ក្រោយជាប់គាំងក្នុងចចាមអារ៉ាមអស់រយៈពេលជាច្រើនខែ ទីបំផុត Memphis Depay បានសម្រេចការផ្ទេរមកក្លឹបថ្មី Barcelona ជាផ្លូវការហើយ ដោយនេះជាការផ្ទេរលើលក្ខខណ្ឌឥតតម្លៃខ្លួន ក្រោយអស់សុពលភាពកុងត្រាជាមួយក្លឹបចាស់ Lyon។
ខ្សែប្រយុទ្ធសញ្ជាតិហូឡង់រូបនេះ នឹងមកចូលរួមក្រោមការដឹកនាំរបស់គ្រូរួមសញ្ជាតិលោក Ronald Koeman ហើយក៏មានសង្ឃឹមថាអាចជាប់ជម្រើសដំបូងច្រើនផងដែរ។ បច្ចុប្បន្នគេកំពុងជាប់ភារកិច្ចជួយជម្រើសជាតិហូឡង់នៅ Euro 2020 ដែលត្រៀមនឹងឡើងទៅកាន់វគ្គ ១៦ ក្រុមនាពេលខាងមុខ។
Depay បានប្រាប់គេហទំព័រផ្លូវការរបស់ Barcelona ថ្មីៗនេះថា៖ “ក្តីស្រមៃចង់មកចូលរួមនៅក្លឹបធំបំផុតក្នុងលោករបស់ខ្ញុំ បានក្លាយជាការពិត ដោយខ្ញុំពិតជាចង់អរគុណដល់ប្រធានក្លឹបនិងអ្នកចាត់ការលើការចុះហត្ថលេខានេះ ហើយទីបញ្ចប់យើងបានឈានដល់កិច្ចព្រមព្រៀងជាមួយភាគី Lyon ផងដែរ”។
លោកបន្ត៖ “ខ្ញុំនៅចង់ទទួលបានអារម្មណ៍ក្នុងការលេង ដោយមានអ្នកគាំទ្រពេញកីឡដ្ឋាន និយាយទៅចង់លេងនៅពីមុខអ្នកគាំទ្រដ៏ច្រើន ហើយវានឹងក្លាយជាអារម្មណ៍ដ៏ពិសេសមួយជាមួយក្លឹបនេះ”៕
ប្រភព៖ Marca