Lito “Thunder Kid” Adiwang បានប្រកាសចង់ជួបសត្រូវចាស់ Hiroba Minowa និងផ្តួលឲ្យអស់ជើងខ្លាំង៥រូបដែលមានចំណាត់ថ្នាក់ក្នុងទម្ងន់ strawweight នៃកីឡាគុនចម្រុះ។ ប៉ុន្តែតារាហ្វីលីពីនម្នាក់នេះជឿជាក់ថា ខ្លួនមានអាវុធដែលអាចយកឈ្នះជើងឯកមួយថៃពិភពលោក ONE Flyweight មនុស្សដែក Rodtang “The Iron Man” Jitmuangnonបាន។
អ្នកគាំទ្រដឹងហើយថា តារាប្រដាល់ថៃមិនទាន់ស្គាល់បរាជ័យម្តងណាឡើយក្នុងការប្រកួតនៅសង្វៀនពិភពលោក ONE Super Series គឺទទួលបានជ័យជម្នះ១០-០ជាប់គ្នាទាំងមួយថៃ និងឃីកបុកសីង។
ទោះយ៉ាងណាបើជួប Adiwang ក៏មិនអាចប៉ាន់ស្មានបានដែរ។ តាមពិតទៅ កីឡាកររហស្សនាម “Thunder Kid”បានក្លាយជាតារាគ្រោះថ្នាក់ម្នាក់ទៅហើយមុនពេលហ៊ានអះអាងថា ខ្លួនអាចយកឈ្នះជើងខ្លាំងថៃមកពីក្លឹប Jitmuangnon Gym។
កីឡាករនិយាយថា ៖«ខ្ញូំចង់ហៅឲ្យ Rodtang វ៉ៃជាមួយខ្ញុំ។ ខ្ញុំពិតជាមានឆន្ទៈប្រកួតជាមួយគាត់ ១០០០%។ ខ្ញុំនឹងវ៉ៃលក្ខណៈ ONE Super Series ប្រសិនបើគេរៀបចំឲ្យខ្ញុំជួប Rodtang។ ខ្ញុំដឹងថា គាត់ជាជើងខ្លាំងគ្មានអ្នកបញ្ឈប់ តែខ្ញុំជឿលើខ្លួនឯងមានអាវុធអាចបង្ក្រាប Rodtang ពីព្រោះខ្ញុំបានស្គាល់ពីក្បាច់វ៉ៃរបស់គាត់ច្បាស់ណាស់»។
អ្នកលេងគុនចម្រុះហ្វីលីពីនបានបន្តថា ៖«ខ្ញុំបានឃើញអ្នកគាំទ្រពិតជាចង់ឲ្យមានការប្រកួតនេះណាស់គឺជាមួយខ្ញុំ។ ខ្ញុំពិតជាចង់ប្រកួតណាស់ ហើយជឿថា នៅពេលយើងតទល់គ្នា យើងអាចបង្ហាញនូវការប្រកួតដ៏អស្ចារ្យដែលអ្នកគាំទ្រចង់បាន។ ខ្ញុំនឹងធ្វើឲ្យបានល្អបំផុត ពីព្រោះខ្ញុំដឹងថា ខ្ញុំអាចធ្វើបាន ប្រសិនបើពិតជាបានជួប Rodtang»។
ចាប់តាំងពីចូលប្រឡូកក្នុងសង្វៀនពិភពលោកកាលពីខែកញ្ញា ឆ្នាំ២០១៨មក Rodtang បានបង្ហាញជាកីឡាករដែលល្អបំផុតជាមួយនឹងអាវុធមានទម្ងន់ កម្លាំងខ្លាំង កាយសម្បទាមាំមួន និងស្មារតីអង់អាចក្លាហានពោរពេញដោយឆ្លាតវៃ។
សិស្សក្លឹប Jitmuangnon Gym បានឈ្នះខ្សែក្រវាត់មួយថៃពិភពលោក ONE Flyweight និងរក្សាខ្លួនជាជើងខ្លាំងមិនដែលចាញ់សោះ បន្ទាប់ពីឡើងសង្វៀន ONE ១០ដងឈ្នះទាំងអស់ និងបានក្លាយជាកីឡាករតែម្នាក់គត់ដែលមានកំណត់ត្រាឈ្នះ១០លើកជាប់គ្នា។
ចំណែក Adiwang ពិតជាកោតសរសើរតារាថៃម្នាក់នេះណាស់ ហើយតែងតែតាមដានមើលការប្រកួតរបស់ Rodtang ជានិច្ច ជាពិសេស ពេលប្រកួតជាមួយ “Mini T” Danial Williams នៅព្រឹត្តិការណ៍ “ONE on TNT I” កាលពីខែមេសា។
កីឡាករហ្វីលីពីនអាយុ២៨ឆ្នាំបាននិយាយថា ៖«ខ្ញុំពិតជាជឿជាក់ថា ខ្ញុំមានអ្វីដែលអាចយកឈ្នះបាន។ ខ្ញុំមានគន្លឹះពិសេសអាចឈ្នះ Rodtang។ ខ្ញុំឃើញការប្រកួតរបស់គាត់គឺខ្ញុំអាចគ្រប់គ្រងបាន»។
«ខ្ញុំលើកជាឧទាហរណ៍មួយ នៅក្នុងការប្រកួតចុងក្រោយរបស់គាត់ជាមួយ ‘Mini-T គាត់បង្ហាញពីចំណុចខ្សោយ។ Williams មិនបានធ្វើព្យុះភ្លៀងខ្លាំងទេ គាត់ឈឺចាប់ ហើយគាត់ពិបាករឿងវ៉ៃបក។ ការប្រកួតនោះ យើងមិនឃើញអ្វីដែលជាចំណុចគ្រោះថ្នាក់របស់ Rodtang ទេគឺមើលឃើញធម្មតា»។
«ខ្ញុំដឹងទាំងអស់ពីរបៀបវ៉ៃរបស់ Rodtang។ គាត់មានកម្លាំងខ្លាំង និងទាត់លឿន ហើយបច្ចេកទេសល្អ។ ប៉ុន្តែនៅពេល ‘Mini-T’ប្តូរគឺបានធ្វើឲ្យកីឡាករថៃ ម្នាក់នេះទទួលរងកណ្តាប់ដៃមិនស្ទើរដែរ»។
«ខ្ញុំគិតថា ខ្ញុំមានកូនសោអាចដោះរបៀបវ៉ៃរបស់ Rodtang។ និយាយទៅ គាត់មានចលនាក្បាលគេចពីដៃគូល្អណាស់។ គាត់ឈ្នះការប្រកួតច្រើនណាស់ពីជំនាញនេះ។ បើវ៉ៃក្បាច់ប្លែង ចេញអាវុធចម្រុះខុសពីមួយថៃ ខ្ញុំជឿថា គាត់នឹងជួបបញ្ហា»។
ក្បាច់វ៉ៃរបស់ Adiwang អាចធ្វើឲ្យដៃគូជួបបញ្ហាមែន។ រូបគេបានបង្ហាញបច្ចេកទេសល្អ និងកណ្តាប់ដៃពិឃាតនៅពេលដែលផ្តួលកីឡាករជប៉ុន Namiki Kawahara។ បន្ថែមលើនេះ កីឡាករដែលមានមូលដ្ឋានគ្រឹះកីឡាវូសូបានសាំនឹងស្រោមដៃគុនចម្រុះ៤អោនទៅ។ ដុច្នេះប្រសិនបើគាត់ប្តូរពីគុនចម្រុះ ទៅនឹងមួយថៃ ឬឃីកបុកសីងជាមួយ Rodtang ពិតជាគ្មានអ្វីគួរឲ្យបារម្ភសម្រាប់គាត់ទេ។ គាត់ជឿថា គាត់នឹងក្លាយជាកីឡាករទី១ដែលផ្តល់ឲ្យអធិរាជសង្វៀនមួយថៃស្គាល់បរាជ័យលើកដំបូង។
កីឡាករហ្វីលីពីននិយាយថា ៖«ខ្ញុំបានឃើញ១០០ដងនៅក្នុងគំនិតរបស់ខ្ញុំ គាត់ក៏ជាមនុស្សដូចយើងដែរ។ គាត់ជាអ្នកកីឡា តែគាត់ក៏ជាមនុស្សដែរ។ បើខ្ញុំអាចបានជួបគាត់ ខ្ញុំមានវិធីផ្តល់ឲ្យគាត់ស្គាល់មេរៀនម្តង»។
ទោះបីជា Adiwang មានឆន្ទៈចង់ប្រឡូកប្រដាល់មួយថៃជាមួយ Rodtang ក៏គាត់រីករាយទៅហើយចំពោះអាជីពប្រដាល់គុនចម្រុះរបស់គាត់នៅលើពិភពលោក។ ជាយូរមកហើយ អធិរាជសង្វៀនមួយថៃក៏បង្ហាញឆន្ទៈចង់ចូលប្រឡូកប្រដាល់គុនចម្រុះដែរ។ ជាពិសេសប៉ុន្មានថ្ងៃមុន កីឡាករថៃរូបនេះនិយាយថា រូបគេចង់វ៉ៃខ្សែក្រវាត់ឃីកបុកសីងពិភពលោក រួចចូលប្រឡូកប្រដាល់គុនចម្រុះ ពីព្រោះរូបគេចង់សាកអ្វីដែលថ្មី។
ប្រការនេះមានន័យថា ប្រសិនបើអ្នកទាំងពីរមិនបានជួបគ្នាក្នុងការប្រកួតមួយថៃ ឬឃីកបុកសីង ប៉ុន្តែអាចជួបគ្នាក្នុងការប្រកួតគុនចម្រុះនៅថ្ងៃណាមួយ។
Adiwang បាននិយាយថា ៖«ប្រសិនបើរឿងនេះកើតឡើង វាកាន់តែល្អសម្រាប់ខ្ញុំ។ ពេលណាក៏ដោយ ឲ្យតែគាត់ចូលប្រឡូកគុនចម្រុះ ខ្ញុំពិតជាចង់ជួបគាត់ណាស់ ជាពិសេសនៅពេលគាត់ប្រកួតលើកដំបូង ជួបខ្ញុំក៏បាន។ ខ្ញុំស្វាគមន៍ដោយរីករាយ ហើយសង្ឃឹមវាអាចកើតឡើង»៕