មុននឹងឈានដល់ការបើករដូវកាលថ្មី ២០២១/២២ នៅលីគកំពូលអឹរ៉ុប បច្ចុប្បន្ននេះអ្នកគាំទ្រវិស័យបាល់ទាត់កំពុងជក់ចិត្តដិតអារម្មណ៍ជាមួយនឹងការប្រកួតនៅព្រឹត្តិការណ៍ធំ ២ គឺ European Championsip និង Copa America។
និយាយឲ្យសាមញ្ញទៅមួយជាការប្រកួតសម្រាប់ក្រុមជម្រើសជាតិនៅតំបន់អឺរ៉ុប និងមួយផ្សេងទៀតសម្រាប់ក្រុមជម្រើសជាតិនៅប៉ែកអាមេរិកឡាទីន ឬអាមេរិកខាងត្បូង។ ចំណុចហ្នឹងហើយ ដែលអ្នកគាំទ្រមួយផ្នែកតូច នៅឆ្ងល់ថា ហេតុអ្វីការប្រកួត Euro បែរជាគ្មានក្រុមខ្លាំងដូចជាប្រេស៊ីលនិងអាហ្សង់ទីន?
យ៉ាងណានៅអត្ថបទនេះ យើងសូមបង្វែរអារម្មណ៍អ្នករាល់គ្នា ឲ្យបានដឹងពីទំហំប្រាក់រង្វាន់សម្រាប់ពានរង្វាន់ទាំងពីរវិញម្តង ថាតើវាតិចច្រើនជាងគ្នាបែបណា ហើយក្រុមនីមួយៗអាចទទួលបានប្រាក់ប៉ុន្មាន?
១) Euro 2020
នៅ Euro 2020 មានប្រាក់រង្វាន់សរុប ៣៧១ លានអឺរ៉ូ ដែលច្រើនជាងកាល Euro 2016 មានត្រឹម ៣០៤ លានអឺរ៉ូ។ ប្រាក់រង្វាន់ទាំងអស់នោះ នឹងត្រូវបែងចែកទៅកាន់ក្រុមជម្រើសជាតិទាំង ២៤ ដែលមានឈ្មោះចូលរួមការប្រកួត រាប់ចាប់ពីវគ្គចែកពូល។
ខាងក្រោមយើងបង្ហាញពីទំហំប្រាក់រង្វាន់តាមកម្រិតវគ្គនីមួយៗនៅ Euro 2020:
ក្រុមដែលមានឈ្មោះចូលរួមការប្រកួត ទទួលបាន ៩,២៥ លានអឺរ៉ូ
ប្រកួតស្មើនៅវគ្គចែកពូល ១ ប្រកួត បាន ៧៥០ ០០០ អឺរ៉ូ
ប្រកួតឈ្នះនៅវគ្គចែកពូល ១ ប្រកួត បាន ១,៥ លានអឺរ៉ូ
មានឈ្មោះឡើងទៅវគ្គ ១៦ ក្រុម បាន ២ លានអឺរ៉ូ
មានឈ្មោះឡើងទៅវគ្គ ៨ ក្រុម បាន ៣,២៥ លានអឺរ៉ូ
មានឈ្មោះឡើងទៅវគ្គ ៤ ក្រុម បាន ៥ លានអឺរ៉ូ
ប្រកួតបានត្រឹមតំណែងជើងឯករង បាន ៧ លានអឺរ៉ូ
ប្រកួតឈ្នះនៅវគ្គផ្ដាច់ព្រ័ត្រ បាន ១០ លានអឺរ៉ូ
ដូច្នេះមានន័យថា ក្រុមដែលធ្លាក់នៅវគ្គ ១៦ ក្រុម ដូចជាវែល ដែលចាញ់ ១ ស្មើ ១ ឈ្នះ ១ នៅវគ្គចែកពូល ទទួលបានសរុប ១៣,៥ លានអឺរ៉ូ (ក្នុងនោះមានឈ្មោះចូលរួមបាន ៩,២៥ លានអឺរ៉ូ + ជ័យជម្នះ ១,៥ លានអឺរ៉ូលើទួរគី និង ៧៥០ ០០០ អឺរ៉ូ ពេលស្មើស្វីស) ហើយបូកបន្ថែម ២ លានអឺរ៉ូ ក្រោយមានឈ្មោះឡើងមកដល់វគ្គ ១៦ ក្រុម។
ដោយឡែកក្រុមដែលក្លាយជាម្ចាស់ជើងឯក Euro 2020 ហើយឈ្នះទាំង ៣ ប្រកួតនៅវគ្គចែកពូល នោះទទួលបានសរុប ៣៤ លានអឺរ៉ូ ដែលស្មើនឹង ៤០ លានដុល្លារអាមេរិក។ យើងនឹងរង់ចាំមើល ថាតើក្រុមណាមួយក្លាយជាម្ចាស់ប្រាក់រង្វាន់ដ៏ច្រើនសន្ធឹកនេះ?
២) Copa America
នៅ Copa America 2021 មិនផ្តល់ប្រាក់រង្វាន់ដល់ក្រុមដែលចូលរួមច្រើនដូចនៅ Euro 2020 នោះឡើយ ដោយតាមរបាយការណ៍ជាច្រើនបានចុះផ្សាយស្រដៀងគ្នា ក្រុមដែលអាចទទួលបានប្រាក់រង្វាន់គឺលុះត្រាណាតែអាចឆ្លងផុតមកដល់វគ្គ ៨ ក្រុម។
តាមកម្រិតវគ្គនីមួយៗ មានការបែងចែកដូចខាងក្រោម៖
ក្រុមមានឈ្មោះឡើងមកវគ្គ ៨ ក្រុម បាន ២ លានដុល្លារ
ក្រុមមានឈ្មោះឡើងមកដល់វគ្គ ៤ ក្រុម បាន ១,៥ លានដុល្លារ
ក្រុមឈរលេខ ៤ ប្រចាំការប្រកួត បាន ២,៥ លានដុល្លារ
ក្រុមឈរលេខ ៣ ប្រចាំការប្រកួត បាន ៣ លានដុល្លារ
ក្រុមឈរតំណែងជើងឯករង បាន ៣,៥ លានដុល្លារ
ក្រុមឈ្នះជើងឯក បាន ៦,៥ លានដុល្លារ
ដូច្នេះមានន័យថា ក្រុមដែលឈ្នះជើងឯក Copa America សរុបបានតែប្រាក់នៅវគ្គ ៨ ក្រុម វគ្គ ៤ ក្រុមនិងវគ្គផ្ដាច់ព្រ័ត្រ ដែលទាំងអស់បាន ១០ លានដុល្លារ ពោលគឺតិចជាង ១ ទ្វេជា ៤ ធៀបនឹងក្រុមឈ្នះជើងឯកនៅ Euro 2020៕
ប្រភព៖ SillySeason