នៅទីផ្សារដោះដូររដូវក្តៅបានចាប់ផ្តើមបើកទ្វារពីថ្ងៃទី ១ កក្កដាតទៅហើយ ខណៈសុពលភាពកុងត្រារបស់កីឡាករដែលត្រូវផុត ក៏បានចូលមកហើយដែរ ពោលគឺក្រោយថ្ងៃទី ៣០ មិថុនា ឆ្នាំ ២០២១។
យើងបានឃើញហើយដូចជា Lionel Messi, Sergio Ramos និង Gianluigi Donnarumma សុទ្ធតែលែងមានឈ្មោះជាកីឡាករនៃក្លឹបចាស់របស់គេតទៅទៀត ហើយនៅតែរង់ចាំអុតមើលដំណឹងបន្ទាប់តែប៉ុណ្ណោះ ថានឹងត្រូវផ្ទេរទៅក្លឹបណាមួយ។
យ៉ាងណាក្នុងចំណោមអ្នកទាំង ៣ មានមួយគឺ M10 ដែលគេជឿថា មិនងាយនឹងមានក្លឹបដទៃណាយកបានទេ ហើយការផុតកុងត្រានេះក៏មិនមានន័យថាលោកចាកចេញពីអ្នកមានបុណ្យដែរ តែគ្រាន់តែកិច្ចព្រមព្រៀងរវាងភាគីសងខាងមិនទាន់អាចដោះស្រាយរួចរាល់។ តាមការបញ្ជាក់របស់ប្រធានក្លឹប លោក Joan Laporta បានឲ្យដឹងដែរថា Messi នឹងបន្តនៅ Camp Nou តែរឿងរ៉ាវពេលនេះលោកសុំមិនធ្វើការបកស្រាយ។
ដោយឡែក Sergio Ramos ដែលជាខ្សែការពារកំពូលមួយរូប ក្លឹបបន្ទាប់របស់លោកមានភាគរយច្រើនអាចជា Paris Saint-Germain ដោយបច្ចុប្បន្នកំពុងចរចាលើកុងត្រាសម្រេចមួយ ហើយមានភាគរយទាបណាស់ដែលអាចជា Man Utd។ ចុងក្រោយគឺ Donnarumma អ្នកចាំទីដៃទីមួយឲ្យក្លឹប AC Milan និងជម្រើសជាតិអ៊ីតាលី គេក៏ប្រហែលជាសម្រេចការផ្ទេរទៅក្លឹប PSG ដូចគ្នា ពោលរង់ចាំតែសេចក្តីប្រកាសផ្លូវការចេញមកតែប៉ុណ្ណោះ៕
ប្រភព៖ AF