Anthony “The Archangel” Engelen បានដាក់ចិត្តវិលទៅកាន់សង្វៀនវិញដោយជួបជើងខ្លាំង Bruno “Puccibull” Pucci សាជាថ្មី និងបានអះអាងថា លើកនេះខុសពីលើកមុន។
Engelen និយាយថា ៖«ខ្ញុំអត់បានប្រកួតច្រើនខែមកហើយ ដោយសារកូវីដ-១៩។ ខ្ញុំគិតថា វាដល់ពេលដែលខ្ញុំវិលចូលសង្វៀនវិញ ហើយចង់ដៃគូដំបូងបំផុតរបស់ខ្ញុំនៅ ONE ដែលជួបគ្នាកាលពីឆ្នាំ២០១៥។ ខ្ញុំតែងតែប្រាប់មិត្តភក្តិថា ខ្ញុំមានលក្ខណៈសម្បត្តិគ្រប់គ្រាន់ដែលជួបគាត់ជាថ្មី»។
កាលពីខែធ្នូ ឆ្នាំ២០១៥ Engelen បានបោះជំងហានចូលសង្វៀន ONE លើកដំបូងជាមួយនឹងបទពិសោធ ៣-០ ស្រាប់នៅហ្វីលីពីន។ ប៉ុន្តែពេលនោះ Pucci ធ្វើបានយ៉ាងល្អដោយប្រើក្បាច់ឃ្លេរឹត-កឲ្យគាត់ចុះចាញ់ក្នុងទឹកទី២។
នៅពេល Engelen គិតទៅដល់ការប្រកួតនៅពេលនោះ គាត់ឃើញខ្លួនឯងនៅមានកម្រិតបើធៀបជាមួយ Pucci នារាត្រីនោះ។កីឡាករហុល្លង់-ឥណ្ឌូណេស៊ី បាននិយាយថា ៖«ដៃគូម្នាក់នោះខ្លាំង។ គាត់ជាកីឡាករចំបាប់កម្រិតពិភពលោក»។ យ៉ាងណា រយៈពេល៦ឆ្នាំកន្លងទៅ គាត់បានអភិវឌ្ឍច្រើនណាស់ដែលខុសពីមុនទាំងស្រុង។
Engelen និយាយថា ៖«ខ្ញុំរីកចម្រើនច្រើនណាស់ចាប់តាំងពីការប្រកួតនោះ ហើយយើងទាំងពីរបានដំណើរការអាជីពល្អរៀងៗខ្លួន។ យើងទាំងពីរបានប្រកួតជាមួយដៃគូខ្លាំងៗជាច្រើន រាប់បញ្ចូលទាំងអ្នកលំដាប់កំពូល ម្ចាស់ខ្សែក្រវាត់ ឬក៏ជើងឯកបច្ចុប្បន្នថែមទៀត»។
«យើងទាំងពីរទទួលបានជ័យជម្នះពីការប្រកួតរៀងៗខ្លួន តែក៏ចាញ់ខ្លះដូចគ្នាដែរ ហើយខ្ញុំគិតថា យើងទាំងពីរពេលនេះសមជាដៃគូគ្នាណាស់។ ដូច្នេះប្រសិនបើជំនួបនេះកើតឡើង វានឹងក្លាយជាការប្រកួតដ៏អស្ចារ្យ ធានាថា ល្អ១០០%»។
លើសពីនេះទៀត Engelen ក៏បានកំពុងកសាងកេរ្តិ៍ឈ្មោះ និងអ្នកគាំទ្រទូទាំងពិភពលោកដែលនឹងធ្វើឲ្យការប្រកួតរបស់គាត់ទទួលបានការចាប់អារម្មណ៍ខ្លាំង។
គាត់និយាយថា ៖«ហេតុអ្វីបានជាជំរុញឲ្យខ្ញុំខំប្រឹងកាន់តែខ្លាំងឡើងពីមួយថ្ងៃទៅមួយថ្ងៃ? ពីព្រោះតែខ្ញុំចង់ឲ្យការប្រកួតនេះកើតឡើង។ ច្បាស់ណាស់ ខ្ញុំចាញ់លើកទី១គឺខ្ញុំទទួលស្គាល់សមត្ថភាពខ្លួនឯង។ តែលើកនេះ ខុសពីមុន ខ្ញុំសង្ឃឹមឈ្នះ១០០%។ វានឹងក្លាយជាជ័យជម្នះដ៏អស្ចារ្យសម្រាប់ខ្ញុំបន្ទាប់»៕