឆ្នាំ ២០២១ កន្លងទៅនេះ គឺមានតម្លៃដល់ទៅ ៥៥៥ លានអឺរ៉ូ ដែលគិតក្នុងមួយរដូវកាល អាចទទួលបាន ១៣៣ លានអឺរ៉ូ។ យ៉ាងណាកិច្ចព្រមព្រៀងកុងត្រាថ្មីអាចទទួលបានប៉ុន្មាន មិនទាន់មានប្រភពគួរឲ្យទុកចិត្តណាមួយបង្ហើបប្រាប់នៅឡើយ។
១) រង់ចាំមើលការរៀបចំផែនការណ៍របស់ក្លឹប Barcelona
Lionel Messi តែងតែចង់ទទួលបានជោគជ័យនៅការប្រកួតធំៗ ហើយលោកក៏ពិបាកនឹងបន្តឈរជើងដែរ បើកីឡាករជុំវិញខ្លួនមិនអាចចូលរួមចំណែកត្រួសត្រាយឲ្យក្រុមឈ្នះពានបាននោះ។
ដូចយើងបានឃើញស្រាប់ហើយនៅប៉ុន្មានឆ្នាំចុងក្រោយ ជាពិសេសក្រោយពេល Luis Suarez ចាកចេញ Barcelona កាន់តែខ្សត់ឱកាសឈ្នះពាន មិនថាតែនៅ La Liga និង Champions League។ ដូច្នេះហើយ Messi កំពុងរង់ចាំមើលបន្តទៀតសិន ថាថ្នាក់លើរបស់ Barcleona នឹងរៀបចំបែបណាលើកំណែប្រព័ន្ធលេងថ្មី ស្របពេលដែលកន្លងមកក្លឹបបង្ហាញចេញមកខ្លះៗហើយ ដូចជាការនាំយក Sergio Aguero, Memphis Depay និង Eric Garcia។
សរុបរួមទៅ នៅពីក្រោយការសម្រេចចិត្តរបស់ Messi គឺមានបញ្ហាជាច្រើន ដែលយើងមើលពីខាងក្រៅគឺមិនដឹងអស់នោះទេ។ មួយផ្សេងទៀតយើងក៏មិនអាចបន្ទោសលោកទាំងស្រុងនោះដែរ ថាហេតុអ្វីបានជាយកបញ្ហាលុយជាធំ ខណៈដែលក្លឹបកាន់ឆ្នាំរបស់ខ្លួនកំពុងជួបវិបត្តិហិរញ្ញវត្ថុ ព្រោះដូចបង្ហាញខាងលើ ក្រៅពីបញ្ហាប្រាក់ចំណូល Messi ក៏ត្រូវការក្លឹបដែលមានចក្ខុវិស័យដ៏ច្បាស់លាស់មួយដែរ ព្រោះលោកមិនចង់ចំណាយពេលឈរជើងដោយមិនទទួលបានជោគជ័យអ្វីនោះឡើយ ណាមួយកត្តាអាយុរបស់លោកក៏កាន់តែរាងជ្រេហើយដែរ៕
ប្រភព៖ Sportskeeda