Lionel Messi បច្ចុប្បន្នកំពុងឈរឈ្មោះជាកីឡាករឥតតម្លៃខ្លួនលើទីផ្សារដោះដូរ ក្រោយផុតកុងត្រាពីក្លឹប Barcelona នៅថ្ងៃទី ៣០ មិថុនា ឆ្នាំ ២០២១ កន្លងទៅ។ តាមការព្យាករណ៍គេជឿថា មុននិងក្រោយ M10 ក៏នឹងនៅតែបន្តឈរជើងឲ្យអ្នកមានបុណ្យដដែល គ្រាន់តែគេមិនទាន់ព្រមទម្លាក់ចុងប៊ិចចុះហត្ថលេខាភ្លាមៗនៅពេលនេះ។
បើតាមការចុះផ្សាយពី Sportskeeda បានបង្ហាញនៅហេតុផលអាចទទួលយកបាន ៣ ដែល Messi នៅរង់ចាំការឆ្លើយតបពីភាគីខាង Barcelona សិន៖
ទី ១) គឺទាក់ទងនឹងបញ្ហានៃការបង់ពន្ធឲ្យរដ្ឋាភិបាលអេស្ប៉ាញ ដែល Messi ចង់ឲ្យក្រុមប្រឹក្សាភិបាលរបស់ក្លឹប Barcelona ដោះស្រាយ និងរៀបចំឲ្យខ្លួនឲ្យជាក់ច្បាស់ ថានឹងមិនមានបញ្ហាអ្វីទៅថ្ងៃមុខ ព្រោះដូចអ្នកបានដឹងស្រាប់ហើយបញ្ហាពន្ធនៅអេស្ប៉ាញបានបង្ករឿងឈឺក្បាលដល់កីឡាករកំពូលៗជាច្រើន។
ទី ២) គឺចង់ឲ្យ Barcelona ទូទាត់ឲ្យដាច់ស្រេចនៅប្រាក់ឧបត្ថម្ភ និងប្រាក់ក្នុងកិច្ចព្រមព្រៀងផ្សេងៗដែលជាប់ក្នុងកុងត្រាចាស់សិន សឹមបន្តកុងត្រាថ្មី។ ពិតមែនហើយ Barcelona មិនទាន់ទូទាត់ឲ្យកីឡាករអាហ្សង់ទីន ១០០ ភាគរយនោះទេ ពាក់ព័ន្ធនឹងប្រាក់កិច្ចព្រមព្រៀងមួយចំនួន ជាប់ក្នុងកុងត្រាចាស់ អ៊ីចឹង Messi មិនចង់ឲ្យបូកបល់ជាមួយកុងត្រាថ្មីនេះបន្តទៀតឡើយ។ មួយផ្សេងទៀតលោកចង់ឲ្យក្លឹបធានាបានថា នឹងអាចផ្តល់ឲ្យតាមកិច្ចព្រមព្រៀងដែលបានចរចា ពោលគឺ Messi នឹងមិនទទួលយកការកាត់បន្ថយថ្លៃពលកម្មឡើយ ដ្បិតបើក្លឹប Barcelona បច្ចុប្បន្នប្រឈមបញ្ហាហិរញ្ញវត្ថុជាន់ត្រួតក៏ដោយ។
ទី ៣) គឺ Messi នៅបន្តតាមមើលពីផែនការណ៍រៀបចំរបស់ក្លឹប ពាក់ព័ន្ធនឹងការទិញចូល លក់ចេញកីឡាករ ដែលវាជាយុទ្ធសាស្រ្តអាចជួយឲ្យក្លឹបជោគជ័យទៅពេលខាងមុខ។ តួយ៉ាងក្លឹបកំពុងបង្ហាញមកបណ្តើរៗហើយដូចជាការនាំយក Sergio Aguero, Memphis Depay និង Eric Garcia ដើម តែ M10 មិនទាន់ចង់បានត្រឹមប៉ុណ្ណឹងទេ ពោលនឹងរង់ចាំមើលបន្តទៅទៀត មុនសម្រេចលើការបន្តកុងត្រាថ្មីជាផ្លូវការ៕
ប្រភព៖ Sportskeeda