បរាជ័យលើកចុងក្រោយរបស់ក្រុមជម្រើសជាតិអ៊ីតាលីកើតឡើងនៅថ្ងៃទី ១១ កញ្ញា ឆ្នាំ ២០១៨ កាលនោះនៅពានរង្វាន់ UEFA Nations League ដែលអ៊ីតាលីបានចាញ់ព័រទុយហ្គាល់ ១-០។ លុះក្រោយៗមក អ្នកចាត់ការលោក Roberto Mancini ទំនងជារកឃើញចន្លោះប្រហោង ហើយបានកែតម្រូវរហូតទទួលបានជោគជ័យជាបន្តបន្ទាប់ និងមិនស្គាល់ពាក្យថា “ចាញ់” នៅរយៈពេលជិត ៣ ឆ្នាំចុងក្រោយ។
អ៊ីតាលីនៅ Euro 2020 សារនេះ ធ្វើបានល្អមិនគួរឲ្យជឿ ដោយប្រកួតនៅវគ្គចែកពូលពួកគេរកបាន ៧ គ្រាប់ ហើយទើបតែយកឈ្នះអូទ្រីស ២-១ សម្រេចមកត្រូវជួបបែលហ្សិកនៅវគ្គបន្ទាប់ ៨ ក្រុមចុងក្រោយ។
ពេលនេះអ៊ីតាលីកំពុងឈរលើកំណត់ត្រា មិនទាន់ស្គាល់ពាក្យថាចាញ់ ៣១ ប្រកួតបណ្ដាក់គ្នា ពោលទទួលបានតែជ័យជម្នះ និងស្មើ តែនេះពុំមានន័យថា អ៊ីតាលីឈរដាច់គេនោះទេ ដោយកំណត់ត្រាក្រុមជម្រើសជាតិលេងមិនស្គាល់ពាក្យថា “ចាញ់” បណ្ដាក់គ្នាច្រើនប្រកួតបំផុត គឺនៅមានក្រុម ២ ផ្សេងទៀតដែលមានស្ថិតិខ្ពស់ជាងអ៊ីតាលី។
តោះកុំរង់ចាំយូរ CTS Sports ធ្វើការបង្ហាញកំណត់ត្រាក្រុមជម្រើសជាតិ ៥ លេងមិនស្គាល់ពាក្យថា “ចាញ់” ជាប់គ្នាច្រើនប្រកួតបំផុត៖
=៣) ហុងគ្រី ធ្វើបាន ៣១ ប្រកួត
ជាយុគសម័យជោគជ័យខ្លាំងរបស់ក្រុមហុងគ្រី ដោយបានកើតឡើងនៅចន្លោះឆ្នាំ ១៩៥០ ដល់ ១៩៥៤។ រយៈពេលជាង ៤ ឆ្នាំ ឆ្លងកាត់ ៣១ ប្រកួត ហុងគ្រីមិនស្គាល់ពាក្យថា “ចាញ់” ទាល់តែសោះ ដោយកាលនោះធ្លាប់យកឈ្នះសុទ្ធតែគីឡូធ្ងន់មានដូចជាប្រេស៊ីល អ៊ុយរុយហ្គាយ និងអង់គ្លេសជាដើម។
ហុងគ្រីត្រូវបានជាប់រហស្សនាមថា “The Golden Team” នៅសម័យកាលនោះ ហើយប៊ិះតែនឹងឈ្នះពានរង្វាន់ FIFA World Cup ថែមទៀត តែបានត្រឹមជើងឯករង ក្រោយចាញ់អាល្លឺម៉ង់ខាងលិចនៅវគ្គផ្ដាច់ព្រ័ត្រ ៣-២ ក៏ជាក្រុមដែលផ្តាច់ចង្វាក់នៃកំណត់ត្រាមិនស្គាល់ពាក្យថា “ចាញ់” របស់ហុងគ្រី។
=៣) អាហ្សង់ទីន ធ្វើបាន ៣១ ប្រកួត
ចាប់តាំងពីឆ្នាំ ១៩៩១ ដល់ ១៩៩៣ អាហ្សង់ទីនបានក្លាយជាក្រុមមួយនៅអាមេរិកឡាទីនដែលលេចធ្លោបំផុត ហើយក៏ជាក្រុមដែលពិភពលោកខ្លាចរអាផងដែរ។ អាហ្សង់ទីនកាលនោះរាប់បានថាល្អជាងទាំងប្រេស៊ីលទៅទៀត ដោយយកឈ្នះ និងស្មើនៅការប្រកួតជាបន្តបន្ទាប់ រយៈពេលជាង ២ឆ្នាំជាប់គ្នា។
ប៉ុន្តែចុងក្រោយបែរជាមកបរាជ័យក្រោមថ្វីជើងរបស់កូឡុំប៊ីនៅខែកញ្ញា ឆ្នាំ ១៩៩៣ នៅការប្រកួតវគ្គជម្រុះ FIFA World Cup ប្រចាំតំបន់អាមេរិកខាងត្បូង ដែលកូឡុំប៊ីស៊ីអាហ្សង់ទីនស្ពឹកមុខ ៥-០។
=៣) អ៊ីតាលី កំពុងបន្តនៅប្រកួតទី ៣១
អ៊ីតាលី ប្រសិនជាអាចយកឈ្នះនៅប្រកួតក្រោយទល់បែលហ្សិក នោះពួកគេនឹងអាចនាំមុខកំណត់ត្រារបស់អាហ្សង់ទីន និងហុងគ្រីបានហើយ ពោលគឺមិនស្គាល់ពាក្យថា “ចាញ់” ៣២ ប្រកួត។
ជាងនេះអ៊ីតាលីក៏អាចមានសង្ឃឹមតាមស្មើ ឬបំបែកក្រុម ២ ផ្សេងទៀត ដែលធ្វើបាន ៣៥ ប្រកួត ក្នុងករណីដែលអាចឈ្នះពានរង្វាន់ Euro 2020 ហើយបន្តយកឈ្នះប្រកួតជម្រុះបឋម World Cup នៅចុងឆ្នាំនេះ។ យើងក៏នឹងរង់ចាំមើល ថាតើក្រុមណាទៅដែលមានលទ្ធភាពអាចបញ្ចប់កំណត់ត្រារបស់អ៊ីតាលីបាន?
=១) ប្រេស៊ីល ធ្វើបាន ៣៥ ប្រកួត
នៅសម័យកាលឆ្នាំ ១៩៩៣ ដល់ ១៩៩៦ ប្រេស៊ីលបានបង្កើតកំណត់ត្រាមិនស្គាល់ពាក្យថា “ចាញ់” ចំនួន ៣៥ ប្រកួត ដំបូងគេបង្អស់ក្នុងលោក។ រឿងដែលគេចងចាំបំផុត កាលនោះក្រុមសាំបាប្រេស៊ីលក៏បានឈ្នះពានរង្វាន់ FIFA World Cup ឆ្នាំ ១៩៩៤ ផងដែរ ក្រោយយកឈ្នះអ៊ីតាលីនៅបាល់ថែមម៉ោងប៉េណាល់ទី តែកំណត់ត្រារបស់ពួកគេបែរជាមកត្រូវបញ្ចប់ក្រោមថ្វីជើងរបស់ម៉ិកស៊ីកូ។
ប្រេស៊ីលបានបរាជ័យ ក្រោមលទ្ធផល ២-០ ទល់ម៉ិកស៊ីកូ នៅការប្រកួតពានរង្វាន់ Gold Cup នាឆ្នាំ១៩៩៦។
=១) អេស្ប៉ាញ ធ្វើបាន ៣៥ ប្រកួត
បន្ទាប់ពីប្រេស៊ីលទៅ អេស្ប៉ាញក៏ក្លាយជាក្រុមបន្ទាប់ដែលអាចធ្វើបានដល់ទៅ ៣៥ ប្រកួតស្មើគ្នា នៅចន្លោះឆ្នាំ ២០០៧ ដល់ ២០០៩។ ជាសម័យកាលមាសរបស់អេស្ប៉ាញ ពោរពេញទៅដោយកីឡាករកំពូលៗដូចជា Fernando Torres, Andres Iniesta, David Villa និង Xavi ជាដើម។
អេស្ប៉ាញក៏បានឈ្នះពាន Euro 2008 តែអ្វីដែលមិនគួរឲ្យជឿ ក្រុមគោជល់បែរជាមកភ្លាត់ចាញ់សហរដ្ឋអាមេរិក នៅពានរង្វាន់ Conderations Cup ក្រោមលទ្ធផល ២-០ នាំឲ្យខកខានការបំបែកកំណត់ត្រារបស់ក្រុមប្រេស៊ីល៕
ប្រភព៖ FoxSoccer