ជើងឯកមួយថៃពិភពលោក ONE Flyweight មនុស្សដែក Rodtang “The Iron Man” Jitmuangnon ដឹងថា មានជើងខ្លាំងមួយថៃជាច្រើនដែលត្រូវប្រជែងអធិរាជសង្វៀនរបស់ខ្លួន ហើយរូបគេក៏មានឆន្ទៈចូលប្រឡូកប្រដាល់គុនចម្រុះថែមទៀត។
ដៃគូប្រជែងដែលត្រូវចាត់ទុកថាថ្មីបំផុតក្នុងបញ្ជីគឺជើងខ្លាំងមិត្តរួមជាតិ Mongkolpetch Petchyindee Academyដែលទំនងជាបោះជំហានចូលតារាងចំណាត់ថ្នាក់អត្តពលិក ONE បន្ទាប់បានប្រកួតឈ្នះជើងខ្លាំងចំណាត់ថ្នាក់លេខ៤ Elias “The Sniper” Mahmoudi។
និយាយពីសក្តានុពលប្រជែងខ្សែក្រវាត់ពិភពលោកពី Mongkolpetch អាចត្រូវបានគេមើលឃើញហើយ ជាពិសេសមនុស្សដែក Rodtang ខ្លួនគាត់ផ្ទាល់ដែលជាមិត្តរួមជាតិ។ មនុស្សដែកនិយាយថា ៖«បន្ទាប់ពីគាត់ឈ្នះការប្រកួតចុងក្រោយ Mongkolpetch និយាយថា ចង់ប្រកួតជាមួយខ្ញុំ។ ខ្ញុំរីករាយទទួលអ្នកគ្រប់គ្នាជានិច្ច តែសម្រាប់ខ្ញុំគិតឃើញថា គាត់គួរខំបង្កើតសមត្ថភាព និងកេរ្តិ៍ឈ្មោះបន្ថែមទៀតមុនពេលជួបខ្ញុំដើម្បីឲ្យអ្នកទស្សនាពេញចិត្ត»។
ការប្រកួតរបស់ Mongkolpetch ក្នុងតំណែងគូឯកជាមួយ Mahmoudi នៅព្រឹត្តិការណ៍ ONE: FULL BLAST II បានចាក់ផ្សាយកាលពីថ្ងៃទី១១ ខែមិថុនាកន្លងទៅ ដូច្នេះ Rodtang ប្រហែលជាតាមឃ្លាំមើលហើយ។ វាជាការប្រកួត៣ទឹកពេញគួរឲ្យចាប់អារម្មណ៍ហើយសមាជិកក្លឹប Petchyindee Academy ធ្វើបានយ៉ាងល្អឥតខ្ចោះ ជាពិសេសវ៉ៃគូឲ្យរាប់៨ម្តងដើម្បីរក្សាកំណត់ត្រាមិនចាញ់សោះនៅ ONE Super Series។
ទោះជា Mongkolpetch បង្ហាញសមត្ថភាពគួរឲ្យទាក់ភ្នែក និងមិនបានព្យាយាមផ្តួលដៃគូឲ្យសន្លប់ទេនៅទឹកចុងក្រិង ក៏ជំនាញ និងបច្ចេកទេសមួយពីរព្រមជាមួយអាវុធពិតជាធ្វើបានល្អហើយចៅក្រមកាត់សេចក្តីឲ្យឈ្នះដោយពិន្ទុដាច់។ ជ័យជម្នះនេះធ្វើឲ្យការឡើងសង្វៀនរបស់គាត់៤ដងឈ្នះទាំងអស់គឺមិនទាន់ចាញ់ម្តងណាឡើយ។
មនុស្សដែក Rodtang ជឿជាក់ថា សមាជិកក្លឹប Petchyindee Academy សមទទួលបានជ័យជម្នះហើយ ប៉ុន្តែរូបគេមានអារម្មណ៍ថា មិត្តរួមជាតិម្នាក់នេះហាក់ដូចជាទន់ជ្រាយនៅទឹកចុងក្រោយ។
អធិរាជមួយថៃនិយាយថា ៖«ខ្ញុំមើលការប្រកួតនេះ ហើយគិតថា គាត់វ៉ៃបានល្អ។ គាត់ក៏ទទួលរងធ្ងន់ពីដៃគូដែរ តែសំណាងលហអ គាត់បានវ៉ៃដៃគូដួល អាជ្ញាកណ្តាលរាប់ម្តង។ បើពុំនោះទេ គាត់នឹងចាញ់ការប្រកួតនេះ»។
«បើគាត់មិនបានវ៉ៃ Mahmoudiឲ្យរាប់ម្តងក្នុងទឹកទី២ទេ គាត់ប្រហែលជាចាញ់២ទឹកផ្សេងទៀត ហើយខ្ញុំគិតថា គាត់ប្រហែលជាចាញ់ទឹកទី៣។ ទឹក៣ពិតជាសំខាន់ណាស់។ យើងត្រូវតែធ្វើឲ្យបានល្អ បើទឡជាយើងមានប្រៀបទឹកមុនៗក៏ដោយ។ យើងត្រូវតែឆ្លាតក្នុងការប្រកួត។ យើងតែងតែឡើងសង្វៀនដើម្បីវ៉ៃ»។
មែនហើយតាមការវិភាគសាច់វ៉ៃរបស់មិត្តរួមជាតិធ្វើឲ្យមនុស្សដែកម្នាក់យល់ឃើញថា Mongkolpetch គួរប្រកួតជាមួយនឹងកីឡាករផ្សេងៗដែលមានចំណាត់ថ្នាក់កំពូលទាំង៥ឲ្យបានច្រើនសិនមុនពេលមកប្រកួតដណ្តើមខ្សែក្រវាត់មួយថៃពិភពលោក ONE Flyweight ពីរូបគេ។
Rodtang និយាយថា ៖«ខ្ញុំចង់ឲ្យគាត់វ៉ៃជាមួយអ្នកផ្សេងសិនដូចជា Jonathan] Haggerty ឬនរណាម្នាក់ដែលមានសមត្ថភាពប្រហាក់ប្រហែលគ្នា។ គាត់ត្រូវការបង្កើនកេរ្តិ៍ឈ្មោះពីរបីប្រកួតទៀត។ បើគាត់អាចឈ្នះអ្នកចំណាត់ថ្នាក់លេខ២ដូចជា Haggerty អីចឹងអូខេ ជួបខ្ញុំដណ្តើមខ្សែក្រវាត់បាន»។
«បើមិនបានជួប Haggerty អីចឹងអាចជួប Panpayak Jitmuangnon ក៏បាន ឬក៏ជាមួយ Mahmoudi ទៀតក៏បាន ព្រោះខ្ញុំគិតច្បាស់ណាស់ថា Mahoudi ពិតជាចង់ប្រកួតម្តងទៀត»។
ផ្ទុយទៅវិញ Mongkolpetch មិនយល់ស្របតាមគំនិតរបស់ Rodtang ទេ។ សមាជិកក្លឹប Petchyindee Academy ជឿជាក់ថា រូបគេមានលក្ខណៈសម្បត្តិគ្រប់គ្រាន់ដើម្បីប្រជែងខ្សែក្រវាត់ពិភពលោកហើយ។
កីឡាករចាស់វស្សាថៃម្នាក់នេះនិយាយថា ៖«នៅពេលខ្ញុំបានក្លាយជាកីឡាករប្រដាល់ថៃល្បីម្នាក់ Rodtang គឺស្ថិតឯទីរួមខេត្តនៅឡើយ។
ក្នុងប្រវត្តិឡើងសង្វៀននៅប្រទេសថៃ Mongkolpetch និង Rodtang មិនធ្លាប់បានជួបគ្នាឡើយ ដូច្នេះប្រសិនបើអ្នកទាំងពីរបានជួបគ្នាអាចជាការប្រកួតគួរឲ្យចាប់អារម្មណ៍មួយសម្រាប់អ្នកគាំទ្រ៕