ព្រឹត្តិការណ៍ Euro 2020 ទើបតែបញ្ចប់ការប្រកួតនៅវគ្គចែកពូលកាលពីពេលកន្លងទៅ ហើយយើងក៏សម្រេចរកឃើញក្រុមដែលត្រូវប៉ះគ្នានៅវគ្គបន្ទាប់ ១៦ ក្រុមចុងក្រោយ។ ក្នុងនោះមានដូចជា៖
បែលហ្សិក-ព័រទុយហ្គាល់
អ៊ីតាលី-អូទ្រីស
បារាំង-ស្វីស
ក្រូអាត-អេស្ប៉ាញ
ស៊ុយអែត-អ៊ុយក្រែន
អង់គ្លេស-អាល្លឺម៉ង់
ហូឡង់-សាធារណរដ្ឋឆេក
វែល-ដាណឺម៉ាក
ឆ្លងកាត់ ៣៦ ប្រកួត ក្នុងចំណោម ៥១ ប្រកួតសរុប កន្លងមកនេះ ក៏ជឿថាអ្នកគាំទ្រវិស័យបាល់ទាត់ប្រាកដជាទទួលបាននូវទស្សនីយភាពប្លែកភ្នែកជាច្រើនដែលកើតឡើង ហើយខ្លះក៏ជារឿងល្អសម្រាប់ក្រុមនីមួយៗ និងខ្លះក៏ជារឿងដែលមិននឹកស្មានថាកើតឡើងក្នុងប្រវត្តិសាស្ត្រពានរង្វាន់មានអាយុកាល ៦៣ ឆ្នាំមួយនេះ។
ទំព័រ CTS Sports ធ្វើការសង្ខេបឡើងវិញនូវរឿងរ៉ាវគួរឲ្យចាប់អារម្មណ៍ ៤ ដែលបានកើតឡើងនៅវគ្គចែកពូល Euro 2020៖
៤) គ្រាប់បាល់ Own Goal កើតឡើងច្រើនមិនធ្លាប់មាន
Euro 2020 ជាសម័យកាលប្រកួតមួយ ដែលកើតមានគ្រាប់បាល់ Own Goal ច្រើនបំផុតមិនធ្លាប់មាន ដោយសរុប ៩៤ គ្រាប់នៃការស៊ុតបញ្ចូលទីនៅ ៣៦ ប្រកួត គឺកើតមានបាល់ចូលទីខ្លួនឯងដល់ទៅ ៨ គ្រាប់ ប្រហែលក្បែរ ១០ ភាគរយទៅហើយ។
ប្រវត្តិសាស្ត្រពានរង្វាន់អឺរ៉ុប European Championship សរុបមានបាល់ Own Goal តែ ១៧ គ្រាប់គត់ ហើយ ៨ គ្រាប់បានកើតឡើងគិតត្រឹមវគ្គចែកពូលនៅ Euro 2020 ដោយក្នុងនោះមានជម្រើសជាតិព័រទុយហ្គាល់ និងស្លូវ៉ាគី ដែលបាន Free ពីរគ្រាប់រៀងគ្នាឲ្យទៅក្រុមគូប្រជែង។
ក៏កើតមានពាក្យមួយដែលគេនិយាយនៅជុំចុងក្រោយវគ្គចែកពូល នោះគឺពាក់ព័ន្ធនឹងអ្នកចាំទី Martin Dubravka ដែលបានដើរតួជា Hero ក្លាយមកជា Zero បន្ទាប់ពីអាចសង្រ្គោះបាល់ប៉េណាល់ទីរបស់ Morata ហើយក្រោយមកបែរជាវ៉ៃបាល់ចូលទីខ្លួនឯង។
៣) ការបន្តភាពល្អឥតខ្ចោះរបស់ Ronaldo
ដ្បិតឈានចូលវ័យ ៣៦ ឆ្នាំហើយក្តី ប៉ុន្តែគុណភាពនៃការបញ្ចប់ទី និងការប្រើប្រាស់ល្បឿនលើទីលាន Ronaldo នៅតែធ្វើបានល្អ ហើយពេលនេះកំពុងនាំមុខតំណែង Top Scorer រកបាន ៥ គ្រាប់ឲ្យព័រទុយហ្គាល់។
CR7 ក៏ទើបតែតាមស្មើកំណត់ត្រារបស់ Ali Daei នាមជាកីឡាកររកបានគ្រាប់បាល់ច្រើនបំផុតឲ្យក្រុមជម្រើសជាតិ ពោលគឺ ១០៩ គ្រាប់។ គ្រាប់បាល់ទី ១១០ ដែលត្រៀមបំបែកកំណត់ត្រា Daei ក៏នឹងអាចកើតឡើង ប្រសិនណា Ronaldo អាចបំប៉ោងសំណាញ់ទីរបស់បែលហ្សិកនៅការប្រកួតវគ្គ ១៦ ក្រុមនាចុងសប្ដាហ៍នេះ។
២) ជ័យជម្នះមិនគួរឲ្យជឿរបស់អេស្ប៉ាញ
នៅជុំទី ១ អេស្ប៉ាញលេងបានត្រឹមស្មើ ០-០ ទល់ស៊ុយអែត ហើយចូលមកជុំទី ២ ស្មើ ១-១ ទល់ប៉ូឡូញ ដែលនាំឲ្យក្រុមដឹកនាំដោយលោក Luis Enrique រាងប្រផុតប្រផើយដែរក្នុងការចាប់យកឱកាសឆ្ពោះទៅកាន់វគ្គបន្ទាប់។
ប៉ុន្តែនរណាទៅជឿនោះ វគ្គចុងក្រោយបែរជាអេស្ប៉ាញ លុតស្លូវ៉ាគីទក់សាច់ដោយលទ្ធផល ៥-០ ជួយឲ្យក្រុមអាចឡើងទៅកាន់វគ្គបន្ទាប់បានដោយជោគជ័យ។ លទ្ធផល ៥ គ្រាប់នេះ ជាកំណត់ត្រាលើកទី ១ របស់អេស្ប៉ាញ ដែលអាចស៊ុតទល់ក្រុមគូប្រជែងច្រើនគ្រាប់បំផុត។
មតិជាច្រើនជឿថា អេស្ប៉ាញលេងមិនទុកមុខឲ្យស្លូវ៉ាគី ក៏ដោយសារខឹងពាក្យសម្តីរបស់អតីតកីឡាករ Real Madrid និងជម្រើសជាតិហូឡង់គឺ Rafael van der Vaart ដែលមាក់ងាយក្រុមគោជល់ ថាបានតែត្រឹមលេងប៉ះបាល់ទៅមក ហើយគ្មានបានសាច់ការនៅការបញ្ចប់ទីឡើយ។
១) ការមកលងបន្លាចរបស់ហុងគ្រី
ពូល F ដែលជាពូលមរណៈ គឺពិតជាមិនអាចមើលស្រាលបានមែន ជាពិសេសគឺក្រុមហុងគ្រី ដែលអ្នករាល់គ្នាទស្សន៍ទាយទុកមុនហើយថា ក្រុមឈរលេខ ៣៧ នៅ FIFA Ranking មួយនេះ នឹងគ្មានគីឡូអាចឆ្លងផុតទៅកាន់វគ្គបន្ទាប់ឡើយ។
លទ្ធផលគឺដូចការរំពឹងទុក តែមុននឹងធ្លាក់ ហុងគ្រីក៏បានបន្លាចក្រុមធំៗដូចជាបារាំង និងអាល្លឺម៉ង់ ឲ្យស្គាល់រសជាតិ មិនទទួលជ័យជម្នះផងដែរ។ បម្រែបម្រួលលទ្ធផលនៅពូល F ហាក់ធ្វើឲ្យគ្រប់គ្នា នឹកស្មានមិនដល់ ព្រោះហុងគ្រីដែលលេងចាញ់ព័រទុយហ្គាល់ ៣-០ តែបែរជាមកយកឈ្នះទៅលើបារាំង និងតាមដល់ស្មើអាល្លឺម៉ង់នៅជុំចុងក្រោយ។
អ្វីដែលគួរឲ្យចាប់អារម្មណ៍ទៅទៀតនោះ ហុងគ្រីគឺជាក្រុមតែមួយគត់ ដែលមានអ្នកគាំទ្រចូលទស្សនាពេញកីឡដ្ឋានជាង ៦ មុឺននាក់ ហើយវាក៏ជាមូលហេតុដែលកីឡាករបារាំង Antoine Griezmann ថា បារាំងចាញ់ព្រោះខ្លាចសំឡេងគាំទ្ររបស់ប្រជាជនហុងគ្រី៕