ខ្សែបម្រើ Jordan Henderson ជឿជាក់ថាមិត្តរួមក្រុម Jadon Sancho និង Jude Bellingham នឹងប្រាប់ពីចំណុចខ្លាំងរបស់កីឡាករអាល្លឺម៉ង់ ក៏ដូចជាការលេងរបស់ជម្រើសជាតិនេះឱ្យអង់គ្លេសដឹងមិនខាន។
អង់គ្លេស នឹងត្រូវប៉ះជាមួយក្រុមអាល្លឺម៉ង់នៅវគ្គ១៦ក្រុមចុងក្រោយពានរង្វាន់ Euro 2020 នេះហើយនៅកីឡដ្ឋាន Wembley ផ្ទាល់តែម្ដង។ ក្នុងការប្រកួតនេះដែរ Henderson ដែលខកខានកន្លងមក ក៏រំពឹងថានឹងមានឱកាសបង្ហាញខ្លួនជម្រើសដំបូងឡើងវិញផងដែរ ក្រោយពីរូបគេបានត្រៀមខ្លួនជាស្រេចហើយសម្រាប់ជួយក្រុមជម្រើសជាតិអង់គ្លេស។
កីឡាករលេងនៅក្លឹបអាជីព Liverpool ខាងលើបាននិយាយថា៖ “ប្រាកដហើយថា Sancho និង Bellingham នឹងស្គាល់កីឡាករអាល្លឺម៉ង់ច្បាស់។ គ្នាយើងច្រើនទៀតក៏បានស្គាល់កីឡាករនិងលេងជាមួយកីឡាករអាល្លឺម៉ង់ដែរ។ ពួកគេជាកីឡាករមានសមត្ថភាព យើងបានដឹងច្បាស់ហើយ។ យើងបានមើលពួកគេលេងក្នុងការប្រកួតនៅ Euro នេះដូចគ្នា។ យើងសង្ឃឹមថានេះជាចំណុចល្អរបស់យើង ដើម្បីស្គាល់ពួកគេច្បាស់មុនការប្រកួត”៕ប្រភព៖ DailyMail
