ក្តៅ! អតីត​គ្រូ​កាន់​ឆ្នាំ​នៅ Liverpool ប្រកាស​មក​ដឹកនាំ​ក្លឹប​រួម​ទីក្រុង Everton ហើយ

ក្លឹប Everton ​ដែល​ទើប​តែ​បាត់បង់​វត្តមាន​អ្នកចាត់ការ​លោក Carlo Ancelotti ឲ្យ​ទៅ Real Madrid ទី​បំផុត​ពេល​នេះ​រក​បាន​អ្នក​ថ្មី​មក​ជំនួស​ហើយ នោះ​គឺ​ជា​អតីត​គ្រូ​ចាស់​របស់​ក្លឹប​រួម​ទីក្រុង Rafael Benitez។

តាម​ដំណឹង​អតីត​គ្រូ​របស់ Liverpool រូប​នេះ បាន​ព្រមព្រៀង​កុងត្រា​រយៈ​ពេល ៣ ឆ្នាំ​ជាមួយ​ក្លឹប​ស្ករ​គ្រាប់​ខៀវ Everton ហើយ​លោក​បាន​ចរចា​ត្រូវរ៉ូវ ក្រោយ​ទំនេរ​ជើង​ពី​ការ​ដឹកនាំ​ក្លឹប​ចិន​តាំង​ពី​ខែ​មករា ឆ្នាំ ២០២១។

បញ្ជាក់​ថា Benitez លោក​មាន​បទពិសោធន៍​ជោកជាំ​នៅ​ការ​បង្វឹក ដោយ​លោក​ចាប់ផ្តើម​ដំបូង​ធ្វើ​ជា​ជំនួយ​ការ និង​ជា​អ្នកចាត់ការ​នៅ​ឈុត​ B របស់ Real Madrid ហើយ​ក្រោយ​មក​មាន​ដូច​ជា​ការ​ដឹកនាំ​ក្លឹប​ Valencia, Liverpool, Inter Milan, Chelsea, Napoli, Real Madrid, Newcastle ពោល​ជា​គ្រូ​ដែល​ដឹកនាំ​ក្លឹប​ច្រើន​បង្អស់​មួយ​ក្នុង​ប្រវត្តិសាស្ត្រ​បាល់ទាត់។

ដោយឡែក​សម្រាប់ Everton រដូវ​កាល​មុន ធ្វើ​មិន​ជា​បាន​ល្អ​នោះ​ទេ ដោយ​ឈរ​ត្រឹម​លេខ ១០ នៅ Premier League អ៊ីចឹង​យើង​ចាំ​មើល​រដូវ​កាល​ថ្មី​នេះ តើ Benitez អាច​ផ្លាស់ប្តូរ​ការ​លេង​របស់​ក្រុម​មាន​មូលដ្ឋាន​ក្នុង​ទីក្រុង Merseyside ឲ្យ​ប្រែប្រួល​បែប​ណា​ខ្លះ ហើយ​យើង​ក៏​កាន់​តែ​ទន្ទឹង​ចង់​ឃើញ​នៅ​ជំនួប Everton-Liverpool ដែល​ជា​ការ​ប៉ះ​ក្លឹប​ចាស់​របស់​លោក​នៅ​ពេល​ខាង​មុខ៕

ប្រភព៖ SkySports

ភ្ជាប់ទំនាក់ទំនងជាមួយ CTS SPORT