លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក បានពន្យល់ពីសិទ្ធិអនុគ្រោះ ឬការអញ្ជើញ (Universal) ដែលអត្តពលិកហែលទឹកកម្ពុជាត្រៀមចូលរួមប្រកួតអូឡាំពិក ហ្គេម នៅទីក្រុងតូក្យូ ប្រទេសជប៉ុន ឆ្នាំ២០២០ (Tokyo Olympic Games 2020) ដែល គ្រោងនឹងធ្វើឡើងចាប់ពីថ្ងៃទី២៣ ខែកក្កដា រហូតដល់ថ្ងៃទី០៨ ខែសីហា ឆ្នាំ២០២១ (ពន្យារពេល)។
លោក ហែម គីរី បានលើកឡើងថា តាមពិតថ្មីដ្បិតតែហែលទឹកកម្ពុជាទទួលបានសិទ្ធិអនុគ្រោះ ឬការចូលរួមប្រកួតតាមការអញ្ជើញ (Universal) ប៉ុន្តែសិទ្ធិនេះក៏អាឈានដល់កម្រិតមេដាយបានដូចគ្នាដែរ ប្រសិនបើពូកគាត់អាចឈ្នះនៅវគ្គជម្រុះនោះ។ លោក បញ្ជាក់ថា ដូចជាកីឡាករ ហែម ប៉ុច ធ្លាប់បានចូលរួមប្រកួត នៅក្នុងព្រឹត្តិការណ៍ជើងឯក ហែលទឹកពិភពលោក នៅប្រទេសកូរ៉េ កាលពីឆ្នាំ២០១៨ គាត់ត្រូវបានកំណត់នូវថេរវេលា (Universal Time)ដែលទទួលស្គាល់ពីសហព័ន្ធកីឡាហែលទឹកអន្តរជាតិ (FINA)។
ចំណែកឯ កីឡាការិនីកូនកាត់ខ្មែរ-អាម៉េរិក ម៉ីលី តានមីននិក មិនទាន់ធ្លាប់ចូលរួមប្រកួតនៅក្នុង កម្រិតអន្តរជាតិ ដែលរៀបចំឡើងដោយ FINA នៅឡើយទេ។ ប៉ុន្តែសហព័ន្ធខ្មែរកីឡា ហែលទឹកបានយកសមិទ្ធផល (Perferment) ប្រកួតផ្លូវការនៅសហរដ្ឋអាមេរិកផ្ញើជូនទៅ FINA ដើម្បីឱ្យសហព័ន្ធហែលទឹកអន្តរជាតិមួយនេះកំណត់ថ្លឹងថ្លែងពិតប្រាកដ មិនមែន គ្រាន់តែអះអាងតែដោយសាម៉ីខ្លួនសហព័ន្ធ ឬសាម៉ីខ្លួនឡើយ។
លោកអគ្គលេខាធិការរូបនេះលើកឡើងទៀតថា សម្រាប់កីឡាករ កីឡាការិនីរបស់កម្ពុជា ដែលចូលរួមក្នុងសិទ្ធិអនុគ្រោះនេះ ប្រសិនបើពួកគាត់អាចបំបែកថេរវេលានៃការប្រកួតបានហើយអាចឡើងទៅដល់ការប្រជែងមេដាយបាន នោះពួកគាត់នឹងទទួលបានមេដាយបានដូចគេដែរ មិនមែនមានន័យថា អត្តពលិកដែលចូលរួមតាមការអញ្ជើញនេះគ្រាន់តែចូលរួមជាកិត្តិយសនោះឡើយ។
“អ្វីដែលសំខាន់ គឺយើងផ្ញើសិទ្ធផលជូនសហព័ន្ធអន្តរជាតិ គឺពេលវេលានោះមិនទាន់ដល់កម្រិតប្រកួតជម្រុះនៅឡើយទេ ប៉ុន្តែប្រសិនបើ ក្នុងការប្រកួតអូឡាំពិកហ្គេមនេះ យើងអាចបំបែកសិទ្ធផលចាស់បានរហូតដល់៦ ទៅ ៧វិនាទី ដែលអាចឈានដល់មេដាយសំរឹទ្ធិ ឬមេដាយមាស នោះគេផ្តល់មេដាយ នោះ ជូនយើងដូចគ្នាដែរ ហើយយ៉ាងច្រើនគេអាចធ្វើតេស្តលើអត្តពលិកនោះថា មានប្រើប្រាស់ ថ្នាំប៉ូវកម្លាំង (Doping) ឬអត់”។ នេះជាការបញ្ជាក់បន្ថែមរបស់លោក ហែម គីរី។
លោកបាន ពន្យល់បន្ថែមដែរថា ដូច្នេះនេះមានន័យថា ការចូលរួមប្រកួតរបស់អត្តពលិកអនុគ្រោះនេះ មិនមែនត្រឹមតែចូលរួមប្រកួតអមគេ ហើយពេលឈ្នះមេដាយគឺគេមិនឱ្យនោះទេ គឺគេផ្តល់ ជូនដូចគ្នា ដោយគ្រាន់តែយើងមានសិទ្ធិចូលរួមតែ១វិញ្ញាសា ដែលគេកំណត់ឱ្យ ដោយថេរវេលារបស់យើងមិនមែនជាថេរវេលាស្ថិតក្នុងកម្រិតជម្រុះជាប់ (Qualifiers) ចូលប្រកួតក្នុងអូឡាំពិកហ្គេម។
ជាមួយគ្នានេះដែរ សម្រាប់វិញ្ញាសាហែល ៥០ម៉ែត្រសេរី គឺការកំណត់របស់ FINA ដែលអាចជាប់ជម្រុះបាន ហើយចូលប្រកួតអូឡាំពិកហ្គេម គឺកីឡាការិនីត្រូវមានថេរវេលា ២៥វិនាទី ខណៈកីឡាការិនីកម្ពុជា ម៉ីលី តានមីននិក មានថេរវេលា ២៩ទៅ៣០វិនាទី ដូច្នេះកម្ពុជាយើងមិនជាប់នៅក្នុងកម្រិតជម្រុះជាប់នោះទេ ដោយយើងទៅចូលរួមប្រកួត ក្នុងសិទ្ធិអនុគ្រោះ Universal។
បើតាមលោក អគ្គលេខាធិការបានឱ្យដឹងដែរថា ប្រសិនបើកីឡាការិនីកម្ពុជាយើងអាចបំបែកកំណត់ត្រាចាស់ ធ្វើសម្រេចក្នុងថេរវេលា ត្រឹម២៥វិនាទីដូចគេ នោះយើងនឹងក្លាយជាអ្នកជាប់ពេញសិទ្ធិ ហើយប្រសិនបើអាចបំបែកត្រឹម ២៤វិនាទីនោះ ក៏នឹងអាចឈានដល់មេដាយដែរ ដែលនេះគឺជាការកំណត់របស់សហព័ន្ធកីឡាហែលទឹកអន្តរជាតិតែម្តង។
សហព័ន្ធខ្មែរកីឡាហែលទឹកបានត្រៀមកីឡាករ កីឡាការិនីជម្រើសជាតិ០២នាក់ គឺកីឡាករ ហែម ប៉ុច ហ្វឹកហាត់ក្នុងស្រុក និងកីឡាការិនីខ្មែរ-អាម៉េរិក ម៉ីលី តានមីននិក កំពុងបន្តការហ្វឹកហាត់នៅសហរដ្ឋអាមេរិក ត្រូវប្រកួតលើវិញ្ញាសាហែល៥០ម៉ែត្រសេរីដូចគ្នា ក្រោមការដឹកនាំពីលោក ហែម ថុនពន្លឺ ជាគ្រូបង្វឹកនឹងត្រូវចូលរួមអូឡាំពិកហ្គេម នាពេលខាងមុខឆាប់ៗនេះ។
សូមបញ្ជាក់ថា សម្រាប់ការចូលរួមប្រកួតក្នុងព្រឹត្តិការណ៍កីឡាអូឡាំពិក រៀងរាល់ ៤ឆ្នាំម្តង ដែលជាការប្រកួតកម្រិតខ្ពស់ជាងគេបំផុតក្នុងពិភពលោកនេះ គឺកម្ពុជាទទួលបាន សិទ្ធិអនុគ្រោះចំនួន២ប្រភេទកីឡា គឺហែលទឹក២នាក់ និងអត្តពលកម្មម្នាក់ គឺកីឡាករ ប៉ែន សុខគង់ ត្រូវប្រកួតលើវិញ្ញាសារត់ល្បឿន ១០០ម៉ែត្រ។
ចំពោះ២ប្រភេទកីឡាផ្សេងទៀត គឺ កីឡាគុនដាវ និងកីឡាតេក្វាន់ដូ WT បានធ្លាក់ចេញត្រឹមវគ្គជម្រុះកន្លងទៅដោយពុំ ទទួល បានកៅអី ឬសិទ្ធចូលរួមការប្រកួតនេះឡើយ៕