Phil Foden បច្ចុប្បន្នមានអាយុទើបតែ ២១ ឆ្នាំប៉ុណ្ណោះ ប៉ុន្តែបើនិយាយពីសមិទ្ធផល និងគុណភាពដែលគេសម្រេចបានលើទីលាន សឹងតែមានប្រៀបជាងកីឡាករកំពូលៗ ដែលជារៀមច្បងមួយចំនួនទៅទៀត។
Foden បច្ចុប្បន្នជាគ្រាប់ពេជ្ររបស់ក្លឹបមេឃខៀវ Manchester City ដែលមានតម្លៃខ្លួនប្រមាណ ៨០ លានអឺរ៉ូ ហើយក៏ចាប់ផ្ដើមក្លាយជារលកក្រោយ ដែលក្រុមជម្រើសជាតិអង់គ្លេសមិនអាចខ្វះបានផងដែរ។ តើអ្នកធ្លាប់ដឹងទេ Foden មានរឿងរ៉ាវគួរឲ្យចាប់អារម្មណ៍បែបណាខ្លះទាំងក្នុងនិងក្រៅទីលាន? នៅក្នុងអត្ថបទនេះ CTS Sports សូមធ្វើការបង្ហាញ ៥ ចំណុចដូចខាងក្រោម៖
៥) ការសរសើររបស់លោក Pep Guardiola
មិនមែនជាការកោតសរសើរធម្មតាដូចកីឡាករឯទៀតនោះទេ តែ Pep បាននិយាយថា Foden ជាកីឡាករមានទេពកោសល្យបំផុត ដែលលោកមិនធ្លាប់បានឃើញពីមុនមកក្នុងអាជីពជាអ្នកចាត់ការ។
ការលើកឡើងនេះ បានធ្វើឲ្យអ្នកគាំទ្រហាក់ភ្ញាក់ផ្អើលខ្លាំង ព្រោះគ្រូសញ្ជាតិអេស្ប៉ាញហាក់បានរំលង Lionel Messi ជាកីឡាករដែលលោកធ្លាប់បង្វឹកអស់រយៈពេល ៤ ឆ្នាំ។ នៅសន្និសីទមួយកាលពិខែកក្កដា ឆ្នាំ ២០១៩ លោក Guardiola និយាយ៖ “គេអាចក្លាយជាកីឡាករល្អបំផុតក្នុងលោក ដោយខ្ញុំបាននិយាយច្រើនសារហើយ ថា Phil ជាកីឡាករមានទេពកោសល្យដែលខ្ញុំមិនធ្លាប់បានឃើញពីមុនមក”។
៤) គេអាចទិញផ្ទះឲ្យខ្លួនឯងនៅតម្លៃ ២,៧ លានដុល្លារត្រឹមអាយុ ១៨ ឆ្នាំ
កាលពីឆ្នាំ ២០១៨ ដែលកាលនោះ Phil ប្រហែលទើបមានអាយុ ១៨ ឆ្នាំប៉ុណ្ណោះ តែគេអាចមានលទ្ធភាពទិញផ្ទះសម្រាប់ខ្លួនឯង នៅតម្លៃជាង ២,៧ លានដុល្លារ។
យុវជនសញ្ជាតិអង់គ្លេសរូបនេះ បាននាំគ្រួសាររបស់ខ្លួនពីទីក្រុង Stockport មករស់នៅជុំគ្នាក្នុងទីក្រុង Manchester ដែលនេះសបង្ហាញថា គេពិតជាយុវជនដ៏គំរូមួយ។
៣) ក្លាយជាឪពុក នៅអាយុ ១៨ ឆ្នាំ
ខ្លាំងជាង Neymar ទៅទៀត ដោយ Foden បានក្លាយជាឪពុករបស់កូនប្រុសឈ្មោះ Ronnie ជាមួយនឹងមិត្តស្រី Rebecca Cooke នៅពេលគេមានអាយុ ១៨ ឆ្នាំ។
និយាយដោយភាពចាស់ទុំ Foden ធ្លាប់ប្រាប់ថា៖ “ពេលខ្ញុំត្រលប់ទៅដល់ផ្ទះ ហើយបានឃើញស្នាមញញឹមកូនប្រុសខ្ញុំ ក៏ធ្វើឲ្យខ្ញុំភ្លេចអស់នៅរឿងរ៉ាវតប់ប្រមល់នៅការប្រកួតមិនល្អ ដែលនេះបង្ហាញច្បាស់ថា ពេលយើងក្លាយជាឪពុកគេ យើងបានមើលឃើញពីជ្រុងផ្សេងទៀតនៃជីវិត”។
២) គេជាអ្នកគាំទ្រ City តែឪពុកគេជាអ្នកគាំទ្រ United
Foden គេជាអ្នកគាំទ្រក្លឹប Man City តាំងតែពីនៅតូច ហើយបានមកចូលរួមហ្វឹកហាត់នៅថ្នាលយុវជនពេលគេមានអាយុ ៨ ឆ្នាំនៅឆ្នាំ ២០០៩។ យ៉ាងណាវាជារឿងដ៏ហួសចិត្តមួយ ដោយឪពុករបស់គេលោក Phil Snr. ជាអ្នកគាំទ្ររបស់ United ឯណោះទេ ដោយលោកធ្លាប់លើកឡើងថា ឲ្យតែមានការប្រកួត Manchester Derby ម្តងៗ ក្នុងគ្រួសារលោកតែងតែទាស់ពាក្យនឹងគ្នាហើយ។
បញ្ជាក់ថា កាលនៅកុមារភាព idol ក្នុងដួងចិត្តរបស់ Foden មិនមែនជាតារាឆ្នើម Lionel Messi ឬ Cristiano Ronaldo អ្វីនោះទេ ផ្ទុយទៅវិញគឺជា David Silva ដែលធ្លាប់ជាអតីតកីឡាករឆ្នើមនៅក្លឹប Manchester City ផ្ទាល់តែម្តង។
១) Foden ធ្លាប់ចារឈ្មោះក្នុងកំណត់ត្រាពិភពលោក
ក្នុងសៀវភៅកត់ត្រាកំណត់ត្រាពិភពលោក តើអ្នកដឹងទេ Phil Foden ក៏មានឈ្មោះនៅក្នុងនោះដែរ? ក៏ដោយសារតែគេបានក្លាយជាកីឡាករឈ្នះពាន Premier League ទាំងស្ថិតនៅវ័យក្មេងបំផុត ដោយត្រឹមតែអាយុ ១៧ ឆ្នាំនិង ៣៥០ ថ្ងៃ Foden បានលើកពានលីគកំពូលអង់គ្លេស ជាមួយ City ដែលមាន ១០០ ពិន្ទុពេញ។
ជាងនេះគេក៏បានបំបែកកំណត់ត្រាធំៗផ្សេងទៀត ដូចជា ឈ្មោះជាកីឡាករដែលកើតឆ្នាំ ២០០០ ដំបូង អាចលេងនៅ Champions League និងបច្ចុប្បន្នជាកីឡាករវ័យក្មេងដែលអាចឈ្នះពានខ្នាតធំច្រើនជាង ១០ នៅក្នុងពិភពបាល់ទាត់៕
ប្រភព៖ GiveMeSport